- Bókanir
- Dráttarvextir
- Fasteign
- Greiðsla
- Húsaleiga
- Húsaleigusamningur
- Kröfuréttur
- Loforð
- Löggerningur
- Málskostnaður
- Orsakatengsl
- Res judicata
- Réttaráhrif dóms
- Riftun
- Samningur
- Skaðabætur
- Stjórnarskrá
- Sönnun
- Sönnunarbyrði
- Tómlæti
- Vextir
- Húsaleigumál
D Ó M U R
Héraðsdóms Reykjavíkur
föstudaginn 12. október 2018 í máli nr. E-3085/2017:
Heimiliskaup ehf.
(Sigurður G. Guðjónsson lögmaður)
gegn
Sjóklæðagerðinni hf.
(Atli Björn Þorbjörnsson lögmaður)
I.
Mál þetta var höfðað 5. október 2017 og dómtekið 26. september 2018. Stefnandi er Heimiliskaup ehf., Suðurlandsbraut 8, Reykjavík. Stefndi er Sjóklæðagerðin hf., Miðhrauni 11, Garðabæ.
Endanlegar dómkröfur stefnanda eru þær að stefnda verði gert að greiða honum 15.811.036 krónur auk vaxta samkvæmt 1. mgr. 8. gr. laga nr. 38/2001 frá 1. desember 2013 til 27. nóvember 2016 en með dráttarvöxtum samkvæmt 1. mgr. 6. gr. sömu laga frá þeim degi til greiðsludags. Þá krefst stefnandi að stefnda verði gert að greiða honum málskostnað samkvæmt mati dómsins.
Stefndi krefst þess aðallega að vera sýknaður af öllum kröfum stefnanda en til vara að kröfur hans verði lækkaðar verulega. Þá er í báðum tilvikum gerð krafa um málskostnað úr hendi stefnanda að mati dómsins.
Dómara var úthlutað málinu 10. janúar 2018 en fram að þeim tíma hafði hann ekki komið að meðferð þess.
II.
Málavextir:
Stefnandi og stefndi gerðu með sér tímabundinn húsaleigusamning, dagsettan 31. október 2007, um atvinnuhúsnæði á annarri hæð að Faxafeni 12, Reykjavík. Stefnandi var eigandi húsnæðisins sem stefndi tók á leigu. Samkvæmt 2. gr. leigusamningsins skyldi leigutími vera frá 1. nóvember 2007 til 30. október 2022 og var ekki kveðið á um uppsagnarrétt á samningstímanum. Þá var mánaðarleg leiga, samkvæmt 3. gr. samnings, 476.300 krónur og bundin vísitölu neysluverðs og skyldi greiða hana mánaðarlega með tilteknum hætti og var gjalddagi 1. hvers mánaðar og eindagi 5. sama mánaðar. Í 1. gr. húsaleigusamningsins greinir að stefndi hafi ætlað að nýta húsnæðið sem iðnaðarhúsnæði. Í 4. gr. samningsins greinir að stefndi hafi haft starfsemi í húsnæðinu í nokkur ár fyrir gerð samningsins og hann þekki til ástands þess, en hann mun áður hafa átt húsnæðið.
Hinn 8. október 2012 gerði Slökkvilið höfuðborgarsvæðisins rekstrarskoðun á húsnæðinu á grundvelli eftirlitsheimilda í lögum nr. 75/2000 um brunavarnir. Við þá skoðun voru gerðar nokkrar athugasemdir við húsnæðið. Með bréfi stefnda til stefnanda 12. júní 2013 var krafist úrbóta á húsnæðinu til samræmis við athugasemdir slökkviliðsins. Með bréfi stefnda 11. september 2013 var lýst yfir riftun á húsaleigusamningnum með vísan til 1. mgr. 60. gr. laga nr. 36/1994, að liðnum sjö daga fresti. Í bréfinu var vísað til úttektar slökkviliðsins 21. ágúst sama ár á húsnæðinu og tekið fram að stefnandi hefði ekki, að mati stefnda, sinnt skyldu sinni til að koma húsnæðinu í leiguhæft ástand. Fyrir liggur að stefndi nýtti húsnæðið til verslunarreksturs á þessum tíma. Stefndi innti síðast af hendi leigugreiðslu fyrir húsnæðið vegna nóvembermánaðar 2013.
Aðilar deildu um fyrrgreinda riftun og skyldu stefnda til að efna samninginn samkvæmt efni sínu. Sá ágreiningur var leiddur til lykta með dómi Hæstaréttar Íslands 27. október 2016 í máli nr. 83/2016. Með dóminum var stefndi sýknaður af kröfu stefnanda um leigugreiðslur frá desember 2013 til mars 2015 en fallist var á það með stefnanda að stefndi hefði ekki öðlast rétt til að rifta leigusamningi aðila, sbr. fyrrgreint bréf 11. september 2013. Þá var tekið fram í forsendum dómsins að eftir atvikum kynni stefnandi að hafa öðlast rétt til efndabóta.
Við aðalmeðferð gaf skýrslu vitnis, Bergsveinn
Ólafsson, löggiltur leigumiðlari o.fl. Vísað verður til framburðar hans
eftir því sem þurfa þykir í niðurstöðukafla dómsins.
III.
