- Erfðaskrá
- Erfðir
- Fjármál hjóna
- Fjárskipti
- Séreign
- Hjón - Annað
- Slit á fjárfélagi hjóna
R S K U R Ð U R
Héraðsdóms
Reykjaness, þriðjudaginn 9. apríl 2019, í máli nr. Q-3/2018:
A
(Sigurður G. Guðjónsson
lögmaður)
gegn
B
(Lára V. Júlíusdóttir
lögmaður)
Mál
þetta barst dóminum 20. september 2018 með bréfi skiptastjóra, C lögmanns,
dagsettu 19. sama mánaðar. Málið var þingfest 24. október 2018 og tekið til
úrskurðar 26. mars 2019. Þann 11. janúar 2019 barst dóminum ný krafa, Q-2/2019,
frá sama skiptastjóra vegna sömu skipta og var það mál sameinað eldra máli og
þau rekin saman. Varð dráttur á flutningi málsins vegna sáttatilrauna aðila.
Málskot þetta byggist á 122. gr. laga nr. 20/1991 um skipti á dánarbúum o.fl.
Sóknaraðili
er A, kt. 000000-0000, [...]. Varnaraðili er B, kt. 000000-0000,
[...].
Sóknaraðili
gerir eftirfarandi kröfur: Aðallega að viðurkennt verði að við fjárskipti
sóknaraðila og varnaraðila skuli teljast séreign sóknaraðila 52,36%
fasteignarinnar [...], og allt sem komið hefur í stað hennar, þar með talin öll
fasteignin að [...].
Til
vara er þess krafist að við fjárslit aðila verði vikið frá helmingaskiptareglu
103. gr. hjúskaparlaga samkvæmt ákvæðum 1. mgr. 104. gr. laganna og sóknaraðila
verði heimilað að taka að óskiptu eftirtaldar eignir: a. 52,36% fasteignarinnar [...], b. alla
fasteignina að [...].
Til
þrautavara er þess krafist að við fjárslit aðila verði vikið frá
helmingaskiptareglu 103. gr. hjúskaparlaga samkvæmt ákvæðum 1. mgr. 104. gr. hjúskaparlaga og
sóknaraðila verði heimilað að taka að óskiptu fasteignina að [...].
Sóknaraðili
krefst þess að við skipti aðila verði því hafnað að draga frá hjúskapareign
varnaraðila skuld hans við Lánasjóð íslenskra námsmanna eins og hún var [...],
eða aðra og lægri fjárhæð.
Sóknaraðili
krefst þess að viðurkennd verði endurgjaldskrafa hennar á hendur varnaraðila
samkvæmt 2. mgr. 107. gr. laga nr. 31/1993 vegna verðmætisrýrnunar [...], frá
því að varnaraðili fékk umráð eignarinnar árið 2010.
Í
síðari ágreiningi aðila eru kröfur sóknaraðila þær að vikið verði frá
helmingaskiptareglu 103. gr. hjúskaparlaga nr. 31/1993 með heimild í 1. mgr.
104. gr. laganna og að sóknaraðila verði heimilað að taka að óskiptu 52,6%
fasteignarinnar [...]og alla fasteignina að [...].
Þá
krefst sóknaraðili málskostnaðar úr hendi varnaraðila auk virðisaukaskatts.
Varnaraðili
krefst þess að öllum kröfum sóknaraðila verði hafnað og að fjárskipti milli
aðila fari fram samkvæmt helmingaskiptareglu hjúskaparlaga nr. 31/1993. Þá
krefst varnaraðili málskostnaðar úr hendi sóknaraðila.
Munnlegur
málflutningur fór fram þann 26. mars sl. og var málið tekið til úrskurðar að
honum loknum.
Málsatvik.
Aðilar
máls þessa eru ekki sammála um málsatvik og verða þau rakin eins og þau liggja
fyrir í gögnum málsins og greinargerðum eftir því sem við á.
Aðilar
máls þessa kynntust árið 1990 eða 1991 en hófu sambúð í júlí 1993 og gengu
síðan í hjónaband á árinu 1994.
Þann
13. júlí 1993 undirrituðu aðilar máls þessa kaupsamning um tveggja herbergja
íbúð við [...]. Var kaupverðið 7.900.000 krónur, sem greiddist með yfirteknum
lánum að eftirstöðvum 4.904.651 króna og greiðslu peninga á tæpu ári, samtals 2.995.349
krónur.
Þann
18. mars 1996 greiddi móðir sóknaraðila fimm börnum sínum út fyrir fram
greiddan arf, hverju að fjárhæð 802.909 krónur. Í skýringum í
erfðafjárskýrslunni segir að móðir erfingja sitji í óskiptu búi. Hún eigi 1/5
hluta í landi [...] og hyggist á næstunni skipta þeirri eign jafnt á milli
barna sinna í samræmi við reglur erfðalaga. Nú greiði hún út, sem
fyrirframgreiddan arf, alls 5/11 hluta af eign sinni í sameigninni [...], til
fimm barna sinna. Síðar hyggist hún greiða út fyrirframgreiddan arf til barna
sinna, A, B, C og G auk barnabarns. Hefur umrædd arfsgreiðsla verið sem nam
1,82% eignarhlut sóknaraðila í [...]sem síðan var selt 19. janúar 1999.
Þann
6. janúar 1998 seldu aðilar móður sóknaraðila ofangreinda íbúð samkvæmt afsali
5. maí 1998. Segir ekkert um söluverð en yfirteknar skuldir eru sagðar tvö lán,
upphaflega samtals að fjárhæð 2.658.000 krónur, vísitölutryggð. Þann sama dag
undirrituðu aðilar og móðir sóknaraðila kaupsamning um [...] en móðir sóknaraðila
var seljandi hússins. Var kaupverðið 10.800.000 krónur, yfirteknar áhvílandi
skuldir 188.193 krónur og útborgun, samtals 7.681.807 krónur, greidd út í
peningum á fimm mánuðum. Þá gáfu kaupendur út
fasteignaveðbréf að fjárhæð 2.930.000 krónur til seljanda.
Þann 19. janúar 1999 undirrituðu
eigendur að [...]kauptilboð í landið og var söluverðið 680.000.000 króna. Var
móðir sóknaraðila eigandi að 10,9 hundraðshluta og sóknaraðili að 1,82
hundraðshluta.
Í gögnum málsins liggur fyrir
yfirlit vegna vinnu varnaraðila fyrir móður sóknaraðila á árunum 1996 til 1999.
Kemur þar fram að unnið var vegna fyrirframgreiðslu arfs árið 1996 og 1999 auk
annarra starfa sem varnaraðili tilgreinir.
Í bréfi 13. mars 2000 sem varnaraðili
sendi til endurskoðanda móður sóknaraðila er farið yfir uppgjör þeirra í milli
vegna fasteignaviðskipta aðila á íbúð í [...].
