- Líkamsárás
D Ó M U R
Héraðsdóms Austurlands miðvikudaginn 9. maí 2018 í máli nr.
S-17/2018:
Ákæruvaldið
(Helgi
Jensson, fulltrúi lögreglustjóra)
(Kristrún
Elsa Harðardóttir, réttargæslumaður)
gegn
A
(Auðun Helgason lögmaður)
Mál þetta, sem dómtekið var 20. apríl sl., er höfðað
með tveimur ákærum lögreglustjórans á Austurlandi, á hendur A, kt. […], […], […].
Ákæra, útgefin 28. febrúar 2018, en með henni er mál
höfðað á hendur ákærða;
„fyrir hegningarlagabrot
gagnvart þáverandi sambýliskonu sinni, B, kt. […], eins og hér greinir:
I.
Með
því að hafa, aðfaranótt sunnudagsins 1. júní 2014, veist að B utandyra á […],
skammt frá …húsinu á […], hrint henni þannig að hún skall með höfuð á malbik
akbrautar. Mál nr. 318-2015-2635.
II.
Með
því að hafa, aðfaranótt sunnudagsins 27. júlí 2014, veist að B utandyra, skammt
frá viðburðarsvæðinu á […] og hrint henni í jörðina og svo hrist hana til. Mál
nr. 318-2015-2635, (028-2014-1825).
III.
Með
því að hafa, aðfaranótt sunnudagsins 17. ágúst 2014, utandyra á gangstétt, norðan
við skyndibitastaðinn […] að […] […], veist að B, hrint henni eða skellt í
jörðina og tekið hana hálstaki, uns lögregla kom að og stöðvaði árásina. Mál
nr. 318-2015-2635, (024-2014-4235).
IV.
Með
því að hafa, aðfaranótt föstudagsins 4. október 2014, veist að B inni á
hótelherbergi nr. […] á […] í […], slegið hana í andlit og hrint henni þannig
að hún féll í gólfið og síðan sparkað í líkama hennar og að lokum tekið hana
hálstaki. Mál nr. 318-2015-2635.
V.
Með
því að hafa, aðfaranótt sunnudagsins 15. mars 2015, á bifreiðastæði framan við […]
á […], veist að B þar sem hún sat vinstra megin í aftursæti bifreiðar, gripið í
hana og rifið hana þannig út úr bifreiðinni og dregið hana síðan eftir
bifreiðastæðinu þannig að hné hennar drógust eftir malbikinu og örskömmu síðar
hrint henni þannig að hún féll í jörðina, með þeim afleiðingum að hún hlaut
bólgu, roða, rispur, mar og eymsli víða um líkama og útlimi, húðblæðingar á
hálsi og eymsli við að kyngja. Mál nr. 318-2015-2635.
Telst þetta varða við 1. mgr. 218. gr. b, en til vara
við 1. mgr. 217. gr. almennra hegningarlaga nr. 19/1940, sbr. breytingarlög.
Þess er krafist að ákærði verði dæmdur til refsingar
og til greiðslu alls sakarkostnaðar.“
Með
framhaldsákæru sama lögreglustjóra, sem útgefin er 23. mars sl., er mál höfðað
á hendur ákærða í því skyni að koma að bótakröfu brotaþola í ofangreindu máli,
en krafan hafði borist lögreglustjóranum þann sama dag.
Nefnd
einkaréttarkrafa er dagsett 5. apríl 2017. Um heimild til útgáfu ákærunnar
vísar lögreglustjórinn til 153. gr. sakamálalaga nr. 88/2008, sbr. 173. gr. sömu laga.
Kröfunni er þannig lýst:
„...