Helstu málsástæður og
lagarök stefnanda:
Stefnandi byggir kröfu sína á því að stefnda beri að bæta stefnanda það tjón sem hann hafi orðið fyrir í kjölfar þess að stefndi rifti samningi aðila með ólögmætum hætti. Stefnandi krefst efndabóta, það er að vera eins settur og ef samningurinn hefði verið efndur eftir efni sínu. Að mati stefnanda sé óumdeilt að stefndi hafi rift samningi aðila með saknæmum og ólögmætum hætti og krefst hann því fjárhæðar er svarar til þeirra leigugreiðslna sem hann hefði fengið frá stefnda ef samningnum hefði ekki verið rift.
Stefnandi vísar til þess að húsaleigusamningur hafi verið gerður til 15 ára og það hafi valdið honum miklu tjóni þegar stefndi hafi rift samningnum þegar níu ár voru eftir af samningstímabilinu. Um hafi verið að ræða tímabundinn samning. Að því virtu hafi stefnandi mátt gera ráð fyrir því að fá leigutekjur af húsnæðinu allt til október 2022, þegar samningnum hefði að öllu óbreyttu lokið, sbr. 58. gr. húsaleigulaga nr. 36/1994. Mánaðarleiga hafi verið 476.300 krónur og hún verið bundin vísitölu neysluverðs. Vanefnd stefnda hafi því valdið stefnanda gífurlegu tjóni.
Stefnandi tekur fram að hann beri enga ábyrgð á ólögmætri riftun stefnda. Þá hafi stefnandi eftir fremsta megni reynt að takmarka tjón sitt. Í því sambandi vísar stefnandi meðal annars til bréfs Gunnars Jónssonar lögmanns til lögmanns stefnda 24. september 2015. Með bréfinu hefði stefndi verið upplýstur um það að stefnandi væri kominn í mikil fjárhagsvandræði og einkum vegna þess að stefndi hefði ekki greitt leigu frá því í nóvember 2013. Stefnandi hefði krafið stefnda um greiðslu leigunnar en ella væri sá kostur helstur í stöðunni að selja eignina. Stefnandi hafi í framhaldi verið nauðbeygður til að staðfesta riftun stefnda svo honum væri unnt að ráðstafa eigninni og þannig takmarka tjón sitt með einhverjum hætti. Að því virtu sé krafa stefnanda miðuð við 24. september 2015. Þá hafi stefnandi reynt að leigja húsnæðið út á ný eins fljótt og unnt var en það hefði hins vegar reynst honum mjög erfitt.
Stefnandi byggir á því að tjón hans megi með beinum hætti rekja til vanefndar stefnda. Stefnandi hafi orðið af leigugreiðslum í tæpa 22 mánuði, það er frá desember 2013 til og með 24. september 2015, sem stefnandi hefði eðli málsins samkvæmt ekki orðið fyrir ef stefndi hefði efnt samning aðila samkvæmt efni sínu. Þá byggir stefnandi á því að vanefnd stefnda á því að greiða honum leigu hafi farið í bága við meginreglur samninga- og kröfuréttar en með henni hafi skapast bótaréttur fyrir stefnanda á grundvelli reglna um efndabætur.
Stefnandi byggir á því að stefnda, sem annars aðila húsaleigusamningsins, hafi verið kunnugt um að um tímabundinn samning hafi verið að ræða sem ekki hafi verið uppsegjanlegur. Stefndi hafi því mátt vita að stefnandi yrði fyrir verulegu tjóni er hann hafi rift samningnum með ólögmætum hætti í september 2013. Stefnandi fari því fram á að stefndi bæti það tjón stefnanda sem stefndi gat með sanngirni séð fyrir sem hugsanlega afleiðingu vanefndar sinnar.
Krafa stefnanda á hendur stefnda sé nánar tiltekið sú að stefndi greiði honum bætur sem nemi leigugreiðslum fyrir Faxafen 12 frá 1. desember 2013 til og með 24. september 2015. Þá krefst stefnandi vaxta af allri fjárhæðinni frá 1. desember 2013, eða frá þeim degi þegar stefndi hætti að greiða leigu af fasteigninni, sbr. 1. mgr. 8. gr. laga nr. 38/2001. Loks krefst stefnandi dráttarvaxta frá 27. nóvember 2016, það er þegar mánuður var liðinn frá uppkvaðningu dóms Hæstaréttar Íslands í máli nr. 83/2016, en þá hafi legið fyrir nauðsynlegar upplýsingar til að meta tjónsatvik og fjárhæð bóta, sbr. 9. gr. laga nr. 38/2001.
Kröfu sinni til stuðnings vísar stefnandi til meginreglna samninga-, leigu- og kröfuréttar, þá helst meginreglunnar um skuldbindingargildi samninga og efndir loforða. Þá byggir stefnandi einnig á ákvæðum húsaleigulaga nr. 36/1994, þá helst 58. gr. þeirra laga. Jafnframt vísar stefnandi til meginreglna um efndabætur. Kröfu um vexti styður stefnandi við 1. mgr. 8. gr. laga nr. 38/2001 og kröfu um dráttarvexti við 1. mgr. 6. gr., sbr. 9. gr., sömu laga. Um aðild vísar stefnandi til III. kafla laga nr. 91/1991. Um varnarþing vísar stefnandi til 8. gr. samnings aðila, sem og 34. og 35. gr. laga nr. 91/1991, og um málskostnað til 129. gr. og 1. mgr. 130. gr. sömu laga.