Með bréfi 12. júlí 2000 frá varnaraðila
til endurskoðanda móður sóknaraðila fór varnaraðili yfir greiðslur og
fjárhagslegt uppgjör, m.a. vegna erfðafjárskatts, vinnu hans fyrir móður sóknaraðila
o.fl.
Þann 20. október 2000 undirrituðu
aðilar kaupsamning vegna [...]. Var kaupverðið 23.300.000 krónur, yfirteknar
áhvílandi skuldir 1.118.870 krónur, útgefið fasteignaveðbréf 4.000.000 króna og
útborgun á rúmlega sex mánaða tímabili 18.181.130 krónur.
Afrit kaupsamnings frá 26. júlí 2001
liggur fyrir í málinu þar sem aðilar máls þessa selja raðhúsið að [...] til
þriðja aðila. Var söluverðið 16.900.000 króna. Voru yfirteknar áhvílandi
skuldir að fjárhæð 4.900.726 krónur og gáfu kaupendur út fasteignaveðbréf að
fjárhæð 3.350.000 krónur. Kaupsamningsgreiðslur voru að fjárhæð 8.649.274
krónur.
Skjal dagsett 22. apríl 2001 sem
stafar frá varnaraðila vegna greiðslna varnaraðila í þágu móður sóknaraðila
liggur fyrir. Áritað er á skjalið og staðfest af varnaraðila að móðir sóknaraðila
hafi greitt honum kröfuliði nr. eitt og tvö í skjalinu.
Þann 26. febrúar 2004 sendi lögmaður
móður sóknaraðila varnaraðila bréf þar sem hann krafði varnaraðila um andvirði
húsbréfa að fjárhæð 2.194.476 krónur vegna kaupa sóknar- og varnaraðila á [...].
Segir í bréfinu að varnaraðili hafi fengið móður sóknaraðila til að framselja varnaraðila
húsbréfin. Húsbréfin hafi varnaraðili síðan selt en ekki staðið móður sóknaraðila
skil á andvirði þeirra. Með bréfi þann 11. mars 2004 sendi lögmaður móður sóknaraðila
lögmanni sóknaraðila bréf og bauð ákveðin málalok vegna uppgjörs þeirra í
millum. Með bréfi lögmanns sóknaraðila þann 30. mars 2004 til lögmanns móður sóknaraðila
var kröfum á hendur sóknaraðila af hálfu móður hennar hafnað og tekið fram að
um lán hafi verið að ræða og því mótmælt sérstaklega að vextir komi til
skuldajöfnunar á móti fyrirframgreiðslu arfs.
Þann
2. september 2005 undirritaði [...], móðir sóknaraðila, erfðaskrá þar sem fram
kemur að allur arfur til skylduerfingja hennar, barna og barnabarna verði
séreign þeirra. Hefur erfðaskrá þessi ekki verið vefengd.
Fyrir
liggur í skjölum málsins söluyfirlit og verðmat á einbýlishúsinu að [...]
dagsett 23. október 2009 og er söluverð sagt 59.500.000 krónur.
Afrit
af erfðafjárskýrslu frá 30. desember 2010 liggur fyrir þar sem sóknaraðili fékk
í arf 1.000.000 króna frá móður sinni.
Þann
4. mars 2013 sóttu aðilar um skilnað að borði og sæng hjá sýslumanninum í [...].
Lá þá fjárskiptasamningur ekki fyrir. Með úrskurði Héraðsdóms Reykjaness þann
23. mars 2016 var bú aðila tekið til opinberra skipta til fjárslita.
Erfðafjárskýrsla
dagsett 24. júní 2013 liggur fyrir þar sem móðir stefnanda arfleiðir m.a. börn
sín að 4.500.000 krónum hvert.
Verðmat
dagsett 9. maí 2016 vegna [...], liggur fyrir þar sem fram kemur að
fasteignamat eignarinnar sé 59.850.000 krónur og áætlað markaðsverð 62.100.000
krónur. Eru aðilar þinglýstir eigendur til helminga.
Verðmat
dagsett 9. maí 2016 vegna [...], liggur fyrir þar sem fram kemur að
fasteignamat eignarinnar sé 36.550.000 krónur og áætlað markaðsverð 47.000.000
króna.
Þann
25. febrúar 2016 ritaði E bréf þar sem fram kemur að þann 2. september 2005
hafi F leitað til hans og kveðst hafa eftir F að orðalag í erfðaskránni frá
2005, „Allur arfur til skylduerfingja minna, barna og barnavarna verður séreign
þeirra“, hafi átt að vera í áðurgerðri erfðaskrá sem gerð var á árinu 1995 og
það hafi verið hennar vilji á þeim tíma.
Á
fundi skiptastjóra þann 18. apríl 2016 var farið yfir helstu eignir búsins og
skuldir. Var bókað eftir konunni að maðurinn hafi greitt henni 24.200.000
krónur á árinu 2010 og taldi hún að maðurinn ætti eftir að klára uppgjör
fjárslita og enn standi upp á að klára helmingaskipti. Þá er bókað eftir
konunni að hluti eignarinnar að [...] sé séreign samkvæmt erfðaskrá og tekið
jafnframt fram að hún áskildi sér rétt til endurgjaldskröfu vegna framkvæmda
við þá fasteign.
Fundur
var haldinn hjá skiptastjóra 19. janúar 2017 og voru verðmöt fasteignanna að [...]
og [...]lögð fram. Lagði skiptastjóri fram á þeim fundi tillögur sínar að
fjárskiptum búsins milli aðila.
Á
fundi skiptastjóra þann 21. febrúar 2017 er bókað um ágreining aðila um
fjárskipti á búi þeirra.
Á
skiptafundi þann 9. janúar 2019 var fjallað um kröfu konunnar um skáskipti
þannig að vikið yrði frá helmingaskiptareglu 103. gr. hjúskaparlaga. Var þeirri
kröfu mótmælt af hálfu varnaraðila. Var þeim ágreiningi vísað til héraðsdóms og
var ágreiningurinn sameinaður fyrra máli.
Málsástæður
og lagarök sóknaraðila.