Í málinu er þess krafist af hálfu Kristrúnar Elsu Harðardóttur, hdl., f.h.
brotaþola B, kt. […], að ákærði verði dæmdur til greiðslu miskabóta samtals að
fjárhæð kr. 3.500.000, auk vaxta skv. 8. gr., sbr. 4. gr. laga um vexti og
verðtryggingu nr. 38/2001, frá 15. mars 2015, til þess dags er mánuður er
liðinn frá því að bótakrafa þessi er birt ákærða, en síðan með dráttarvöxtum
frá þeim degi skv. 9. gr., sbr. 6. gr. sömu laga, til greiðsludags. Þá er þess
krafist að ákærði verði dæmdur til að greiða hæfilegan kostnað vegna
réttargæslu brotaþola að mati dómsins, sbr. ákvæði 48. gr., laga nr. 88/2008,
eða skv. síðar framlögðum málskostnaðarreikningi, að teknu tilliti til
virðisaukaskatts á réttargæsluþóknun eða ákærði verði dæmdur til að greiða
lögmannskostnað brotaþola við að koma bótakröfunni á framfæri og vegna
hagsmunagæslu við meðferð málsins fyrir dómi skv. tímaskýrslu og
málskostnaðarreikningi sem lögð verður fram við meðferð málsins sbr. 3. mgr.
176. gr. laga 88/2008, auk virðisaukaskatts af málflutningsþóknun.“
Við
þingfestingu málsins, þann 20. apríl sl., leiðrétti sækjandi sakarefni
ákærunnar frá 28. febrúar sl. að því er varðaði verknaðarlýsingu I. og II.
kafla. Hann vísaði til þess að í I. kaflanum hafi átt að miða við að ákærði
hefði „ýtt við“ en ekki „hrinti“
brotaþola og í II. kaflanum hafi átt að miða við að ákærði hefði ,,ýtt við
henni svo að hún féll í jörðina“, en ekki ,,hrinti henni“.
Á
dómþinginu lýsti sækjandinn því yfir, fyrir hönd skipaðs réttargæslumanns
brotaþola, að fallið væri frá miskabótaþætti einkaréttarkröfunnar. Var þar um
vísað til þess að samkomulag hefði tekist um greiðsluna, ásamt vöxtum, millum
ákærða og brotaþola, og þá með hliðsjón af endanlegum sakargiftum samkvæmt
nefndri ákæru. Sækjandinn áréttaði að öðru leyti kröfur samkvæmt nefndum
ákærum, en jafnframt reifaði hann það sjónarmið, að réttast væri að um
helmingur sakarkostnaðar félli á ríkissjóð þar sem ákæruvaldið hefði fallið frá
alvarlegasta hluta þess kæruefnis, sem lögregla hafði upphaflega verið með til
rannsóknar gegn ákærða.
Skipaður
verjandi ákærða, Auðun Helgason lögmaður, krafðist fyrir hönd ákærða vægustu refsingar sem lög leyfa, en um heimfærslu brota
vísaði hann til 1. mgr. 217. gr. almennra hegningarlaga nr. 19/1940. Þá
krafðist verjandinn þess að allur sakarkostnaður málsins, þ.m.t hæfileg
málflutningsþóknun hans samkvæmt framlagðri tímaskýrslu, yrði felldur á
ríkissjóð.
Farið
var með málið samkvæmt málsmeðferðarreglum 164. gr. laga um meðferð sakamála
nr. 88/2008.
A.
1. Fyrir dómi
hefur ákærði skýlaust viðurkennt sakargiftir, líkt og háttsemi hans er lýst í
I.-V. kafla ákærunnar frá 28. febrúar sl., eins og efni I. og II. kafla hennar
var breytt hér að framan.
Játning
ákærða er í samræmi við rannsóknargögn lögreglu, þ. á m. framburðarskýrslur
hans hjá lögreglu við upphaf rannsóknar, dagana 15., 18. og 19. mars 2015, en
einnig læknisvottorð, sem aflað var og varðar ákærukafla V. Læknisvottorða
virðist ekki hafa verið aflað við rannsókn lögreglustjórans á Suðurlandi vegna
sakaratriða annarra ákærukafla, en í öllum tilvikum var um háttsemina vísað til
minniháttar líkamsárásar, sbr. ákvæða 1. mgr. 217. gr. almennra hegningarlaga
nr. 19/1940.
Með
játningu ákærða, sem ekki er ástæða til að efa að sé sannleikanum samkvæm, sem
og nefndum rannsóknargögnum, er nægjanlega sannað að ákærði hafi gerst sekur um
þá háttsemi, sem í ákærunni er lýst.
2. Samkvæmt
framansögðu hefur ákærði gerst sekur um fimm aðgreindar líkamsárásir, þann 1.
júní, 27. júlí, 17. ágúst og 4. október 2014 og loks þann 15. mars 2015, sem
allar beindust að þáverandi sambýliskonu hans, brotaþola.