Helstu málsástæður og
lagarök stefnda:
Stefndi tekur fram að hann telji að vísa eigi málinu frá dómi án kröfu með vísan til 2. mgr. 116. gr. laga nr. 91/1991. Í því sambandi beri að líta til þess að stefnandi hafi áður höfðað dómsmál á hendur honum og krafist greiðslu vegna þeirra lögskipta sem ágreiningur taki til. Þeim ágreiningi hafi lokið með dómi Hæstaréttar í máli nr. 83/2016. Stefndi telur að það réttlæti ekki aðra málssókn á hendur honum, þó að í hæstaréttardóminum komi fram að stefnandi kunni að hafa öðlast rétt til efndabóta. Að mati stefnda hefði stefnandi átt að gera kröfu um efndabætur á þeim tíma þegar hann höfðaði dómsmál sem síðar lauk með fyrrgreindum dómi. Stefnanda hafi hins vegar misfarist að gera kröfu um efndabætur í því máli og verði hann að bera hallann af því. Að mati stefnda verði að leggja til grundvallar að niðurstaða í hæstaréttarmáli nr. 83/2016 sé bindandi um ágreining aðila og teljist því vera fullnaðardómur. Í framkvæmd sé viðurkennt að unnt sé að dæma að nýju um kröfu en þá þurfi ákveðin atriði að vera fyrir hendi. Núverandi málatilbúnaður stefnanda byggi ekki á nýjum málsatvikum eða nýjum sönnunargögnum. Stefnandi hafi hins vegar aftur gert kröfu um greiðslu á leigu fyrir ákveðið tímabil. Stefndi bendir á að sönnunarbyrði fyrir því að kröfur í nýju dómsmáli séu ekki þær sömu og í fyrra máli hvíli á stefnanda, sbr. dóm Hæstaréttar Íslands 18. febrúar 2015 í máli nr. 97/2015. Að því virtu hvíli sú skylda á stefnanda að gera grein fyrir því með skýrum hætti að hvaða leyti núverandi krafa sé frábrugðin kröfu sem áður hafi verið dæmt um. Slíkt hafi stefnandi ekki gert. Þvert á móti bendi allur málatilbúnaður stefnanda til þess að um sé að ræða sömu kröfu, nánar tiltekið vegna ógreiddrar leigu. Að þessu virtu og þar sem stefnandi hafi áður fengið dóm um kröfu sína með dómi Hæstaréttar í máli nr. 83/2016 þá beri að vísa málinu frá dómi án kröfu.
Varðandi aðalkröfu um sýknu þá byggir stefndi á því að stefnandi hafi ekki sýnt fram á að skilyrði til greiðslu efndabóta séu fyrir hendi. Hvorki hafi verið sýnt fram á að meint vanefnd stefnda hafi leitt til tjóns fyrir stefnanda né heldur hafi verið sýnt fram á orsakasamband milli meintrar vanefndar og tjóns samkvæmt kröfugerð.
Stefndi vísar til þess sem fram kemur í stefnu, að stefnandi hafi verið nauðbeygður til að staðfesta riftun og takmarka þannig tjón sitt, en stefndi telur að í þessu orðalagi felist yfirlýsing stefnanda um staðfestingu á riftun leigusamningsins. Stefnandi eigi því ekki sjálfstæðan rétt til efndabóta enda hafi hann með yfirlýsingunni í raun viðurkennt að ekki sé til staðar bótagrundvöllur.
Stefndi vísar til þess að hann hafi sent stefnanda bréf, dagsett 11. september 2013, þar sem hann hafi lýst yfir riftun. Með riftunaryfirlýsingunni hafi stefnanda verið gefinn sjö daga frestur til að bæta úr ýmsum annmörkum sem hafi verið á húsnæðinu og upplýst hafi verið um rekstrarskoðun Slökkviliðs höfuðborgarsvæðisins vegna eldvarna sem fram hafi farið 8. október 2012. Stefnandi hafi því haft langan tíma til að ráðast í úrbætur. Stefnandi hafi hins vegar ekki brugðist við og því hafi hið leigða húsnæði verið ónothæft fyrir stefnda. Rekstrarskoðun slökkviliðsins hafi leitt til þess að stefnda hafi verið óheimilt að vera með rekstur verslunar í húsnæðinu. Þá hafi stefnanda verið fullkunnugt um vankantana en hann ekki brugðist við. Stefndi hafi því verið nauðbeygður til að hætta starfsemi í húsnæðinu þar sem lokun þess hafi verið yfirvofandi af hálfu opinbers eftirlitsaðila. Að mati stefnda hefði stefnandi þannig sjálfur getað komið í veg fyrir ágreining aðila og meint tjón sitt með því að bregðast við athugasemdum og ábendingum slökkviliðsins og stefnda sem honum hafi verið í lófa lagið að gera. Stefndi telur þannig að um sé að ræða eigin sök stefnanda þar sem hann hafi ekki sinnt áskorunum stefnda um úrbætur á húsnæðinu með fullnægjandi hætti.
Stefndi byggir á því að efndabætur séu þess eðlis að unnt sé að líta til þess til niðurfellingar á bótaábyrgð, eða lækkunar bótafjárhæðar, að aðstæður eða háttsemi sem stefnandi ber sjálfur ábyrgð á hafi verið þess valdandi að ekki var hægt að standa við samning. Þá skuli líta til aðstöðu þess sem fer fram á greiðslu efndabóta með hliðsjón af aðstæðum þess sem krafinn er um greiðslu. Stefndi vísar til framangreindra aðstæðna sem hafi verið uppi og stefnandi hafi ekki brugðist við sem skyldi. Stefnanda hafi verið fullkunnugt um það frá undirritun leigusamnings hvernig stefndi ætlaði að nýta húsnæðið enda hafi fyrirsvarsmaður og eigandi leigusala og leigutaka á þeim tíma verið sá sami. Þá háttsemi stefnanda að bregðast ekki betur við athugasemdum eftirlitsaðila verði að meta stefnanda í óhag. Af þeim sökum verði stefnandi sjálfur að bera ábyrgð á meintu fjártjóni og hann geti því ekki gert kröfu um greiðslu vegna þess úr hendi stefnda.
