D Ó M U R

Héraðsdóms Reykjaness mánudaginn 5. febrúar 2018 í máli nr. S-45/2018:

Ákæruvaldið

(Halldór Rósmundur Guðjónsson saksóknarfulltrúi)

gegn

Joan Rui dos Santos Sanchez

(Halldóra Aðalsteinsdóttir lögmaður)

Mál þetta, sem dómtekið var 30. janúar 2018, er höfðað með ákæru lögreglustjórans á Suðurnesjum 22. janúar 2018 á hendur ákærða, Joan Rui Santos Sanchez, fæddum 20. desember 1993, spænskum ríkisborgara;

„fyrir fíkniefnalagabrot, með því að hafa sunnudaginn 7. janúar 2018, staðið að innflutningi á samtals 66,63 g af kókaíni, ætluðu til söludreifingar hér á landi í ágóðaskyni. Fíkniefnin flutti ákærði til landsins sem farþegi með flugi WW-627 frá Barcelona, Spáni, falin í líkama sínum í tveimur pakkningum.

Telst háttsemi þessi varða við 2. gr., sbr. 5. og 6. gr., laga um ávana- og fíkniefni nr. 65/1974, sbr. lög nr. 13/1985 og lög nr. 68/2001, og 2. gr., sbr. 1. mgr. 14. gr. reglugerðar um ávana- og fíkniefni og önnur eftirlitsskyld efni nr. 233/2001, sbr. reglugerð nr. 848/2002 og auglýsingu nr. 232/2001.

Þess er krafist að ákærði verði dæmdur til refsingar og til greiðslu alls sakarkostnaðar og að gerð verði upptæk framangreind 66,63 g af kókaíni, samkvæmt heimild í 6. mgr. 5. gr. laga nr. 65/1974, sbr. lög nr. 10/1997 og 68/2001, sbr. 2. mgr. 14. gr. reglugerðar nr. 233/2001, sbr. reglugerð nr. 848/2002.“

Kröfur ákærða í málinu eru þær að honum verði gerð sú vægasta refsing sem lög leyfa og að gæsluvarðhaldsvist sem hann hefur sætt frá 8. janúar 2018 verði dregin frá þeirri refsingu sem ákveðin verði að fullri dagatölu. Þá krefst verjandi ákærða hæfilegrar þóknunar sér til handa samkvæmt framlagðri tímaskýrslu.

Farið var með mál þetta samkvæmt 164. gr. laga nr. 88/2008 um meðferð sakamála. Var málið tekið til dóms við þingfestingu þess 30. janúar sl. án frekari sönnunarfærslu er sækjanda og verjanda ákærða hafði verið gefinn kostur á að tjá sig um lagaatriði máls og ákvörðun viðurlaga.

Niðurstaða:

Ákærði játaði brot sitt við þingfestingu máls þessa. Játning ákærða samrýmist gögnum málsins. Brot hans telst því sannað og er það réttilega heimfært til refsiákvæða í ákæru.

Við ákvörðun refsingar verður ekki framhjá því litið að ákærði hefur nú verið sakfelldur fyrir að hafa flutt hingað til lands kókaín, ætlað til söludreifingar í ágóðaskyni.

Ákærða til málsbóta horfir að hann hefur frá upphafi játað sök. Þá þykir verða að leggja til grundvallar við úrlausn málsins að ákærði hafi einungis komið að flutningi efnanna hingað til lands. Samkvæmt þessu, og að gættum styrkleika þeirra efna sem hér um ræðir, þykir refsing ákærða, í ljósi dómaframkvæmdar, réttilega ákveðin tveggja mánaða fangelsi. Til frádráttar refsingunni kemur gæsluvarðhald sem ákærði hefur sætt frá 8. janúar 2018 að fullri dagatölu, sbr. 76. gr. almennra hegningarlaga nr. 19/1940. Ekki þykja vera efni til þess að binda refsingu ákærða skilorði.

Með vísan til kröfugerðar ákæruvalds, gagna málsins og tilgreindra lagaákvæða í ákæru verða gerð upptæk þau 66,63 grömm af kókaíni sem ákærði var með í vörslum sínum við komuna til landsins 7. janúar sl.

Á grundvelli sakfellingar ákærða, sbr. 1. mgr. 235. gr. laga nr. 88/2008 um meðferð sakamála, verður honum gert að greiða allan sakarkostnað málsins. Ákærði dæmist því til að greiða sakakostnað samkvæmt framlögðu sakarkostnaðaryfirliti, samtals 108.612 krónur. Ákærði greiði einnig þóknun skipaðs verjanda síns, Halldóru Aðalsteinsdóttur lögmanns, sem eftir umfangi málsins þykir hæfilega ákveðin, vegna vinnu verjanda á rannsóknarstigi og eftir höfðun málsins hér fyrir dómi, svo sem í dómsorði greinir. Ákærði greiði enn fremur útlagðan ferðakostnað verjanda, 58.520 krónur.

Dóm þennan kveður upp Kristinn Halldórsson héraðsdómari.

D Ó M S O R Ð:

Ákærði, Joan Rui dos Santos Sanchechez, fæddur 20. desember 1993, sæti fangelsi í tvo mánuði. Til frádráttar refsingunni kemur gæsluvarðhald sem ákærði hefur sætt frá 8. janúar 2018 að fullri dagatölu.

Ákærði sæti upptöku á 66,63 grömmum af kókaíni.

Ákærði greiði 736.292 krónur í sakarkostnað, þ.m.t. þóknun skipaðs verjanda síns, Halldóru Aðalsteinsdóttur lögmanns, 569.160 krónur að virðisaukaskatti meðtöldum, og útlagðan ferðakostnað verjanda, 58.520 krónur.

Kristinn Halldórsson