Sóknaraðili
byggir aðalkröfu sína á því að við kaupin á [...], sem keypt hafi verið fyrir 23.300.000
krónur þann 20. október 2000, hafi hún lagt fram í peningum 12.200.000 krónur. Það
fé hafi hún fengið fyrir 1,82% hlut sinn í [...], sem seldur hafi verið í
byrjun árs 1999 fyrir 680 milljónir króna. Eignarhluta þennan í [...] hafi
sóknaraðili fengið í arf frá móður sinni, F. Arfurinn hafi átt, samkvæmt
fyrirmælum arfleifanda, að verða séreign erfingja. Varnaraðili, sem sé
lögfræðingur, hafi veitt tengdamóður sinni lögfræðiþjónustu við arfleiðsluna og
hafi því þekkt þennan skýra og ótvíræða vilja tengdamóður sinnar um að arfur
til sóknaraðila skyldi verða séreign hennar. Varnaraðili, sem hafi fengið greidda
þóknun fyrir þessa lögfræðiþjónustu við tengdamóður sína, hafi hins vegar látið
undir höfuð leggjast að ganga frá arfleiðslunni með þeim hætti sem vilji arfleifanda
stóð til og honum hafi borið að fara eftir og tryggja að arfleiðslan væri í
samræmi við erfðalög. Þegar móðir sóknaraðila hafi komist að því að lögmaður
hennar og tengdasonur, sem hún hafði treyst fyrir ýmsum hagsmunum sínum öðrum,
hafði ekki gengið frá arfleiðslunni með þeim hætti, sem honum hafði borið að
gera, hafi hún á árinu 2005 látið ganga frá erfðaskrá, þar sem séreign
sóknaraðila hafi verið staðfest. Varnaraðili, sem hafði allt frá árinu 1996
þekkt fyrirmæli arfleiðanda varðandi arfinn til sóknaraðila, verði að teljast
bundinn af þeim á grundvelli 2. mgr. 37. gr. erfðalaga nr. 8/1962, beint eða
með lögjöfnun. Samkvæmt 2. mgr. 37. gr. beri að framkvæma erfðaskrárákvæði, sem
sannað sé að fyrir mistök eða misritun hafi orðið annars efnis en arfleifandi
vildi, í samræmi við vilja arfleifanda, ef auðið er að staðreyna
afleiðsluviljann. Óumdeilt sé að varnaraðili hafi veðsett [...], eftir sambúðarslit
2010, en fasteignin hafi þá nánast verið veðbandalaus og metin á 59,5 milljónir
króna. Að teknu veðláni hafi varnaraðili greitt sóknaraðila 24,4 milljónir
króna. Það fé hafi sóknaraðili notað til að kaupa [...]. Kaupverð [...], hafi
verið 30 milljónir króna, þar af hafi ríflega fimm milljónir verið yfirteknar
skuldir. Sóknaraðili hafi fengið fyrirframgreiddan arf árið 2010, sem hún hafi
notað til endurbóta á [...], auk þess sem hún hafi notað tekjur sínar til að
standa straum að kostnaði við þá eign. [...]sé því séreign sóknaraðila.
Sóknaraðili styður kröfur sínar
um skáskipti við það að helmingaskipti [...] og [...] séu ósanngjörn, þar sem
megineignarmyndun á hjúskapartímanum hafi orðið til vegna sölu sóknaraðila á
1,82% hlut í [...] sem sóknaraðili hafi erft eftir stofnun hjúskapar.
Sóknaraðili hafi því á hjúskpartíma aðila flutt í búið verulega miklu meira en
varnaraðili. Eingarhluturinn í [...] hafi átt að vera séreign sóknaraðila
og um það hafi varnaraðila verið kunnugt, þar sem hann hafi veitt arfleifanda
lögfræðiaðstoð við arfleiðsluna gegn gjaldi, en ekki farið að fyrirmælum hans.
Þremur árum eftir arfleiðsluna hafi sóknaraðili og aðrir eigendur [...] selt landið fyrir 680 milljónir
króna. Salan hafi skilað sóknaraðila um 12,2 milljónum nettó, þ.e. eftir
greiðslu alls kostnaðar. Óumdeilt sé að sóknaraðili hafi lagt fé þetta í kaup á
einbýlishúsinu að [...], sem keypt var 20. október 2000.
Kaupverð [...] hafi verið 23,3 milljónir.
Sóknaraðili byggir á því að fyrir
úrslit máls þessa skipti lengd hjúskapar aðila engu, þar sem í
lögskýringargögnum með gildandi hjúskparlögum komi fram sá vilji löggjafans að
rýmka skilyrði þess að heimila skáskipti við hjúskaparslit. Samkvæmt eldri
reglu, sem var að finna í 57. gr. laga nr. 60/1972, hafi verið heimilt að víkja
frá helmingaskiptareglu við hjúskaparslit, ef hjúskapur hafi staðið í stuttan
tíma og ekki leitt til fjárhagslegrar samstöðu. Löggjafinn taldi reglu þessa of
takmarkandi, og hafi því með 104. gr. hjúskaparlaga verið sett ákvæði um
heimild til að halda utan skipta arfi og gjafafé sem öðru hjóna félli í skaut
eftir hjúskaparstofnunina. Það hafi ekki verið ætlun löggjafans að tengja þessa
nýju reglu hinum gömlu skilyrðum 57. gr. laga nr. 60/1972 um fjárhagslega
samstöðu og lengd hjúskapar. Þvert á móti hafi tilgangur löggjafans verið að
rýmka ákvæðið, eins og tekið sé fram í greinargerð með frumvarpinu.
Sóknaraðili byggir á því að við
beitingu 104. gr hjúskaparlaga í máli þessu beri aðeins að líta til þess að
sóknaraðili hafi lagt fram 12,2 milljónir króna til kaupa á [...]. Fé þetta hafi verið
söluandvirði eignar sem hún hafði erft og sá arfur hefði átt að vera séreign
sóknaraðila, eins og varnaraðila hafi verið fullkunnugt um. Af síðastgreindu
leiði að bersýnilega sé ósanngjarnt gagnvart sóknaraðila að [...], komi til skipta með henni og
varnaraðila samkvæmt helmingaskiptareglu 103. gr. hjúskaparlaga. Sóknaraðili bendi á að 12,2 milljónir króna
hafi verið liðlega 67% af þeim rúmlega 18 milljónum króna, sem greiddar hafi
verið með peningum, öðru en lánsfé við kaupin á [...].
Sóknaraðili byggir á því að bæði
sé óeðlilegt og ósanngjarnt að varnaraðili hagnist á helmingaskiptum þegar svo
standi á sem í tilviki hennar og varnaraðila. Sóknaraðili byggir á því að ákvæði síðari málsliðar 1. mgr. 104. gr.
hjúskaparlaga hafi átt að ná til tilvika eins og þeirra sem mál þetta snúist
um.
Sóknaraðili bendir einnig á að
við úrlausn máls þessa verði líka að horfa til þess að varnaraðila hafði, sem
lögmanni arfleifanda, verið treyst fyrir því að ganga frá arfleiðslunni í
samræmi við þann vilja arfleifanda að arfurinn yrði séreign sóknaraðila.
Þá verði við úrlausn máls þessa
jafnframt að horfa til þess að móðir sóknaraðila hafði selt sóknaraðila og
varnaraðila fasteign sína að [...], við lágu verði árið 1998. Þessa
eign hafi þau selt á markaðsverði árið 2001 og hagnast verulega. Í raun hafi
verið í þessu fólginn stuðningur móður við dóttur. Eignamyndun í íbúðarhúsnæði
á hjúskapartíma aðila hafi því að stærstum hluta orðið til annars vegar vegna
arfs, sem féll sóknaraðila í skaut, og hins vegar vegna hagstæðra
fasteignaviðskipta við móður sóknaraðila.