Stefndi byggir á því að fjárkrafa stefnanda, sem samsvari umsömdum leigugreiðslum í 663 daga miðað við uppreiknaða grunnleigu, geti með engu móti samrýmst meintu fjárhagslegu tjóni. Stefndi telur að stefnandi hafi ekki útskýrt á neinn hátt hvað réttlæti eða hvaða rök búi að baki því að hann krefji stefnda um leigu í tvö ár eftir að samningi var rift. Telur stefndi að draga megi þá ályktun að með fjárkröfu af þessum toga sé stefnandi í raun að gera kröfu um ógreidda leigu, undir því yfirskini að um sé að ræða efndabætur, en kröfu um ógreidda leigu hafi verið hafnað í fyrra máli aðila, sbr. hæstaréttardóm í máli nr. 83/2016. Þá telur stefndi að stefnandi hafi augljóslega ekkert gert til að reyna að takmarka tjónið. Stefndi bendir sérstaklega á að stefnandi hafi hvorki sýnt fram á né fært fyrir því rök að hann hafi í raun orðið fyrir tjóni vegna riftunar stefnda á leigusamningnum. Þá telur stefndi að það geti ekki talist fullnægjandi samkvæmt reglum um skaðabætur innan samninga, að því er varðar að sýna fram á umfang tjóns, að stefnandi hafi sundurliðað kröfuna með því að vísa til ógreiddra leigugreiðslna í tvö ár frá riftun og lagt fram reikninga því til stuðnings. Þvert á móti telur stefndi að stefnandi hafi ekki sýnt fram á að hann hafi raunverulega orðið fyrir tjóni, sbr. einnig umfjöllun stefnda um varakröfu.
Stefndi vísar til þess að það skilyrði sé að jafnaði sett fyrir greiðslu efndabóta að orsakasamband sé á milli vanefndar og tjóns kröfuhafa en skuldara beri aðeins að bæta tjón sem teljist vera sennileg afleiðing vanefnda af hans hálfu. Stefndi telur að með öllu sé ósannað að orsakasamband sé á milli meintrar vanefndar hans og meints tjóns stefnanda samkvæmt kröfufjárhæð í stefnu. Stefndi telur að stefnandi verði að bera hallann af þessu þar sem hann hafi ekki sýnt fram á framangreint orsakasamband. Þar fyrir utan hafi hann ekki reynt að takmarka tjónið eins og almennt sé áskilið, sbr. umfjöllun stefnda vegna varakröfu. Stefnda geti einungis verið gert skylt að bæta það tjón sem hann hafi með sanngirni getað séð fyrir sem sennilega afleiðingu meintra vanefnda. Stefndi geti þannig aldrei borið ríkari ábyrgð á fjárhagstjóni vegna vanrækslu stefnanda á því að takmarka tjónið.
Þá byggir stefndi einnig á því að stefndi hafi sýnt af sér tómlæti, bæði með því að vanrækja að takmarka tjónið en einnig varðandi það að gera ekki eðlilegan reka að því að fara fram á efndabætur. Hið síðarnefnda hafi stefnandi fyrst gert með birtingu stefnu. Málið hafi verið þingfest 5. október 2017 en þá hafi verið liðið tæpt ár frá því að dómur gekk í Hæstarétti í máli nr. 83/2016 og rúm fjögur ár frá því að leigusamningnum var rift. Að þessu virtu hafi stefndi mátt trúa því að stefnandi teldi sig ekki eiga neinn rétt til bóta úr hendi stefnda enda hafi stefnandi ekkert aðhafst né haft uppi neinar kröfur um bætur frá því að leigusamningnum var rift og heldur ekki frá því að hæstaréttardómurinn var kveðinn upp.
Að öllu framangreindu virtu telur stefndi að málatilbúnaður stefnanda sé rýr, þar með talið varðandi bótagrundvöll, rökstuðning, fjárhæð bótakröfu og að stefnandi hafi gripið til viðeigandi ráðstafana. Þá mótmælir stefndi sérstaklega vaxtakröfu sem órökstuddri og órökréttri. Af þessum ástæðum telur stefndi að sýkna beri hann af öllum kröfum stefnanda og dæma honum málskostnað úr hendi stefnanda.
Varðandi varakröfu um verulega lækkun á kröfu þá byggir stefndi á því að stefnandi hafi alfarið vanrækt að takmarka meint tjón sitt og gera ráðstafanir sem eðlilegar hefðu verið í því sambandi eftir að ljóst var að stefndi var búinn að segja upp leigusamningi og yfirgefa húsnæðið. Stefndi byggir á því að stefnandi geti ekki fengið bætt tjón, sem hann hefði getað komist hjá að verða fyrir, ef hann hefði gripið til ráðstafana sem sanngjarnt sé að gera kröfu um að hann gripi til í því skyni að draga úr tjóni.
