- Húsfélag
- Lögveð
- Skuldamál
D Ó M U R
Héraðsdóms Reykjavíkur 12. febrúar 2019 í máli nr. E-226/2018:
Hraunbær 156,húsfélag
(Auður Björg Jónsdóttir hrl.)
gegn
Valgerði Laufeyju Einarsdóttur
(Ólafur Kjartansson hdl.)
Mál þetta, sem var dómtekið 5. febrúar sl.,
er höfðað fyrir Héraðsdómi Reykjavíkur af Húsfélaginu Hraunbæ 156, Hraunbæ 156,
Reykjavík, á hendur Valgerði Laufeyju
Einarsdóttur, Hraunbæ 156, Reykjavík, með stefnu birtri 19. janúar 2018.
Stefnandi krefst þess að stefnda verði dæmd
til að greiða 985.918 kr. ásamt dráttarvöxtum skv. 1. mgr. 6. gr. vaxtalaga nr.
38/2001, af 212.170 kr. frá 30.3.2017 til 28.4.2017, af 363.720 kr. frá
28.4.2017 til 31.5.2017, af 556.269 kr. frá 31.5.2017 til 3.7.2017, af 748.818
kr. frá 3.7.2017 til 1.8.2017, af 911.767 kr. frá 1.8.2017 til 1.9.2017 af
985.918 kr. frá 1.9.2017 til greiðsludags, sbr. 9. gr. laganna.
Þá er stefndu stefnt til að þola staðfestingu
á lögveðsrétti í eignarhluta sínum að Hraunbæ 156, íbúð 0201 með fnr. 204-5194,
til tryggingar ofangreindri kröfu, sbr. 48. gr. fjöleignarhúsalaga, nr. 24/1994.
Þá er krafist málskostnaðar úr hendi stefndu.
Stefnda krefst aðallega sýknu af kröfum
stefnanda, en til vara að kröfur verði lækkaðar. Þá er krafist málskostnaðar úr
hendi stefnanda.
Í upphafi krafðist stefnda frávísunar
málsins. Þeirri kröfu var hafnað með úrskurði 17. apríl 2018.
I
Hraunbær 152-156 er þriggja stigaganga hús
sem er hluti af húsalengjunni Hraunbæ 152-174. Stefnandi er húsfélag Hraunbæ
156 og stefnda á íbúð í eigninni. Komið var að viðgerðum hússins og var aflað
tilboða í viðgerðirnar. Á húsfundi 21. janúar 2016 var samþykkt að ganga að
tilboði Búa Kristjánssonar f.h. MEA ehf. að hámarki 60 milljóna króna fyrir
húsfélagið 152-156. Stefnda var á húsfundinum og samþykkti tilboðið.
Hinn 23. febrúar 2016 var haldinn annar
húsfundur. Var verksamningurinn við Búa Kristjánsson lesinn upp. Stefnda var
viðstödd fundinn og bókað er að hún hafi viljað fá upplýsingar um hvort
nauðsynlegt væri að skipta út glerjum. Samningurinn var samþykktur með öllum
greiddum atkvæðum, en ósk kom fram um að hitta verktakann og fara nánar yfir
kostnaðinn.
Á húsfundi húsfélagsins að Hraunbæ 152-174,
sem haldinn var 12. apríl 2016, var samþykktur samningurinn við MEA ehf. um
framkvæmdir á Hraunbæ 152-156, með því skilyrði að eigendur Hraunbæjar 158-174
bæru ekki kostnað vegna þeirra. Einnig var samþykkt að hver stigagangur fyrir
sig væri ábyrgur fyrir sínu viðhaldi. Stefnda var á þessum húsfundi og
samþykkti tillögurnar.
Hinn 19. apríl 2016 var síðan undirritaður
verksamningur milli stefnanda, Hraunbæjar 152 og 154 annars vegar og MEA ehf.