Eins og kröfugerð sóknaraðila beri
með sér sé þess einungis krafist að eignir sem aflað var eftir sölu eignarhluta
sóknaraðila í [...], sem gerði aðilum kleift að eignast [...], verði haldið utan skipta. Ekki
er gerð samsvarandi krafa af hálfu sóknaraðila varðandi aðrar eignir sem aðilar
málsins eignuðst á meðan fjárhagsleg samstaða var með þeim og meðan hjúskapur
þeirra varði.
Sóknaraðili
gerir þá kröfu að námslán, sem varnaraðili tók til að standa straum af greiðslu
skólagjalda við tvo erlenda háskóla, komi ekki til frádráttar við skiptin.
Varnaraðili hafi stundað nám við [...] fyrir hjúskap, og árin [...] við [...].
Námslán varnaraðila séu því í þremur hlutum og sé höfuðstóll nýrri lána
ósnertur og vex með verðbótum og vöxtum þar til eldri lán séu uppgreidd.
Fjárhagur varnaraðila og sóknaraðila hafi í raun aldrei verið sameiginlegur og
þegar sóknaraðili hafi stundað nám í [...]hafi hún verið með fjölskylduna á framfæri
mestallan tímann.
Varnaraðili
hafi sótt nám í [...]ári síðar, þ.e. [...], og verið með fjölskylduna á
framfæri fyrstu fjóra mánuðina, en þá hafi sóknaraðili flutt með börnin til
Íslands. Námslán varnaraðila hafi því að litlu leyti verið til framfærslu
fjölskyldunnar. Meginþorri námslána varnaraðila felist í háum skólagjöldum hjá
London [...] annars vegar og [...] hins vegar. Námslán séu tekin til öflunar „verðmæta“
sem ekki komi til skipta við slit hjúskapar. Skuldir sem verði til vegna
öflunar „verðmæta“ sem ekki geta komið til skipta eigi ekki að draga frá
verðmæti annarra eigna viðkomandi aðila við fjárslit vegna skilnaðar. Þetta eigi
sérstaklega við um lán sem séu tekin vegna hárra skólagjalda. Fjárfesting
varnaraðila vegna þekkingar úr dýru námi hafi skilað sér til hans frá því að
sambúð lauk 2010 og hafi honum gengið vel frá þeim tíma með ráðgjafafyrirtæki
sitt og hefur sóknaraðili í engu notið þess. Sóknaraðili hafi ekki haft sömu
tækifæri til að afla jafn ríkulegra tekna. Það hljóti því að teljast
ósanngjarnt að há námslán, sérstaklega vegna dýrra skólagjalda, komi til
frádráttar hjúskapareign maka sem í engu fái notið þeirra verðmæta sem þau
skópu og ætti að meta þau á móti framlegð í starfi m.v. núverandi stöðu, enda
beint samhengi á milli verðmætaöflunar í dag og þeirrar fjárfestingar sem lagt
var upp með þegar námslánin voru tekin.
Sóknaraðili
krefst viðurkenningar á endurgjaldskröfu á hendur varnaraðila þar sem hann
hefur rýrt hjúskapareign sína með því m.a. að viðhalda ekki verðmæti [...],
eins og glöggt megi ráða af verðmati á eigninni, sem í dag sé verðmetin á
aðeins 62,1 milljón króna.
Um
lagarök vísar sóknaraðili m.a. til 99., 100., 101., 103., 1. og 2. mgr. 104. og
2. mgr. 107. gr. hjúskaparlaga nr. 31/1993, 37. gr. erfðalaga nr. 8/1962, beint
eða samkvæmt lögjöfnun. Um málskostnað er vísað til 129., sbr. 130., gr. laga
nr. 91/1991 um meðferð einkamála og varðandi virðisaukaskatt til laga nr.
50/1988.
Málsástæður
og lagarök varnaraðila.
Varnaraðili
krefst þess að öllum kröfum sóknaraðila verði hafnað. Varnaraðili krefst þess
að helmingaskiptum verði beitt við skipti á búi aðila miðað við eignir og
skuldir þegar sótt var um skilnað hjá sýslumanni þann [...]. Til vara er gerð
krafa um að helmingaskiptum verði beitt við skipti á búi aðila miðað við eignir
og skuldir þegar sótt var um skilnað hjá sýslumanni [...]með því fráviki að
varnaraðili yfirtaki öll hlutabréf í [...]. við fjárskiptin miðað við innborgað
hlutafé.
Jafnframt
gerir varnaraðili kröfu um málskostnað úr hendi sóknaraðila auk virðisaukaskatts.
Varnaraðili
hafnar öllum framkomnum kröfum sóknaraðila í málinu og vísar til meginreglna
6. og 103. gr. hjúskaparlaga um helmingaskipti, svo og þeirra reglna
skiptaréttarins sem snúa að fjárskiptum á búi við skilnað. Í XIV. kafla hjúskaparlaga
nr. 31/1993 sé ítarlega greint frá því með
hvaða hætti fjárskipti við skilnað skulu fara fram. Meðal annars sé ljóst að
miða skuli fjárskipti við eignir og skuldir aðila þann dag er fyrst var leitað
til sýslumanns vegna skilnaðar.
Kröfugerð
sóknaraðila sé enn fremur svo óskýr að erfitt er fyrir varnaraðila að átta sig
á henni og því hljóti að koma til skoðunar hjá dómara að vísa einstaka kröfum
frá dómi ex officio með vísan til 80. gr. laga um meðferð einkamála.
Kröfu
sóknaraðila um að aðallega verði viðurkennt að við fjárskipti sóknaraðila og
varnaraðila skuli teljast sem séreign sóknaraðila 52,36% fasteignarinnar [...],
og allt sem komið hefur í stað þess, þar með talin öll fasteignin að [...], sé
mótmælt. Rökin fyrir þessari kröfu séu þau að peningar fyrir þessum kaupum
hafi verið arfur sem hún hafi fengið og hafi skv. fyrirmælum arfláta átt að
vera séreign hennar í hjúskap.
Kröfu
sóknaraðila um að til vara sé þess krafist að við fjárslit aðila verði vikið
frá helmingaskiptareglu 103. gr. hjúskaparlaga samkvæmt ákvæðum 1. mgr. 104.
gr. hjúskaparlaga og sóknaraðila verði heimilað að taka að óskiptu eftirtaldar
eignir: a. 52,36% fasteignarinnar
[...], b. alla fasteingina að [...], sé mótmælt.
Kröfu
sóknaraðila um að til þrautavara sé þess krafist að við fjárslit aðila verði
vikið frá helmingaskiptareglu 103. gr. hjúskaparlaga samkvæmt ákvæðum 1. mgr.