Stefndi byggir á því að stefnanda hafi verið skylt að gera ráðstafanir til að draga úr tjóni sínu samkvæmt meginreglu íslensks réttar um skaðabætur innan samninga. Stefndi telur að ekki sé unnt að dæma hann til að bæta stefnanda tjón sem rekja megi til vanrækslu stefnanda á þessari skyldu. Samningsaðila sem beri fyrir sig vanefndir af hálfu gagnaðila sé almennt skylt að takmarka tjón sitt og gera nauðsynlegar ráðstafanir í því skyni. Að þessu virtu hafi stefnanda borið skylda til að endurleigja húsnæðið hið alla fyrsta frá riftun leigusamningsins. Hafi stefnandi vanrækt það þá eigi hann sjálfur að bera það tjón eða þann hluta tjóns sem af því leiðir. Að mati stefnda megi í þessu samhengi leiða líkum að því að stefnandi hefði getað leigt húsnæðið út á mun hærra fermetraverði en gilti samkvæmt hinum rifta sex ára gamla leigusamningi og aðstæður verið mjög hagstæðar fyrir leigusala á Reykjavíkursvæðinu eftir að samningnum var rift. Stefndi vísar til þess að umrætt húsnæði sé í Skeifunni, miðsvæðis í Reykjavík, og hafi verið laust til leigu í desember 2013. Á þeim tíma hafi verið fordæmalausir uppgangstímar á íslenskum húsnæðismarkaði, hvort sem litið sé til íbúðar- eða atvinnuhúsnæðis. Að því virtu hefði stefnanda verið í lófa lagið að leigja húsnæðið út að nýju. Að mati stefnda geti stefnandi því ekki byggt bótakröfu sína á því að hann hafi orðið af leigugreiðslum í 663 daga frá því að leigusamningnum var rift þar sem hann hafi ekki sinnt skyldu sinni til að draga úr tjóni. Það hafi fyrst verið 3. febrúar 2016, þegar stefnandi hafi leitað til Jöfurs ehf., fasteignasölu og leigumiðlunar, að reynt hafi verið að leigja húsnæðið út að nýju. Stefnandi hafi ekki lagt fram nein gögn sem sýni fram á það að stefnandi hafi reynt að leigja húsnæðið út á öðrum tíma eftir riftunina né heldur að hann hafi gert aðrar ráðstafanir til að takmarka tjónið. Að mati stefnda verði stefnandi að bera hallann af þeirri vanrækslu.
Stefndi vísar til framlagðra gagna sem sýni að þáverandi lögmaður hans hafi á tímabili frá 7. maí 2014 til 12. ágúst sama ár ítrekað sett sig í samband við þáverandi lögmann stefnanda. Á því ári, nánar tiltekið 7., 28. og 30. maí, 2., 4., 11., 18. og 23. júní, 1., 8. og 29. júlí og 12. ágúst, hafi lögmaðurinn innt lögmann stefnanda meðal annars eftir svörum við því hvort stefnandi hefði gert ráðstafanir til að leigja húsnæðið út að nýju. Stefnandi hafi hins vegar ekki svarað þeim fyrirspurnum. Í eitt skipti, í lok maí það ár, hafi lögmaður stefnanda svarað símtali frá lögmanni stefnda en þá hafi því verið svarað til að ekki fengist svar frá stefnanda varðandi þetta. Lögmaður stefnanda hafi svo fylgt þessu eftir með tölvuskeyti 11. júní 2014 og með símtali í júlí sama ár án viðbragða af hálfu stefnanda. Að mati stefnda megi því augljóslega ráða af þessum gögnum að stefndi hafi að yfirlögðu ráði vanrækt þá skyldu að draga úr tjóni sínu, þrátt fyrir hvatningu stefnda í þá veru.
Varðandi kröfu um dráttarvexti þá mótmælir stefndi því að miða eigi upphafstíma slíkra vaxta við 27. nóvember 2016, daginn þegar mánuður var liðinn frá uppkvaðningu hæstaréttardóms í máli nr. 83/2016. Í því sambandi tekur stefndi fram að engar upplýsingar hafi legið fyrir um fjárhæð bóta við uppkvaðningu dómsins. Stefndi telur hins vegar, verði lagt til grundvallar að stefnandi eigi rétt á bótum, að leggja eigi til grundvallar að upphafsdagur dráttarvaxta verði í fyrsta lagi þegar mánuður er liðinn frá dómsuppsögu, sbr. 2. málsl. 9. gr. laga nr. 38/2001.
Um lagarök að öðru leyti vísar stefndi meðal annars til reglna samninga- og kröfuréttar, reglna um skaðabætur innan samninga, almennra reglna um efndabætur, laga nr. 91/1991, laga nr. 38/2001 og sjónarmiða um tómlæti.
IV.
Niðurstöður:
Stefndi hefur bent á það að vísa eigi málinu frá án kröfu með vísan til 1. og 2. mgr. 116. gr. laga nr. 91/1991 þar sem ágreiningi aðila hafi lokið með dómi Hæstaréttar Íslands 27. október 2016 í máli nr. 83/2016. Stefnandi hefur mótmælt málatilbúnaði stefnda að þessu leyti og talið að neikvæð bindandi réttaráhrif leiði ekki af fyrrgreindum hæstaréttardómi vegna þess ágreinings sem nú sé til úrlausnar. Við túlkun á réttarreglum um bindandi áhrif dóma gagnvart síðari dómsmálum ber almennt að gæta varúðar svo ekki halli á rétt einstaklinga og lögaðila til aðgangs að dómstólum, sbr. 1. mgr. 70. gr. stjórnarskrár lýðveldisins Íslands nr. 33/1944, sbr. 8. gr. laga nr. 97/1995. Hvað ágreining aðila varðar þá er til þess að líta að þó að bæði málin eigi rætur að rekja til sömu atvika þá er dómkrafa stefnanda í því máli sem nú er rekið fyrir dómi annars efnis en í fyrra málinu og að auki reist á öðrum grunni, nánar tiltekið er fjárhæð dómkröfunnar önnur í því máli sem nú er rekið fyrir dómi og þá lýtur núverandi málsgrundvöllur að heimtu efndabóta en í hinu fyrra máli laut málsgrundvöllurinn að kröfu um efndir stefnda samkvæmt aðalefni leigusamningsins eftir að stefnandi tók við húsnæðinu. Í fyrrgreindum dómi Hæstaréttar hefur þannig hvorki verið fjallað um dómkröfu stefnanda né heldur verið tekin afstaða til málsástæðna hans sem liggja til grundvallar í máli þessu á þann hátt að jafnað verði til þess að þegar hafi verið leyst úr þeim kröfum sem stefnandi hefur nú uppi. Að framangreindu virtu stendur 2. mgr. 116. gr. laga nr. 91/1991 ekki í vegi fyrir því að efnisdómur gangi í máli þessu og eru því ekki efni til að vísa málinu frá dómi án kröfu.