Hlutur stefnanda í verkinu var 3.551.951 kr. Greiddi stefnda fyrstu átta
greiðslurnar, það er til og með 1. mars 2017. Sex greiðslur eru hins vegar ekki
í skilum. Hinn 7. júní 2017 sendir stefnandi stefnda innheimtubréf. Hinn 30. júní
2017 mótmælti stefnda innheimtu reikninga vegna verksins, m.a. á þeim forsendum
að ekki lægi fyrir fullgild samþykkt húsfundar. Þá hefðu reikningar ekki verið
sundurliðaðir eins og hún hafi óskað eftir. Einnig hefði hún ekki hug á því að
skipta um gler í íbúð sinni en glerið sé séreign hennar. Hinn 10. júlí 2017
svaraði stefnandi og hafnaði athugasemdum stefndu.
Stefnda aflaði álits Erlings Magnússonar,
lögfræðings og húsasmíðameistara, og í minnisblaði hans frá 20. september 2017
taldi hann viðgerð ábótavant og að fúi hefði ekki verið fjarlægður.
Hinn 18. október 2018 fór stefnda fram á
dómkvaðningu matsmanns til að meta hvort fúi hefði verið fjarlægður úr
gluggakörmum húsanna Hraunbæ 152-156, Reykjavík og ef ekki, til hvaða aðgerða
þyrfti að grípa svo að það yrði gert með fullnægjandi hætti. Til verksins var
dómkvaddur Hjalti Sigmundsson, byggingartæknifræðingur og húsasmíðameistari.
Skrifleg svör hans eru frá 29. nóvember 2018 og gerði hann nánari grein fyrir
mati sínu fyrir dómi 7. desember sl. Við mat sitt tók Hjalti prufur á nokkrum
stöðum og taldi hann að í einhverjum tilfellum væri um fúa að ræða í körmum. Þá
gaf hann leiðbeiningar um það hvernig laga ætti þá lista þar sem fúa var að
finna.
II
Krafa stefnanda byggist á því að verkframkvæmd sú er um ræðir hafi
verið samþykkt á löglega boðuðum húsfundi með samþykki allra, þ. á m. stefndu.
Ákvæði 43. gr. fjöleignarhúsalaga, nr. 26/1994, kveði á um að viðhald og
viðgerðir á sameign sé kostnaður sem sé sameiginlegur og honum skuli skv. a lið
45. gr. laganna skipt á eigendur eftir hlutfallstölu eignarhluta í sameign.
Þetta sé óumdeilt.
Ágreiningur sé um hvort greiðsluskylda stefndu falli niður þar sem hún
hafi ekki samþykkt að skipta um gler í gluggum sínum. Telur stefnandi svo ekki
vera, enda hafi skýrt komið fram í verksamningi, sem hún samþykkti, og rætt var
sérstaklega um það á húsfundum, að skipt yrði um allt gler í húsinu. Þá sé
þetta hluti af samþykktri framkvæmd og, með hliðsjón af hagsmunum allra,
hagkvæmasta leiðin. Stefnandi telur að þessi afstaða stefndu hafi leitt til
stóraukins kostnaðar og tafa á verkinu.
Þá sé ágreiningur um hvort stefnda eigi sérstakan stöðvunarrétt sem hún
geti beitt gagnvart stefnanda vegna ætlaðra galla á téðu verki. Stjórn
stefnanda fór yfir athugasemdir stefnda með verktaka og getur ekki séð að um
galla á verkinu hafi verið að ræða, en hluta verksins sé ólokið. Þess utan
telur stefnandi að stefndi geti ekki beitt stöðvunarrétti gagnvart húsfélaginu.
Stefnda hefur neitað að greiða sinn hlut í
framkvæmdum. Fyrst á þeim grunni að gler í gluggum hennar sé séreign hennar og
að hún hafi ekki samþykkt að skipt yrði um það. Síðar á þeim grunni að verktaki
hafi ekki unnið verkið fagmannlega og hún beiti því „stöðvunarrétti sínum“.
Stefnandi hefur greitt verktaka greiðslur í
samræmi við verksamning. Stefnda hefur staðið skil á þeim sjö greiðslum sem
fram fóru árið 2016 og fyrstu greiðsluna árið 2017. Krafa stefnanda sé að
fjárhæð 985.918 kr. og sundurliðast með eftirfarandi hætti:
Nr. Útgáfudagur Gjalddagi Fjárhæð
1. 1.3.2017 30.3.2017 212.170,00
2. 2.