104. gr. hjúskaparlaga og sóknaraðila verði heimilað að taka að óskiptu fasteignina
að [...], sé mótmælt.
Varnaraðili
kveður að framangreindar kröfur eigi ekki við nein rök að styðjast þar sem
forsenda þeirra allra sé arfur sem sóknaraðili hafi fengið greiddan fyrir fram
mörgum árum fyrir skilnað og eigi nú að standa utan skipta með einhverjum
hætti. Þessu sé hafnað, enda hafi umræddur arfur ekki verið kvaðabundinn
sem séreign sóknaraðila. Það sé rangt að við arfgerninginn 1996 hafi komið fram
vilji móður sóknaraðila um séreign.
Það
sé fyrst núna, um sex árum eftir að þau hjónin hafi óskað eftir skilnaði að
borði og sæng, um níu árum eftir að þau slitu samvistir og 23 árum eftir
umræddan fyrirframgreiddan arf, að sóknaraðili setur fram þá fullyrðingu eða
skoðun sína að varnaraðili hafi með einhverjum hætti vanrækt að bregðast við
meintri ósk móður sóknaraðila um að hinn fyrirframgreiddi arfur skyldi vera
séreign sóknaraðila. Varnaraðili sé furðulostinn yfir þessum málflutningi og
hafnar þessum ásökunum. Með sama hætti hafi
aldrei komið fram vilji hjá foreldrum varnaraðila að framlög þeirra til aðila
ættu að vera séreign, né hafi nokkru sinni komið fram vilji hjá aðilum sjálfum um
að einhver tiltekinn hluti eigna þeirra ætti að vera séreign.
Með
hliðsjón af þessu og því hvernig aðilar blönduðu saman fjárhag sínum allt
sambúðar- og hjúskapartímabil þeirra, 1993-2010, sé enginn vafi um að eignir þeirra
séu allt hjúskapareignir. Þarna hafi verið um að ræða árs sambúð (1993-94) og
síðan nítján ára hjónaband (1994-2013) þar til sótt var um skilnað að borði og
sæng. Á þessu samtals tveggja áratuga tímabili blönduðust fjármunir hjónanna
allt tímabilið 1993-2010, bæði vegna almennrar framfærslu fjölskyldunnar,
ferðalaga, kaupa á húsgögnum, greiðslu trygginga, svo og vegna margs konar
viðskipta á þessu langa tímabili. Þar megi nefna kaup á ýmsum hlutabréfum
og verðbréfum, kaup á bifreiðum, alls sex bílum, meðan á hjónabandinu stóð,
kaup á nokkrum fasteignum, auk hárra fjárhæða í afborganir lána allan þennan
tíma.
Sóknaraðili
byggi á því að meta eigi tiltekinn gerning fyrir 23 árum sem séreign hennar
og/eða að sanngirnisrök eigi að leiða til frávika frá helmingaskiptareglu henni
til handa. Þessu sé alfarið hafnað. Staðreyndin sé sú að allt sambúðartímabil
hjónanna
árin 1993-2010 hafi þau blandað fjárhag sínum saman og hafi ekki tilgreint
neinn hluta sem séreign. Það sé einnig rangt sem lögmaður sóknaraðila fullyrði
að óumdeilt sé að sóknaraðili
hafi lagt fram tilteknar 12,2 milljónir til kaupa á [...]. Á þessu langa
tímabili (þ.m.t. allt tímabilið 1999-2010) hafi hjónin stundað, eins og áður
sagði, margs konar viðskipti með fasteignir,
verðbréf, bíla o.s.frv. og höfðu engan aðskilnað á því hvað laun þeirra fóru í
og sérgreindu ekki með neinum hætti hver það var sem greiddi afborganir
lána eða greiddi upp há lán. Útilokað sé að rekja greiðslur eða
fjármálagerninga þeirra hjóna, hvort sem er 17 ár (1993-2010) eða 11 ár
(1999-2010) aftur í tímann, og slá því föstu að fyrirframgreiddur arfur upp á
u.þ.b. 900 þúsund árið 1996 liggi í dag óhreyfður eða lítt hreyfður sem miklu
meiri verðmæti í tiltekinni eða tilteknum
fasteignum.
Hið rétta sé að hjónin hafi bæði lagt fram margvísleg verðmæti og öll sín laun
í sameiginlegan
fjárhag sinn í hjónabandi sem stóð lengi yfir. Ekki séu fyrir hendi aðstæður
sem kalli á að víkja skuli frá helmingaskiptum.
Niðurstaða
þessa máls hljóti að vera sú að ekki sé tilefni til að verða við kröfum
sóknaraðila um séreign og ekki felst nein sanngirni í öðru en helmingaskiptum.
Sóknaraðili
krefst þess að við skipti aðila verði því hafnað að draga frá hjúskapareign
varnaraðila skuld hans við Lánasjóð íslenskra námsmanna eins og hún var [...],
eða aðra og lægri fjárhæð. Þessu sé hafnað, enda séu skuldir við LÍN hluti af
skuldum sem koma til skipta í hjúskap eins og hverjar aðrar skuldir og dragist
frá eignum maka eftir því sem segir í 100. gr. hjúskaparlaga nr. 31/1993. Þessi
krafa gangi því gegn ákvæði 100. gr. hjúskaparlaga.
Þar
sem helmingaskiptareglan sé meginregla við hjúskaparslit þurfi eitthvað til að
koma svo að hægt sé að víkja frá henni. Annaðhvort verði aðilar að hafa
sammælst um slíkt eða ákvæði hjúskaparlaga að heimila slík frávik. Ekkert slíkt
sé til staðar hér. Hvorki sé samkomulag
um skáskipti, kaupmáli til staðar né neitt tilefni vegna sanngirnissjónarmiða
fyrir dóminn að fallast á slíkt, hvorki með vísan til 102. gr. hjúskaparlaga né
104. gr. laganna.
Sóknaraðili
krefst þess að viðurkennd verði endurgjaldskrafa hennar á hendur sóknaraðila
samkvæmt 2. mgr. 107. gr. laga nr. 31/1993 vegna verðmætisrýrnunar [...], frá
því að varnaraðili fékk umráð eignarinnar árið 2010.
Varnaraðili
kveður þessa kröfu svo óljósa og óskýra að engin leið sé að átta sig á því
hvernig hægt sé að verða við henni. Sóknaraðili hefur ekki tiltekið hvaða
skortur á viðhaldi það er sem hún vísar þarna til né hefur hún tiltekið eða
rökstutt um hvaða fjárhæð er þarna að ræða. Því hlýtur að verða að vísa þessari
kröfu frá ex officio.