Stefndi krefst meðal annars sýknu vegna orðalags í málsástæðukafla í stefnu sem hann telur að hafi falið í sér bindandi yfirlýsingu stefnanda, nánar tiltekið að stefnandi hefði verið nauðbeygður til að staðfesta riftun svo honum væri unnt að ráðstafa eigninni og þannig takmarka tjón sitt með einhverjum hætti, og að með þessu hafi stefnandi í raun staðfest riftun umrædds húsaleigusamnings. Að mati dómsins ber að virða hið tilvitnaða orðalag í stefnu í samhengi við bréf lögmanns stefnanda, dagsett 24. september 2015, sem einnig er vísað til á sama stað í stefnu og lagt hefur verið fram, þar sem meðal annars var leitað eftir afstöðu stefnda til forkaupsréttar samkvæmt húsaleigusamningnum í tengslum við fyrirhugaða sölu húsnæðisins vegna meintra fjárhagsvandræða stefnanda sökum riftunar stefnda. Að þessu virtu og með hliðsjón af málatilbúnaði stefnanda að öðru leyti þá verður ekki dregin sú ályktun af hinu tilvitnaða orðalagi að með því hafi stefnandi í raun staðfest riftunina frá upphafi svo leiði til þess að bótagrundvöllur sé ekki til staðar. Verður orðalagið um staðfestingu riftunarinnar aðeins sett í samhengi við þá ætluðu ráðstöfun eignarinnar sem var uppi á þeim tíma, sbr. fyrrgreint bréf, enda miðast fjárkrafa stefnanda við efndabætur fram til dagsetningar bréfsins og var því aðeins um að ræða staðfestingu riftunar frá og með þeim degi.
Með dómi Hæstaréttar í máli nr. 83/2016 var lagt til grundvallar að stefnandi hefði með fullnægjandi hætti brugðist við athugasemdum Slökkviliðs höfuðborgarsvæðisins og haldið húsnæðinu í lögmætu og leiguhæfu ástandi, sbr. 1. mgr. 23. gr. laga nr. 75/2000 og 19. gr. laga nr. 36/1994. Þá var í dóminum einnig lagt til grundvallar að riftun stefnda á umræddum leigusamningi með bréfi 11. september 2013 hefði verið óheimil og að skilyrði samkvæmt 4., 5. og 8. tölul. 1. mgr. 60. gr. laga nr. 36/1994 hefðu ekki verið uppfyllt. Framangreind dómsniðurstaða um þessi atriði hefur fullt sönnunargildi í því máli sem nú er rekið milli aðila, sbr. 4. mgr. 116. gr. laga nr. 91/1991. Stefndi hefur ekki fært fram sönnur fyrir hinu gagnstæða og ber hann hallann af því. Að þessu virtu ber að leggja til grundvallar að húsaleigusamningi aðila hafi verið rift 11. september 2013 með saknæmum og ólögmætum hætti af hálfu stefnda. Af framangreindu leiðir að ekki verður fallist á með stefnda að stefnandi hafi sýnt af sér eigin sök svo leiði til sýknu með því að hafa ekki brugðist við með fullnægjandi hætti við ábendingum stefnda og Slökkviliðs höfuðborgarsvæðisins varðandi úrbætur á húsnæðinu. Hið sama á við um málsástæður stefnda af sama toga sem lúta að niðurfellingu bótaábyrgðar eða lækkun bótafjárhæðar.
Stefndi krefst sýknu vegna tómlætis stefnanda, annars vegar vegna meintrar vanrækslu stefnanda á að takmarka tjón sitt og hins vegar með því að stefnandi hafi ekki gert eðlilegan reka að því að gera kröfu um efndabætur. Varðandi hið fyrrgreinda atriði þá liggur fyrir að meðal málsgagna er bréf lögmanns stefnanda frá 24. september 2015 þar sem greint var frá hugsanlegum áformum um sölu húsnæðisins og einnig liggur fyrir að Jöfri ehf. var falið að leigja út húsnæðið 3. febrúar 2016 og það í framhaldi auglýst til leigu. Að þessu virtu verður ekki fallist á það með stefnda að stefnandi hafi sýnt af sér tómlæti varðandi það að takmarka tjón sitt svo leiði til sýknu. Um hið síðarnefnda, að því er varðar meint tómlæti stefnanda við að halda fram kröfu um efndabætur, þá liggur fyrir að í héraðsdómsmáli nr. E-1104/2015, sem lá til grundvallar fyrrgreindum hæstaréttardómi, fékk stefnandi bókað í þingbók 14. október 2015 að hann áskildi sér rétt til að sækja frekari kröfur gegn stefnda í öðru máli og væri því ekki með nokkrum hætti að gefa eftir kröfur á hendur stefnda. Að því virtu og með hliðsjón af niðurstöðu í fyrrgreindu hæstaréttarmáli vegna fyrri ágreinings aðila þá gat stefnda ekki dulist að stefnandi myndi eða kynni að fara ítarlega yfir réttarstöðu sína og í framhaldi leita réttar síns gagnvart stefnda um efndabætur. Þá var ekki þörf á því í ljósi undangengins ágreinings og atvika milli aðila að leggja fram formlega bótakröfu í aðdraganda hinnar síðari málshöfðunar, sbr. einnig dóm Hæstaréttar í máli nr. 368/1993, sem birtur er í dómasafni 1995, bls. 1715. Að þessu virtu verður ekki fallist á sýknukröfu stefnda á grundvelli tómlætis.