Í ákæru
eru brot ákærða heimfærð undir 1. mgr. 218. gr. b
almennra hegningarlaga nr. 19/1940, sbr. 4. gr. breytingarlaga nr.
23/2016 (heimilisofbeldi). Ákvæðið er nýmæli, sem beint er m.a. að ofbeldi í
nánum samböndum, en eins og fyrr sagði var um sakarefnið við lögreglurannsókn
vísað um háttsemi ákærða til 1. mgr. 217. gr. hegningarlaganna, sbr. og
varakrafa í ákæru.
Samkvæmt
nefndri 1. mgr. 218. gr. b skal hver sem endurtekið eða á alvarlegan hátt ógnar
lífi, heilsu eða velferð núverandi eða fyrrverandi maka síns eða sambúðaraðila,
niðja síns eða niðja núverandi eða fyrrverandi maka síns eða sambúðaraðila, áa
síns, eða annarra sem búa með honum á heimili eða eru í hans umsjá, með
ofbeldi, hótunum, frelsissviptingu, nauðung eða á annan hátt, sæta fangelsi
allt að 6 árum.
Það er
álit dómsins að þar sem brot ákærða voru endurtekin beri að fella háttsemi hans
undir nefnt ákvæði 1. mgr. 218. gr. b í hegningarlögunum, líkt og ákæruvaldið
krefst.
Til þess
er að líta að í 1. mgr. 2. gr. hegningarlaganna segir að hafi refsilöggjöf breyst frá því að verknaður var
framinn til þess er dómur gengur, skuli dæma eftir nýrri lögunum, bæði um
refsinæmi verknaðar og refsingu, en að aldrei megi þó dæma refsingu, nema
heimild hafi verið til þess í lögum, þegar verk var framið, og ekki þyngri
refsingu en orðið hefði eftir þeim lögum. Í því samhengi þykir mega horfa til
3. mgr. 70. gr. sömu laga, en í ákvæðinu er kveðið á um að það skuli að jafnaði
tekið til greina til þyngingar refsingu hafi verknaður beinst að karli, konu
eða barni sem eru nákomin geranda og tengsl þeirra þykja hafa aukið á grófleika
verknaðarins.
B.
1. Samkvæmt framlögðum
gögnum ákæruvalds hóf lögregla rannnsókn á því broti, sem lýst er í V. kafla
ákæru, þann sama sólarhring og atvik máls gerðust, 15. mars 2015. Liggur og
fyrir að ákærði og brotaþoli voru nær strax yfirheyrð um sakarefnið. Að
frumkvæði rannsakara var aflað læknisfræðilegra gagna um áverka brotaþola, en
þ. á m. var skýrsla læknis um réttarfræðilega skoðun á brotaþola, sem dagsett
er nefndan dag, 15. mars 2015. Verður ráðið af gögnum að skýrslunnar hafi verið
aflað vegna orða brotaþola í lögreglubifreið umrædda nótt um að hún hefði mátt
þola kynferðisbrot af hálfu ákærða þá skömmu áður, en einnig í tengslum við það
brot sem greint er frá í IV. kafla ákærunnar.
Ákærði og brotaþoli
voru nánar yfirheyrð hjá lögreglu um sakaratriði I.-V. kafla ákæru 18. og 19.
mars 2015. Brotaþoli gaf jafnframt skýrslu 9. apríl sama ár, en þá um hin
ætluðu kynferðisbrot. Fyrir liggur að hún tjáði sig takamarkað um þá háttsemi,
líkt og við fyrri yfirheyrslur. Ákærði, sem samkvæmt gögnum hafði verið
úrskurðaður í gæsluvarðhald, neitaði alfarið sakaratriðum sem vörðuðu hin
ætluðu kynferðisbrot.
Dagana 16.-19. og 23.
mars 2015 yfirheyrði lögregla fjölda vitna um greind kæruatriði.
Samkvæmt
rannsóknargögnum lögreglu gaf brotaþoli fyrst skýrslu um hin ætluðu
kynferðisbrot ákærða þann 7. mars 2017. Jafnframt var systir ákærða yfirheyrð
um þann hluta málsins 9. apríl 2017, en hún kvaðst, líkt og við fyrri tvær
yfirheyrslur, í mars 2015, ekkert geta upplýst um málsatvik.