4.2017 28.4.2017 151.550,00
3. 3.5.2017 31.5.2017 192.549,00
4. 1.6.2017 3.7.2017 192.549,00
5. 1.7.2017 1.8.2017 162.949,00
6. 1.8.2017 1.9.2017
74.151,00
Staðfestingarkrafa stefnanda byggist á 48. gr. fjöleignarhúsalaga, sem
kveður á um að greiði eigandi ekki hlutdeild sína í sameiginlegum kostnaði
eignist húsfélagið lögveð í eignarhluta hans til tryggingar kröfunni.
Krafist sé dráttarvaxta skv. 1. mgr. 6. gr. vaxtalaga, nr. 38/2001, frá
eindaga hverrar kröfu til greiðsludags, sbr. 9. gr. laganna.
III
Sýknukrafa stefnda byggist í fyrsta lagi á því, að stefnandi sé ekki
réttur eigandi kröfunnar. Í stefnu sé á því byggt að verksamningur hafi verið
gerður á grundvelli samþykktar Húsfélagsins Hraunbæ 152-174, hinn 12. apríl
2016. Stefnandi sé Húsfélagið Hraunbæ 156. Stefnandi hafi ekki sýnt fram á að
hann sé réttmætur eigandi kröfunnar og beri að sýkna stefndu.
Í öðru lagi sé byggt á því, að ekki liggi fyrir fullnægjandi samþykkt
lögmæts húsfundar. Á húsfundi 12. apríl hafi verið mættir eigendur 27 íbúða.
Alls séu 88 eignarhlutar í fjölbýlishúsinu Hraunbæ 152-174. Skv. 2. mgr. 42.
gr. fjöleignarhúsalaga sé áskilið að við samþykkt framkvæmda þurfi a.m.k.
helmingur eigenda, bæði eftir höfðatölu og eignarhlutum að sækja fundinn. Ekki
hafi verið haldinn framhaldsfundur eins og áskilið sé í 3. mgr. 42. gr.
laganna. Samþykktin sem stefnandi byggir á sé því ekki lögmæt.
Í þriðja lagi sé krafist sýknu á þeim
grundvelli að sameiginlegur kostnaður hafi þegar verið greiddur. Kostnaður
vegna framkvæmdanna hafi þegar verið greiddur úr hússjóði. Stefnandi eigi því ekki
kröfu á hendur stefndu á þeim grunni sem hann leggur að málinu.
Verði ekki fallist á ofangreint sé á því byggt, að greiðsluskylda vegna
sameiginlegs kostnaðar stofnist einvörðungu þegar húsfélagið greiðir þann
kostnað með réttu. Samþykki húsfundar var fyrir því að gerður yrði gagnkvæmur
verksamningur um utanhússframkvæmdir, þ.e. að greitt yrði fyrir unnar
framkvæmdir. Verkframkvæmdum sé ekki lokið þrátt fyrir að áætluð verklok hafi
verið haustið 2017. Greiðsluskylda stefndu geti ekki náð til kostnaðar sem
húsfélagið stofni til umfram skyldu, einvörðungu til kostnaðar vegna framkvæmda
skv. samningi. Þar að auki séu verk illa unnin en húsfélagið hafi ekki brugðist
við; eigendum til tjóns. Stefnandi ber sönnunarbyrði fyrir því að verkið hafi
verið unnið á faglega fullnægjandi hátt og að stofnað hafi verið til
sameignlegs kostnaðar í samræmi við samning og samþykkt húsfundar. Samþykki
eigenda náði ekki til þess að greiða verktakanum án efnda af hans hálfu.
Stefnandi hafi ekki sýnt fram á að greiðsluskylda sé fyrir hendi.
Varðandi fjárhæð kröfunnar byggir stefnda á því, að stefnandi hafi ekki
sýnt fram á að hún sé rétt. Krafan byggir á verksamningi að fjárhæð 60.000.000
kr. Stefnda sé krafin um 985.918 kr. Stefnandi hafi ekki sýnt fram á að krafan
sé rétt reiknuð, en vísar eingöngu til þess að kostnaður vegna viðhalds
skiptist eftir hlutfalli eignarhluta í sameign. Engir útreikningar fylgi og
engar sönnur á fjárhæð.