Húsaleigusamningur aðila var tímabundinn og án uppsagnarákvæðis og var hann í gildi á þeim tíma þegar honum var rift og voru þá níu ár eftir af samningstímabilinu. Að þessu virtu mátti stefnandi gera ráð fyrir mánaðarlegum leigutekjum af húsnæðinu fram í október á árinu 2022, sbr. 58. gr. laga nr. 36/1994. Vanefnd stefnda með þeirri riftun sem að framan greinir fór í bága við meginreglur samninga- og kröfuréttar og leiddi af sér fjártjón fyrir stefnanda og með því skapaðist bótaréttur fyrir hann á grundvelli reglna um efndabætur. Stefndi var aðili að samningnum og þekkti efni hans. Stefndi mátti þannig vita að með því að rifta samningnum með saknæmum og ólögmætum hætti 11. september 2013 yrði stefnandi fyrir fjárhagstjóni sem stefndi gæti borið ábyrgð á. Að framangreindu virtu verður ekki fallist á með stefnda að bótagrundvöllur sé ekki til staðar, að stefnandi hafi ekki sýnt fram á né fært rök fyrir því að hann hafi í raun orðið fyrir tjóni vegna riftunarinnar eða að ekki sé sannað um orsakasamband.
Stefnandi krefst efndabóta vegna tapaðrar húsaleigu í tæpa 22 mánuði á tímabili frá og með 1. desember 2013 til og með 24. september 2015, uppreiknaðrar samkvæmt vísitölu neysluverðs, samtals 15.811.036 krónur. Fjárkrafan miðast við tímabilið frá því að stefndi hætti að greiða leigu samkvæmt húsaleigusamningnum uns stefnandi taldi sig nauðbeygðan til að staðfesta riftun stefnda á samningnum svo unnt væri að ráðstafa eigninni með sölu, sbr. fyrrgreint bréf lögmanns hans 24. september 2015. Í máli þessu er ágreiningur um það hvort fjárhæð umkrafinna efndabóta endurspegli bótaskylt tjón sem stefndi hefði mátt sjá fyrir sem sennilega afleiðingu af riftuninni og samhliða hvort stefnandi hafi reynt að takmarka tjón sitt. Eitt af meginskilyrðum efnabóta, sem stefndi byggir á til stuðnings aðal- og varakröfu, er að einungis það tjón sem samningsaðili gat með sanngirni séð fyrir sem sennilega afleiðingu vanefndar sinnar verði bætt. Þá byggir stefndi samhliða á þeirri almennu reglu sem gildir um efndabætur, til stuðnings aðal- og varakröfu, að leigusala beri að grípa til viðeigandi ráðstafana til að draga úr tjóni sínu, svo sem með því að leigja húsnæðið á ný eða ráðstafa því með öðru móti og að stefnandi hafi í lögskiptum þeirra vanrækt þá tillitsskyldu og eigi það að leiða til þess að bætur verði lækkaðar að því marki sem honum hefði verið kleift að takmarka tjónið. Stefnandi byggir hins vegar á því að tjónið hafi verið fyrirsjáanlegt og sennilegt í ljósi vanefndar stefnda og að hann hafi leitast við að takmarka tjónið. Varðandi hið síðara atriði, um takmörkun tjóns, hefur stefnandi í fyrsta lagi vísað til fyrrgreinds bréfs lögmanns hans 24. september 2015 um áform um sölu húsnæðisins. Í annan stað hefur stefnandi vísað til þess að hann hafi reynt að leigja út húsnæðið frá byrjun febrúar 2016 en í því sambandi liggur fyrir að vitnið Bergsveinn Ólafsson, löggiltur leigumiðlari o.fl., bar fyrir dómi að Jöfri ehf. hefði samkvæmt beiðni frá stefnanda 3. febrúar 2016 verið falið að leigja út húsnæðið og það þá strax verið auglýst til leigu. Hið sama kemur fram í skriflegri yfirlýsingu Bergsveins frá 28. ágúst 2017 sem hann staðfesti fyrir dómi. Þá byggir stefnandi í þriðja lagi á því sem fram kom við munnlegan málflutning, sem gagnrök við málatilbúnaði stefnda, og var ekki mótmælt að kæmist að, að stefnandi hefði framan af talið sig bundinn af hinum tímabundna leigusamningi til 15 ára. Að því virtu hefði verið eðlilegt að ekki væri hlaupið til og húsnæðið leigt út við vanefnd stefnda og þannig hefði mögulega verið opnað á bótakröfu stefnda síðar. Stefnandi hefði þannig verið í góðri trú enda hefði hann mátt vera það þar sem héraðsdómur hefði í tengslum við fyrri ágreining aðila, sbr. dóm uppkveðinn 5. nóvember 2015 í máli nr. E-1104/2015, fallist á málatilbúnað stefnanda um skyldu stefnda til að efna húsaleigusamninginn samkvæmt aðalefni samningsins en því ekki verið hnekkt fyrr en tæpu ári síðar í hæstaréttarmáli nr. 83/2016.