Samkvæmt gögnum
málsins sendi tilnefndur réttargæslumaður brotaþola, þann 5. apríl 2017,
skaðabótakröfu, ásamt greinargerð, til rannsóknardeildar lögreglustjórans á
Suðurlandi. Krafan varðaði þau sakaratriði sem tilgreind eru í ákæruköflum I-V,
en einnig hin ætluðu kynferðisbrot ákærða. Ákærði var yfirheyrður um
síðastgreindu kæruatriðin 6. apríl sama ár, en hann neitaði háttseminni, líkt
og hann hafði áður gert.
Ráðið verður af
gögnum, sbr. dskj. nr. 12, að rannsóknaraðilar hafi sent rannsóknargögn, sem
vörðuðu hin ætluðu kynferðisbrot ákærða, til embættis héraðssaksóknara til
ákvörðunar, en fyrir liggur að embættið tilkynnti með bréfi, dagsettu 16.
janúar 2017, að brot af því tagi, sem rannsakað hafði verið í tengslum við
sakarefni IV. kafla ákærunnar, hefði embættið ákveðið að fella niður. Með
nefndu bréfi fyrirskipaði héraðssaksóknarinn hins vegar frekari rannsókn á öðru
slíku broti, sem m.a. tengdist sakarefni V. kafla ákærunnar. Vegna þessa voru
rannsóknargögnin endursend lögreglustjóranum á Suðurlandi.
Af gögnum málsins
verður ráðið að embætti héraðssaksóknara hafi þann 4. september 2017 alfarið
fellt niður öll kæruefni sem vörðuðu hin ætluð kynferðisbrot ákærða gegn
brotaþola.
2. Samkvæmt málsskjölum
fór lögreglustjórinn á Suðurlandi þess á leit við ríkissaksóknara, að höfðu
samráði við lögreglustjórann á Austurlandi, að hinum síðarnefnda yrði falið að
höfða sakamál á hendur ákærða fyrir Héraðsdómi Austurlands og þá með hliðsjón
af brotavettvangi þriggja sakaratriða þessa máls, en einnig með hliðsjón af
varnarþingi ákærða. Ríkissaksóknari varð við beiðninni, sbr. heimildarákvæði 3.
mgr. og 4. mgr. 24. gr. laga um meðferð sakamála nr. 88/2008, en í framhaldi af
því var lögreglustjóranum á Austurlandi falið, vegna ætlaðra hegningarlagabrota
ákærða, „að höfða sakamál, eða afgreiða með öðrum hætti.“ Gekk það eftir, en
sakmál það sem hér er til umfjöllunar, var eins og áður sagði höfðað þann 28.
febrúar sl., en ákæran svo og gögn málsins bárust Héraðsdómi Austurlands 15.
mars sl. Ákæran var birt ákærða 22. sama mánaðar, en málið var síðan þingfest í
kjölfar útgáfu framhaldsákæru lögreglustjóra og lítils háttar frests vegna
sáttaumleitana ákærða og brotaþola um áðurrakta einkaréttarkröfu, þann 20.
apríl sl.
3. Brot ákærða samkvæmt V. kafla
ákæru var framið 15. mars 2015. Rannsókn lögreglu hefur hér að framan að nokkru
verið rakin, en fyrir liggur að ákærði játaði sakarefni ákærukaflans, en einnig
sakarefni annarra ákærukafla ákærunnar, þegar við upphaf lögreglurannsóknar, um
miðbik marsmánaðar 2015.
Fyrningarfrestur
greindra brota telst frá þeim degi, er refsiverðum verknaði ákærða lauk, sbr. ákvæði
1. mgr. 82. gr. almennra hegningarlaga. Samkvæmt
4. mgr. 82. gr. laganna rofnar fyrningarfrestur þegar rannsókn sakamáls hefst
fyrir rannsóknara gegn manni sem sakborningi. Samkvæmt 2. málslið 5. mgr.
lagagreinarinnar rýfur rannsókn samkvæmt nefndri 4. mgr. hins vegar ekki fyrningarfrest
ef rannsóknari hættir henni eða hún stöðvast um óákveðinn tíma með þeim
fyrirvara að sakborningur hafi ekki komið sér undan rannsókn.