Þá liggi fyrir að hluti kostnaðar sé vegna séreignar stefndu og annarra
eigenda. Stefnandi hafi ekki lagt fram nein gögn vegna kostnaðar við þann
verkþátt. Stefnda hefur hafnað að skipta um gler hjá sér og henni verði ekki
gert að greiða kostnað vegna séreignarhluta annarra eigenda. Þá sé einnig um að
ræða framkvæmdir á innra byrði svala og aðrar framkvæmdir á þeim hlutum hússins
sem sé í séreign. Stefndu verði ekki gert að greiða kostnað vegna annarra
séreignarhluta. Stefnandi hefur ekki fært sönnur á réttmæti fjárhæðarinnar og
stefnda byggir á að ef þetta leiðir ekki til frávísunar málsins leiði það til
sýknu en til vara lækkunar kröfu stefnanda.
Um kröfu stefnanda um lögveð byggir stefnda á því, að þar sem sýkna
beri hana af greiðslukröfu stefnanda beri enn fremur að sýkna hana af kröfu um
staðfestingu lögveðsréttar. Stefnandi geti ekki átt lögveðsrétt í eign stefndu
fyrir umkrafinni fjárhæð. Stefnandi hefur ekki fært sönnur á, að um sé að ræða
sameiginlegan kostnað og beri að sýkna stefndu af kröfunni.
Þá telur stefnda að í ljósi atvika málsins og þess að stefnandi hafi
hvorki sýnt fram á að hann sé réttmætur kröfuhafi eða að umkrafin fjárhæð sé
réttmæt, beri að miða upphafstíma dráttarvaxta við dómsuppsögu, sbr.
lokamálslið 9. gr. laga um vexti og verðtryggingu nr. 38/2001.
IV
Óumdeilt er í málinu að tími var kominn á
viðhald á fasteigninni að Hraunbæ 156 og ýmsar utanhússframkvæmdir voru
nauðsynlegar. Í upphafi árs 2016 hafi stefnandi fengið tvö tilboð vegna þessa.
Hinn 21. janúar 2016 var aðalfundur stefnanda haldinn. Í fundargerð segir:
„Ákvörðunartaka vegna framkvæmda. Tilboð Búa Kristjánssonar rætt. Það hafa
allir fengið og móttekið upplýsingar um áætlaðan kostnað og verkáætlun Búa.“ Þá
var einnig kynnt tilboð frá öðrum aðila. Það var lægra en tilboð Búa, sem gerði
tilboðið í nafni MEA ehf. Tilboðin voru skoðuð og borin saman. Síðan segir í fundargerðinni:
„Allir mættir samþykkja að ganga að tilboði Búa Kristjánssonar að hámarki 60
mkr. fyrir húsfélagið nr. 152-156.“ Stefnda var viðstödd aðalfundinn og
samþykkti eins og aðrir íbúðareigendur að taka tilboði Búa Kristjánssonar.
Aukahúsfundur var haldinn 9. febrúar 2016. Í
fundargerð þess fundar kom fram að Búi Kristjánsson væri þar mættur til að
kynna fyrirhugaðar framkvæmdir. Íbúar hefðu fengið afhenta spurningarlista um
ástand sinna íbúða. Lagði hann til að gler þriggja ára og eldra yrði skipt út.
Þá kom fram að til að skoða ástand glugganna yrði að taka glerið úr. Markmiðið
var að gera húsið vatn- og vindhelt. Stefnda var ekki mætt á þennan fund. Fyrir
dómi kom fram hjá Bryndísi Guðrúnu Knútsdóttir, sem sat í hússtjórn stefnanda,
að stefnda hefði fengið ofangreindan spurningalista en ekki svarað honum.
Á húsfundi 23. febrúar 2016 var
verksamningurinn við Búa Kristjánsson lesinn upp. Stefnda var viðstödd fundinn.
Þar er bókað að stefnda hafi viljað fá upplýsingar um hvort nauðsynlegt væri að
skipta út glerjum. Í engu er getið hvaða upplýsingar stefnda fékk vegna þessa.
Hins vegar var samningurinn samþykktur með öllum greiddum atkvæðum. Stefnda
samþykkti samninginn án fyrirvara af sinni hálfu.