Varnaraðili
hefur allt frá sambúðarslitum 2010 verið í góðri trú um að fasteignin [...] kæmi
í hans hlut við fjárskiptin og að um það hafi verið samið munnlega milli aðila
strax árið 2010 og að fasteignin [...] kæmi í hlut sóknaraðila. Af þeim sökum hafi
varnaraðili ekki fylgst með ástandi eða mögulega nauðsynlegu viðhaldi á [...] og
geti því ekki á þessu stigi metið hvort eðlilegt sé að gera kröfu á sóknaraðila
vegna mögulega vanrækts viðhalds á þeirri fasteign. Af sömu ástæðu hefur varnaraðili
aldrei af fyrra bragði rætt mögulegt nauðsynlegt viðhald á fasteigninni [...]
við sóknaraðila. Því sé þess krafist að þessari kröfu sóknaraðila verði vísað
frá dómi.
Um
lagarök að öðru leyti en að framan er greint vísar varnaraðili til
hjúskaparlaga nr. 31/1993, einkum 6. og 103. gr., svo og XIV. kafla þeirra í
heild sinni svo og XIV. kafla laga um skipti á dánarbúum o.fl. nr. 20/1991. Um
málskostnað er vísað til laga um meðferð einkamála nr. 91/1991 svo og laga um
virðisaukaskatt nr. 50/1988.
Forsendur
og niðurstaða.
Sóknaraðili
máls þessa krefst þess að við opinber skipti til fjárslita milli aðila skuli
teljast til séreignar sóknaraðila 52,36% fasteignarinnar að [...] og allt það
sem hefur komið í stað hennar, þar með talin öll fasteignin að [...].
Þegar aðilar máls þessa gengu í hjúskap á
árinu 1994 giltu hjúskaparlög nr. 31/1993 um eignir þeirra. Enginn kaupmáli var
gerður um eignir þeirra og voru því eignir og skuldir sem þau færðu í búið
hjúskapareign þeirra. Þar á meðal var íbúðin að [...], sem þau höfðu keypt
árinu áður á 7.900.000 krónur. Var framlag þeirra 2.995.349 krónur auk þess að
yfirtaka áhvílandi lán að eftirstöðvum 4.904.651 króna. Á árinu 1996 greiddi
móðir stefnanda börnum sínum út fyrirframgreiddan arf og var hlutur stefnanda
802.909 krónur sem nam 1,82% eignarhluta í [...]. Engin gögn liggja fyrir um
það að sóknaraðili hafi látið þá fjármuni renna sérstaklega til
séreignarmyndunar eða aðilar hafi gert kaupmála þar um.
Þann 6. janúar 1998 fóru fram
makaskipti á íbúð aðila máls þessa og móður sóknaraðila þannig að sóknar- og
varnaraðili keyptu raðhúsið af móður sóknaraðila að [...] á 10.800.000 krónur
og móðir sóknaraðila keypti íbúðina við [...]. Engin gögn liggja fyrir í málinu
um hvert söluverð íbúðarinnar við [...] var og að hvaða leyti eign sóknar- og
varnaraðila í íbúðinni var sem greiðsla upp í raðhúsið. Sóknaraðili hefur
haldið því fram að raðhúsið hafi verið selt á undirverði en engin gögn hafa
verið lögð fram um verðgildi hússins á þeim tíma sem það var selt. Gegn
mótmælum varnaraðila verður að hafna þessari málsástæðu sóknaraðila.
Þann 19. janúar 1999 seldi
sóknaraðili 1,82% hluta sinn í [...] og var söluverð landsins 680.000.000
króna. Samkvæmt því hefur sóknaraðili fengið tæplega 12.400.000 krónur fyrir
sinn hlut.
Í október 2000 keyptu aðilar
einbýlishús að [...] fyrir 23.300.000 krónur. Þá seldu þau raðhús sitt við [...]
ogi í júlí 2001 fyrir 16.900.000krónur. Var nettóeign þeirra í [...] við söluna
8.649.274 krónur en nettóeign þeirra við kaupin á [...] 18.181.130 krónur. Í
öllum tilvikum voru bæði sóknar- og varnaraðili kaupendur eða seljendur að 50%
hluta þeirra fasteigna sem þau fjárfestu í.
Á framangreindu tímabili voru
bréfaskriftir á milli varnaraðila og lögmanns móður sóknaraðila svo og lögmanns
hennar um ýmis uppgjör vegna framangreindra viðskipta sem hún kom að. Þá er
óumdeilt að varnaraðili, sem er lögfræðingur, vann fyrir móður sóknaraðila við
gerð erfðafjárskýrslna, sölu á [...] og fleira á árunum 1996 til 1999.
Ekkert er í gögnum málsins á öllu
framangreindu tímabili um að fyrirframgreiddur arfur til sóknaraðila hafi átt
að vera séreign hennar. Þvert á móti verður ekki annað ráðið af gögnum málsins
en að sá arfur sem greiddur var út á þessu tímabili hafi farið inn í
sameiginlegan fjárhag aðila án þess að vera að neinu leyti sundurgreindur, s.s.
með auknum eignarhluta sóknaraðila í fasteignum sem þau keyptu. Þá var í
bréfaskriftum á milli lögmanna aðila aldrei minnst á að fyrirframgreiddur arfur
til sóknaraðila ætti að vera séreign hennar.
Sóknaraðili byggir kröfu sína um að
séreign hennar eigi að grundvallast á fyrirframgreiddum arfi frá móður hennar.
Byggir hún á því að varnaraðili, sem hafi verið lögfræðilegur ráðgjafi móður
hennar, hafi átt að setja séreignarkvöðina inn í erfðaskrá sem móðir hennar
gerði á árinu 1996. Varnaraðili hafi ekki farið að fyrirmælum móður sóknaraðila
þá, þar sem hann hafi látið undir höfuð leggjast að ganga frá erfðaskrá sem
kvæði á um að arfurinn og allt sem í stað hans kæmi skyldi vera séreign
sóknaraðila. Engin gögn hafa verið lögð fram þessu til staðfestu né erfðaskrá
frá árinu 1995 eða 1996. Þá byggir sóknaraðili á yfirlýsingu löggilts
endurskoðanda móður sóknaraðila frá 25. febrúar 2016 þar sem fram kemur að það
hafi verið vilji móður sóknaraðila þegar hún gerði erfðaskrá 1995 að þar kæmi
fram að allur arfur til skylduerfingja hennar, barna og barnabarna, yrði
séreign þeirra. Erfðaskrá frá árinu 1995 liggur ekki fyrir í málinu og hefur
tilvitnað skjal enga þýðingu við úrlausn máls þessa. Gegn mótmælum varnaraðila
er ósannað að hann hafi átt að setja í erfðaskrá móður sóknaraðila á árinu 1995
umþrætt séreignaákvæði.
Samkvæmt 77.
gr. hjúskaparlaga nr. 31/1993 skulu ákvarðanir um að arfur sé
séreign vera í erfðaskrá. Þann 2. september 2005 undirritaði móðir
sóknaraðila erfðaskrá þar sem fram kemur að allur arfur til skylduerfingja
hennar, barna og barnabarna skuli verða séreign þeirra. Var erfðaskráin vottuð
af tveimur arfleiðsluvottum svo og af lögbókanda.