Eins og
áður var rakið hófst rannsókn sama dag og brot var framið samkvæmt V. kafla
ákæru, þann 15. mars 2015, er lögregla bar sakargiftir undir ákærða. Þá rofnaði
fyrningarfrestur brota samkvæmt ákæruköflum II-IV þann sama dag, en vegna brots
samkvæmt I. kafla ákærunnar þann 19. mars sama ár og þá af sömu ástæðu.
Dómurinn
lítur svo á að eftir greind tímamörk og þar til ákæra var birt teljist rannsókn
málsins hafa stöðvast í skilningi 5. mgr. 82. gr. hegningarlaganna enda verður
ekki ráðið af gögnum að ákærði hafi reynt að koma sér undan rannsókninni. Verður
honum þannig ekki kennt um meðferð málsins fyrir útgáfu ákæru.
Háttsemi
ákærða samkvæmt ákæruköflum I-V hefði að áliti dómsins í öllum tilvikum varðað
við ákvæði 1. mgr. 217. gr. almennra hegningarlaga fyrir lögfestingu
áðurgreindra breytinga á hegningarlögunum um heimilisofbeldi.
Brot
samkvæmt 1. mgr. 217. gr. hegningarlaganna varðar sektum eða fangelsi allt að
sex mánuðum eða einu ári ef háttsemin er sérstaklega vítaverð. Samkvæmt 1. mgr.
81. gr. laganna fyrnist sök manns á tveimur árum þegar ekki liggur þyngri
refsing við broti en eins árs fangelsi eða refsing sú, sem til er unnið, fer
ekki fram úr sektum.
Samkvæmt
framansögðu miðast upphaf fyrningarfrests við áðurnefnd tímamörk og voru því,
sbr. áðurrakið ákvæði 1. mgr. 2. gr. hegningarlaganna, öll brot ákærða fyrnd er
málið var höfðað tæplega þremur árum síðar. Verður ákærða því ekki refsað fyrir
þá háttsemi, sem lýst er í I.-V. kafla ákæru, sbr. 6. mgr. 82. gr.
hegningarlaganna, og ber að sýkna hann af öllum kröfum ákæruvalds í máli þessu.
Í samræmi
við ofangreind málsúrslit og 235. gr. sakamálalaganna greiðist allur kostnaður
sakarinnar, þ.m.t. kostnaður af störfum skipaðs verjanda og skipaðs réttargæslumanns,
úr ríkissjóði.
Þóknun
skipaðs verjanda ákærða, Auðunar Helgasonar lögmanns, vegna starfa hans á
rannsóknarstigi og fyrir dómi þykir hæfilega ákveðin í einu lagi 438.340
krónur, að meðtöldum virðisaukaskatti, og hefur þá að öllu leyti verið höfð
hliðsjón af framlögðu tímayfirliti hans.
Samkvæmt
rannsóknargögnum var Kristrún Elsa Harðardóttir lögmaður tilnefnd, en síðan
skipuð réttargæslumaður brotaþola, við alla meðferð máls þessa. Verður henni
því ákvörðuð þóknun sem telst hæfilega ákveðin 1.243.720 krónur, að meðtöldum
virðisaukaskatti, og hefur þá m.a. verið höfð hliðsjón af framlögðu og
rökstuddu tímayfirliti, sem tekur til ríflega þriggja ára tímabils. Að auki
verður réttargæslumanninum greiddur ferðakostnaður að fjárhæð 10.800 krónur.
Ólafur Ólafsson héraðsdómari
kveður upp dóm þennan.
D Ó M S
O R Ð:
Ákærði, A,
er sýkn af refsikröfu ákæruvalds.
Allur
sakarkostnaður málsins greiðist úr ríkissjóði, þar með talin málflutningsþóknun
skipaðs verjanda ákærða, Auðunar Helgasonar lögmanns, 438.340 krónur, og þóknun
skipaðs réttargæslumanns brotaþola, Kristrúnar Elsu Harðardóttur lögmanns,
1.243.720 krónur, en einnig ferðakostnaður hennar, 10.800 krónur.
Ólafur Ólafsson