Hinn 12. apríl 2016 var haldinn húsfundur
Hraunbæjar 152-174 í stigagangi nr. 156 við Hraunbæ. Fyrir fundinum lá tillaga
um að samþykkja samning frá MEA ehf. um framkvæmdir á Hraunbæ 152-156 með því
skilyrði að húsfélög og eigendur Hraunbæjar 158-174 bæru ekki kostnað vegna
þeirra. Þá lá fyrir tillaga um að hver stigagangur væri ábyrgur fyrir sínu
viðhaldi, sbr. það viðhald sem færi fram á Hraunbæ 152-156. Á þessum fundi var
Búi Kristjánsson einnig mættur til að svara fyrirspurnum. Báðar tillögurnar
voru samþykktar og bókað að allir viðstaddir væru sammála um að nú og í
framtíðinni bæri hver stigagangur ábyrgð á sínu viðhaldi. Stefnda var á
fundinum og samþykkti tillögurnar.
Af gögnum málsins verður ekki annað ráðið en
um lögmætan fund hinn 12. apríl 2016 hafi verið að ræða. Samkvæmt 42. gr. laga
um fjöleignarhús þarf helmingur eigenda að mæta á fundinn. Alls voru 16 mættir
vegna 24 eignarhluta í Hraunbæ 152-156. Vegna eignarhluta í Hraunbæ 158-174 var
mætt, en einn frá hverju húsfélagi kom með umboð frá hinum eigendum. Voru því
mættir 88 fulltrúar af 96. Því er hafnað þeirri málsástæðu stefndu að ekki
liggi fyrir samþykki lögmæts húsfundar.
Þá mótmælir stefnandi, sem of seint komnum,
málsástæðum stefndu er fram komu við aðalmeðferð málsins, um að óheimilt hafi
verið að taka ákvörðun á húsfundi 12. apríl 2016 um að Hraunbær 158-174 tæki
ekki þátt í kostnaði vegna framkvæmdanna og að samþykkt húsfundar 12. apríl
2016 hefði verið ólögmæt af annarri ástæðu en að fundarsókn hafi ekki verið
næg. Með vísan til 5. mgr. 101. gr. laga nr. 91/1991 eru málsástæður þessar of
seint fram komnar og verða þær því ekki teknar til greina.
Verksamningurinn milli stefnanda, Hraunbæjar
152 og Hraunbæjar 154, og Búa Kristjánssonar, f.h. MEA ehf., var undirritaður
19. apríl 2016. Þannig er samið að verktaki tók að sér nánar tilgreinda verkþætti,
meðal annars viðgerðir á gluggum, gluggakömrum og endurnýjun gluggalista,
samanber 2. gr. samningsins. Í 4. gr. samningsins er síðan verklýsing á því
hvað gera eigi. Varðandi glugga segir að þeir séu almennt í mjög misjöfnu
ástandi þó aðallega vegna skorts á viðhaldi. Glerið sé á mjög ólíkum aldri.
Víða sé slæmt ástand á gluggalistum, gler sé laust og það leki með því eða
póstum eða botnstykkjum. Þá er tekið fram að nauðsynlegt sé í fjölbýlum að
viðgerðir séu almennt á sama tíma svo að þær verði ekki til langs tíma of
kostnaðarsamar fyrir eigendur. Því verði öllu gleri skipt út alls staðar og
sama gerð af rúðum sett í alls staðar til að allt húsið komist á sama
viðhaldsstigið. Þá verði gert við gluggapósta og karma. Síðan er því lýst í
greininni, hvað eigi nákvæmlega að gera. Sem dæmi má nefna, að hreinsa skuli
kítti og endurnýja það kringum gluggakarma og við það eigi að notast við Sida
-11FC+. Einnig að taka allan fúa úr gluggakömrum og splæsa með nýju timbri þar
sem við á. Líma með SíkaBond -545 og notast við viðurkennt timbur úr BYKO.
Svipaðar lýsingar er að finna varðandi þakviðgerðina og viðgerðina á útveggjum.
Í 9. gr. er kveðið á um endurgjald fyrir verkið. Ekki var það sundurgreint á
einstaka framkvæmdaliði, heldur var samið svo að stefnandi skyldi greiða
60.000.000 kr. Samkvæmt 10. gr. skuli greiðslur fara fram á tímabilinu apríl
2016 til og með 1. september 2017.