Telur dómurinn að allt fram að þeim
tíma er erfðaskráin var undirrituð 2. september 2005 hafi það verið vilji
beggja aðila að eignir sem komu í bú þeirra hafi átt að vera hjúskapareign en
engin gögn bera það mér sér að fyrirframgreiddur arfur hafi átt að vera séreign
sóknaraðila. Gildir því 54. gr. laga nr. 31/1993 um þær eignir sem voru til í
búi aðila allt til 2. september 2005.
Eins
og rakið er að framan hefur sóknaraðili ekki sýnt fram á að framlag hennar við
eignamyndun á sambúðartímanum til 2. september 2005 hafi átt að vera séreign
hennar, hvorki samkvæmt erfðaskrá né samningi aðila. Þá getur erfðaskráin sem
móðir sóknaraðila undirritaði þann dag ekki haft afturvirk áhrif á réttarstöðu
aðila, hafi þeir ekki samið svo sérstaklega um sjálfir. Gegn mótmælum
varnaraðila verður ekki fallist á það með sóknaraðila að 52,63% hlutur
fasteignarinnar að [...] teljist til séreignar hennar við fjárslit á búi
þeirra. Að þeirri niðurstöðu fenginni verður ekki byggt á 75. gr. laga nr.
31/1993 um að verðmæti sem komi í stað séreignar,verði einnig séreign.
Sóknaraðili krefst þess til vara, ef
aðalkrafa hennar verður ekki tekin til greina, að við fjárskiptin verði 104.
gr. hjúskaparlaga beitt þannig að sóknaraðila verði heimilt að taka 52,6%
eignarinnar að [...] og alla fasteignina að [...]utan skipta.
Eins og rakið er að framan hefur
dómurinn komist að þeirri niðurstöðu að ósannað sé að sóknaraðili hafi lagt til
við kaup á [...] meiri fjármuni en varnaraðili eða að hlutur hennar við sölu á [...]
hafi farið til kaupa á fasteigninni.
Á
árinu 2010 ákváðu aðilar að slíta samvistir og festi sóknaraðili kaup á
fasteign að [...]. Var kaupverðið 30.000.000 króna. Tók varnaraðili lán að
fjárhæð 24.200.000 krónur í þeim tilgangi að greiða sóknaraðila helmingshlut
hennar í fasteign aðila að [...] sem varnaraðili bjó í en sóknaraðili flutti í [...].
Var lánið tryggt með veði í [...]. Í lok þess árs fékk sóknaraðili
fyrirframgreiddan arf að fjárhæð 1.000.000 króna sem hún kveðst hafa nýtt í
viðhald á [...] og endurbætur. Því hefur ekki verið haldið fram að sóknaraðili
standi straum af afborgunum vegna lántöku við kaup á [...].
Samkvæmt
53. gr. hjúskaparlaga nr. 31/1993 skiptast eignir hjóna í hjúskapareignir og
séreignir sem geta verið samningsbundnar eða lögmæltar. Samkvæmt 54. gr. s.l.
verður eign maka hjúskapareign nema sérstakar heimildir standi til annars. Á
þetta við um eignir sem maki flytur í búið við hjúskaparstofnun eða öðlast
síðar og gegnir einu með hverjum hætti eignar er aflað að lögum. í 55. gr. s.l.
segir að séreign geti myndast með kaupmála hjóna eða hjónaefna, sbr. 74., 75.
og 76. gr., eða fyrir ákvörðun gefanda eða arfleiðanda, sbr. 77. gr. Þá geti
séreign verið lögmælt, sbr. 94. gr. svo og ákvæði annarra laga þar um. Í 77.
gr. s.l. segir að gefandi eða arfleiðandi geti ákveðið að gjöf eða arfur, þar á
meðal skylduarfur, skuli vera séreign í hjúskap gjafþega eða erfingja með því
efni er greinir í 74. gr. Í 75. gr. s.l. segir að verðmæti, sem komi í stað
séreignar, verði einnig séreign, svo og arður af þessum verðmætum, nema annars
sé getið í kaupmála eða í fyrirmælum gefanda eða arfleifanda.
Í 104. gr. laga nr. 31/1993 segir að
víkja megi frá reglum um helmingaskipti og ákvæðum um skipti á séreign ef
skipti yrðu að öðrum kosti bersýnilega ósanngjörn fyrir annað hjóna. Eigi þetta
einkum við þegar tekið sé tillit til fjárhags hjónanna og lengdar hjúskapar,
svo og ef annað hjóna hefur flutt í búið verulega miklu meira en hitt við
hjúskapastofnun eða hefur síðar erft fé eða fengið það að gjöf frá öðrum en
maka sínum.
Aðilar skildu að borði og sæng á
árinu 2013. Eins og rakið er að framan hefur sóknaraðili ekki sýnt fram á að
fasteignin að [...] hafi verið fjármögnuð af henni umfram varnaraðila.
Ágreiningslaust er að varnaraðili fjármagnaði með lántöku stærsta hluta
eignarinnar [...]. Ekkert hefur komið fram í málinu um að sanngirni mæli með
því að vikið verði frá helmingaskiptareglu hjúskaparlaga og skáskiptum beitt
varðandi þessar eignir búsins. Gegn mótmælum varnaraðila verður þessari kröfu
sóknaraðila því hafnað.
Til
þrautavara krefst sóknaraðili þess að við fjárslit aðila verði vikið frá
helmingaskiptareglu 103. gr. hjúskaparlaga samkvæmt ákvæðum 1. mgr. 104. gr.
hjúskaparlaga og sóknaraðila verði heimilað að taka að óskiptu fasteignina að [...].
Að
fenginni niðurstöðu í aðal- og varakröfu sóknaraðila hefur sóknaraðili ekki
sýnt fram á að hún hafi fjármagnað umrædda fasteign umfram varnaraðila og að
regla 103. gr. hjúskaparlaga eigi ekki við þannig að beita eigi 1. mgr. 104.
s.l. við fjárskipti þeirra í millum. Þar segir að víkja megi frá reglum um
helmingaskipti og ákvæðum um skipti á séreign ef skipti yrðu að öðrum kosti
bersýnilega ósanngjörn fyrir annað hjóna. Eigi þetta einkum við þegar tekið sé
tillit til fjárhags hjónanna og lengdar hjúskapar, svo og ef annað hjóna hefur
flutt í búið verulega miklu meira en hitt við hjúskaparstofnun eða hefur síðar
erft fé eða fengið það að gjöf frá öðrum en maka sínum.
Samkvæmt
gögnum málsins og skattframtölum aðila fyrir árin 2009 til 2015 hafa tekjur
aðila verið sambærilegar. Þá fóru báðir aðilar í framhaldsnám og menntuðu sig.
Nokkrar eignir eru til í búi aðila en aðilar voru gift í 19 ár. Á þeim tíma
myndaðist fjárhagsleg samstaða milli þeirra og hefur ekki verið sýnt fram á það
að sóknaraðili hafi flutt í búið verulega miklu meiri eignir eða fé en
varnaraðili við hjúskaparstofnun eða síðar erft fé eða fengið það að gjöf frá
öðrum en maka sínum sem máli skiptir við fjárhagsuppgjör aðila. Sá
fyrirframgreiddi arfur sem sóknaraðila hefur tæmst á sambúðartímanum, samkvæmt
gögnum málsins, er 802.909 krónur eða 1,82% í [...] 18. mars 1996. Engin gögn
staðfesta það þó sérstaklega utan viljayfirlýsing arfleifanda í
erfðafjárskýrslunni um að það sé hluti hennar í landinu. Þá fékk sóknaraðili
1.000.000 króna 30. desember 2010. Verður ekki talið að um sé að ræða verulega
mikið fé í ljósi eignastöðu aðila við
sambúðarslit og skilnað að borði og sæng. Þá er fullyrt af varnaraðila að
foreldrar hans hafi styrkt aðila við fyrstu íbúðarkaupin en engin gögn eru því
til staðfestu frekar en ákvörðun um séreignir sóknaraðila. Verður þessari
málsástæðu sóknaraðila því hafnað. Telur dómurinn sóknaraðila ekki hafa sýnt
fram á að skilyrði 104. gr. hjúskaparlaga séu uppfyllt svo og að sanngirnisrök
mæli með því að [...] sé haldið utan skipta.
Sóknaraðili
krefst þess að við skipti aðila verði því hafnað að draga frá hjúskapareign
varnaraðila skuld hans við Lánasjóð íslenskra námsmanna eins og hún var 4. mars
2013, eða aðra og lægri fjárhæð. Ekkert í gögnum málsins sýnir um hvaða
námsskuldir er að ræða. Einu gögnin sem staðfesta að skuldir við Lánasjóð
íslenskra námsmanna séu fyrir hendi eru skattframtöl aðila. Á skattframtali
aðila fyrir tekjuárið 2013 kemur fram að eftirstöðvar skuldar við LÍN vegna
skuldabréfs nr. [...] séu 5.867.917 krónur. Eftirstöðvar skuldar við LÍN vegna
skuldabréfs nr. [...] séu 1.923.718 krónur og skuld við LÍN, skuldabréf nr. [...],
sé að eftirstöðvum 5.703.269 krónur. Engin frekari gögn styðja þessa kröfu
sóknaraðila og er hún í andstöðu við 80. gr. laga nr. 91/1991. Er krafan svo
vanreifuð að vísa ber henni frá dómi ex officio.
Að
lokum krefst sóknaraðili þess að viðurkennd verði endurgjaldskrafa hennar á
hendur varnaraðila samkvæmt 2. mgr. 107. gr. laga nr. 31/1993 vegna rýrnunar
verðmætis [...], frá því að varnaraðili fékk umráð eignarinnar árið 2010.
Þessari kröfu er hafnað af hálfu varnaraðila.
Í
gögnum málsins liggur fyrir söluyfirlit vegna [...] frá 23. október 2009. Var
áætlað markaðsverð eignarinnar 59.500.000 krónur, brunabótamat 48.850.000
krónur og fasteignamat samtals 48.200.000 krónur. Þá liggur fyrir verðmat vegna
sömu eignar frá 9. maí 2016. Var söluandvirði hússins þá sagt 62.100.000
krónur. Brunabótamat 59.350.000 krónur og fasteignamat samtals 59.850.000
krónur. Engin önnur gögn hafa verið lögð fram í máli þessu sem
endurgjaldskrafan getur grundvallast á. Er krafan því ódómtæk og ber að vísa
henni frá dómi ex officio.
Í
síðari ágreiningi aðila sem barst dóminum þann 11. janúar sl. var ágreiningur
um það hvort víkja eigi frá helmingaskiptareglu 103. gr. hjúskaparlaga nr.
31/1993 með heimild í 1. mgr. 104 gr. sömu laga og sóknaraðila heimilað að taka
að óskiptu 52,6% fasteignarinnar [...] og alla fasteignina að [...].
Er
krafa þessi byggð á sömu forsendum og varakrafa í fyrri ágreiningi aðila, þ.e.
að byggja eigi á því að sóknaraðili hafi lagt fram séreign sína, 12,2 milljónir
króna, til kaupa á [...]. Er krafa þessi efnislega sú sama og varakrafa
sóknaraðila í aðalkröfu. Er vísað til fyrri rökstuðnings við úrlausn þeirrar
kröfu.
Samkvæmt
öllu framangreindu virtu er öllum kröfum sóknaraðila hafnað utan þeirra sem
vísað er frá dómi.
Samkvæmt
framangreindu er það niðurstaða dómsins að um skipti á búi aðila skuli fara
eftir helmingaskiptareglu 103. gr. hjúskaparlaga nr. 31/1993 samkvæmt kröfu
varnaraðila.
Að
þessum niðurstöðum fengnum ber sóknaraðila að greiða varnaraðila málskostnað
sem þykir hæfilega ákveðinn 400.000 krónur.
Ástríður
Grímsdóttir héraðsdómari kveður upp
úrskurðinn.
Úrskurðarorð:
Kröfu
sóknaraðila um að viðkennt verði, við fjárskipti sóknar- og varnaraðila, að 52,36%
fasteignarinnar að [...] og allt sem komið hefur í stað eignarinnar, þar með
talin öll fasteignin að [...], skuli vera séreign sóknaraðila, er hafnað.
Kröfu
sóknaraðila um að við fjárslit aðila verði vikið frá helmingaskiptareglu 103.
gr. hjúskaparlaga og sóknaraðila verði heimilað að taka að óskiptu 52,36%
fasteignarinnar [...], og alla fasteignina að [...], samkvæmt ákvæðum 1. mgr.
104. gr. hjúskaparlaga utan skipta, er hafnað.
Kröfu
sóknaraðila um að vikið verði frá helmingaskiptareglu 103. gr. hjúskaparlaga og
sóknaraðila verði heimilt að taka að óskiptu fasteignina að [...] er hafnað.
Kröfu
sóknaraðila um að skuld varnaraðila við Lánasjóð íslenskra námsmanna, eða lægri
fjárhæð, verði ekki dregin frá hjúskapareign aðila við fjárskipti þeirra er
vísað frá dómi.
Kröfu
sóknaraðila um að viðurkennd verði endurgjaldskrafa hennar á hendur varnaraðila
skv. 2. mgr. 107. gr. laga nr. 31/1993 er vísað frá dómi.
Sóknaraðili greiði varnaraðila 400.000 krónur í
málskostnað.