Með vísan til þess er að framan greinir
samþykkti stefnda tilboð MEA ehf. í viðgerð hússins og verksamning þann sem
gerður var milli stefnanda og verktaka. Hún hefur því veitt samþykki sitt fyrir
framkvæmdum þeim sem ráðist var í að Hraunbæ 156. Þetta gerði hún án fyrirvara
og er bundin af þeim samningi sem gerður var við Búa Kristjánsson fyrir hönd
MEA ehf. hinn 19. apríl 2016. Stefnandi gerði verksamning sem hljóðaði bæði upp
á viðgerðir á sameign og séreign gegn greiðslu 60 millj.kr. Því er ekki unnt að
byggja á því af hálfu stefndu, að kostnaður vegna sameignar hafi þegar verið
greiddur af stefnanda og því eigi að sýkna stefndu. Þá var einnig samið þannig
að verktakinn myndi krefjast greiðslu fyrir verkið í ósundurliðaðri fjárhæð, en
ekki greiðslu vegna hvers verkþáttar, til dæmis glugga/glers, svo sem stefnda
virðist kjósa nú. Þá var samið þannig að greiða bæri fyrir verkið á ákveðnum
gjalddögum, en ekki eftir framvindu svo sem stefnda vill halda fram. Einnig
var, samanber 5. gr. verksamningsins, samið þannig að öll samskipti vegna
verksins væru milli sameiginlegrar stjórnar stigaganganna og verktaka og að
verktaki ræddi ekki við aðra íbúa, nema á almennum nótum. Stefndu bar því að
beina öllum athugasemdum sínum til sameiginlegrar stjórnar húsfélaganna.
Stefnda krefst sýknu vegna aðildarskorts og
heldur því fram að stefnandi sé ekki réttur eigandi kröfunnar. Málsástæða þessi
er ekki svo skýr sem skyldi. Stefnandi gerir samninginn við MEA ehf., hinn 19.
apríl 2016, eftir að samþykkt hafði verið á löglega boðuðum húsfundi
húsfélagsins Hraunbær 152-174 að stefnandi og húsfélögin að Hraunbæ 152 og 154
myndu ein bera allan kostnaðinn. Sömuleiðis að hver stigagangur væri ábyrgur
fyrir sínu viðhaldi. Því er ekki fallist á að sýkna eigi stefndu vegna
aðildarskorts.
Stefnda hefur haldið því fram að verkið sé
haldið göllum. Stefnda aflaði álits Erlings Magnússonar, lögfræðings og
húsasmíðameistara. Það var gert einhliða af hálfu stefndu og hefur því ekki
sönnunargildi í málinu. Þá óskaði stefnda eftir dómkvaðningu matmanns til að
meta verkið. Matsmaður var dómkvaddur, en verktakinn var ekki aðili að matinu
og hefur þar af leiðandi ekki haft tök á að tjá sig um verkið. Þar af leiðir að
matsgerðir þessar hafa ekki sönnunargildi í málinu. Stefndu brast réttur til að
stöðva greiðslur sínar til stefnanda, hvort sem það hefði verið vegna ætlaðra
galla eða annarra atvika. Stefndu bar að standa við samninginn. Með réttu hefði
stefnda átt að snúa sér til stefnanda og/eða sameiginlegrar stjórnar
stigaganganna með framkvæmdunum og koma þar á framfæri kvörtunum sínum um
ætlaða galla á verkinu eða önnur atriði. Það eru augljóslega hagsmunir allra
eigenda í Hraunbæ 156 að verkið sé ekki haldið göllum.
Í greinargerð sinni telur stefnda að stefnandi hafi ekki sýnt fram á að
krafan sé rétt og hvorki útreikningar né sönnur á fjárhæð hafi fylgt. Stefnandi
lagði fram skýringar á útreikningi dómkröfunnar. Þeim hefur hvorki verið
andmælt eftir framlagningu skjalanna né við aðalmeðferð málsins. Því er ekki um
tölulegan ágreining að ræða í málinu. Þá hefur komið fram að ógreiddar séu
436.593 kr. vegna verksins, en verktakinn hefur ekki klárað verk sitt að fullu
og mun veðráttu vera um að kenna.
Eins og að framan er rakið samþykkti stefnda á húsfundi 21. janúar 2016
að tilboði MEA ehf. yrði tekið í verkið. Stefnda samþykkti einnig á húsfundi
23. febrúar 2016 verksamning stefnanda við MEA ehf. um viðgerð hússins. Í báðum
tilvikum var samþykki hennar án fyrirvara. Stefnda er því bundin af þessum
samningi. Stefnda greiddi átta fyrstu greiðslurnar samkvæmt samningnum.
Samkvæmt gögnum málsins virðist stefnda fyrst með bréfi 30. júní 2017, en
stefnda hætti að greiða í mars 2017, hafa tilkynnt að hún vilji ekki skipta um
gler íbúðinni. Þessar mótbárur komu seint fram en aðalatriðið er þó að stefnda
samþykkti verksamninginn og er hún bundin af því. Henni ber að standa við
gerðan samning og er krafa stefnanda því tekin til greina.
Í 1. mgr. 48. gr. laga nr. 26/1994 segir að greiði
eigandi ekki hlutdeild sína í sameiginlegum kostnaði, þar með talin gjöld í
sameiginlegan hússjóð, eignist húsfélagið eða aðrir eigendur lögveð í
eignarhluta hans til tryggingar kröfunni. Lögveðið nái einnig til vaxta og
innheimtukostnaðar. Þá er svo mælt fyrir í 3. mgr. að lögveðið stofnist þegar
húsfélag eða aðrir eigendur inna greiðslu af hendi eða ef um vanskil á
húsfélagsgjöldum er að ræða á gjalddaga þeirra. Loks segir í 4. mgr. að
lögveðið falli niður ef því er ekki fylgt eftir með lögsókn eða því lýst við
nauðungarsölu innan árs frá stofnun þess. Samkvæmt 3. mgr. 48. gr. laga nr.
26/1994 stofnast lögveðréttur, þegar greiðsla er innt af hendi fyrir eiganda
sem ekki hefur greitt hlutdeild sína í sameiginlegum kostnaði. Lögveðréttur
stofnaðist því fyrir sérhverjum reikningi sem stefnandi greiddi. Þegar mál
þetta var höfðað, 19. janúar 2018, var ekki liðið ár frá því að stefnandi
greiddi hlutdeild sína í síðasta reikningnum hinn 1. mars 2017. Eftir það varð
greiðslufall hjá skuldara. Þar sem stefnandi fylgdi rétti sínum eftir með
lögsókn innan frests samkvæmt 4. mgr. 48. gr. laga nr. 26/1994 verður tekin til
greina krafa um viðurkenningu á réttinum eins og nánar greinir í dómsorði, en
krafan hefur ekki sætt tölulegum andmælum af hálfu stefndu.
Með vísan til 130. gr. laga um meðferð
einkamála ber stefndu að greiða stefnanda málskostnað svo sem greinir í
dómsorði.
Sigrún Guðmundsdóttir héraðsdómari kvað upp
dóm þennan.
DÓMSORÐ
Stefnda, Valgerður Laufey Einarsdóttir,
greiði stefnanda, húsfélaginu Hraunbæ 156, skuld að fjárhæð 985.918 kr. ásamt
dráttarvöxtum skv. 1. mgr. 6. gr. vaxtalaga nr. 38/2001, af 212.170 kr. frá
30.3.2017 til 28.4.2017, af 363.720 kr. frá 28.4.2017 til 31.5.2017, af 556.269
kr. frá 31.5.2017 til 3.7.2017, af 748.818 kr. frá 3.7.2017 til 1.8.2017, af
911.767 kr. frá 1.8.2017 til 1.9.2017, af 985.918 kr. frá 1.9.2017 til
greiðsludags og 1.100.000 kr. í málskostnað.
Viðurkenndur er lögveðréttur
stefnanda í fasteign stefndu að Hraunbæ
156, íbúð 0201 með fnr. 204-5194, til tryggingar fyrir 985.918 kr. og tildæmdum dráttarvöxtum.
Sigrún Guðmundsdóttir