Við mat á framangreindum atriðum er til þess að líta að tæpir 22 mánuðir liðu frá því að stefndi hætti að greiða húsaleigu uns lögmaður stefnanda sendi honum fyrrgreint bréf 24. september 2015 þar sem fram komu meðal annars áform um sölu húsnæðisins og frá þeim tíma liðu rúmir fjórir mánuðir uns Jöfri ehf. var falið að auglýsa húsnæðið laust til leigu. Er um að ræða óvenjulega langan tíma í almennu tilliti varðandi það að halda að sér höndum um útleigu atvinnuhúsnæðis miðsvæðis á höfuðborgarsvæðinu. Skal þá einnig litið til þess að stefnandi er lögaðili sem leigir meðal annars út húsnæði í atvinnuskyni. Að mati dómsins hefur stefnandi ekki útskýrt með fullnægjandi hætti hinn langa tíma sem fór í það að hefja ráðstafanir með húsnæðið sem hefðu verið til þess fallnar að takmarka tjón hans. Með dómi Hæstaréttar í máli nr. 83/2016 var lagt til grundvallar að stefndi hefði rýmt húsnæðið í nóvember 2013 og að stefnandi hefði tekið við umráðum þess frá sama tíma og ber að leggja hið sama til grundvallar í máli þessu, sbr. 4. mgr. 116. gr. laga nr. 91/1991. Þá verður ráðið af framlögðum skjölum að lögmaður stefnda, í samskiptum við þáverandi lögmann stefnanda, leitaðist á hluta tímabilsins við að benda stefnanda á mikilvægi þess að leigja húsnæðið út að nýju og takmarka tjónið, sbr. tölvuskeyti 30. maí 2014, 2., 4. og 18. júní sama ár, 1. og 29. júlí sama ár og 12. ágúst sama ár. Af fyrirliggjandi gögnum verður ráðið að stefnandi hafi mjög lítið eða ekkert gert með fyrrgreindar ábendingar. Að þessu virtu og með vísan til þess að stefndi var búinn að rýma húsnæðið í nóvember 2013 og að stefnandi hafði tekið við því á sama tíma þá verður ekki fallist á með stefnanda að hann hefði mátt vera í góðri trú um að hann væri bundinn af leigusamningnum gagnvart stefnda sem réttlætt hafi þann langa tíma sem leið frá því að hann tók við húsnæðinu uns hann leitaðist við að hefja ráðstöfun á því með hugsanlegri sölu í lok september 2015 og síðar með því að reyna að leigja það út í byrjun febrúar 2016. Hefur ekki þýðingu í þessu sambandi niðurstaða héraðsdóms 5. nóvember 2015 um að efna bæri húsaleigusamninginn samkvæmt efni sínu enda var þeirri niðurstöðu hnekkt með fyrrgreindum hæstaréttardómi og var málatilbúnaður stefnanda í því máli ekki á ábyrgð stefnda.
Að framangreindu virtu er það mat dómsins að stefndi hafi sýnt nægjanlega fram á það að nokkur vanhöld hafi verið á því af hálfu stefnanda að takmarka tjón sitt og að stefndi hafi ekki með sanngirni getað séð fyrir að honum yrði gert að bæta allt það fjárhagstjón sem krafa stefnanda tekur til eftir að húsaleigusamningnum var rift. Fullyrðing stefnda um hagstæðar markaðsaðstæður fyrir útleigu atvinnuhúsnæðis á umræddum tíma, það er frá riftun húsaleigusamningsins og fram til 24. september 2015, er ekki studd gögnum og samrýmist ekki nægjanlega framburði vitnisins Bergsveins sem bar um að erfiðlega hefði gengið að koma eigninni út þar sem um hefði verið að ræða stórt húsnæði með opnu vinnurými á annarri hæð en meiri eftirspurn hefði verið eftir atvinnuhúsnæði á fyrstu hæð. Einnig hefði verið erfiðara að leigja út húsnæðið þar sem þröngt aðgengi hefði verið að því í stigahúsi og það verið án lyftu og því sérstaklega óhentugt fyrir umferð fatlaðra. Þá hefðu markaðsaðstæður fyrir útleigu á atvinnuhúsnæði almennt verið betri á árinu 2016 en árunum tveimur á undan. Húsnæðið hefði síðan fyrst verið leigt út í lok árs 2016 eftir að hafa verið auglýst til leigu frá því í byrjun febrúar sama ár. Að framangreindu virtu er ósannað að markaðsaðstæður hafi verið sérstaklega hagstæðar fyrir stefnanda til að koma húsnæðinu í útleigu að nýju og verður stefndi látinn bera hallann af því. Hið sama á við um staðhæfingu stefnda um að leiguverð hafi almennt verið hærra eftir riftun húsaleigusamningsins, en stefndi hefur engin gögn lagt fram því til stuðnings. Kemur því aðeins til álita að lækka kröfu stefnanda um efndabætur.
Fyrir liggur að umræddur húsaleigusamningur féll undir gildissvið laga nr. 36/1994 nema um annað væri samið, sbr. 3. mgr. 1. gr. og 2. mgr. 2. gr. þeirra laga. Við mat á fjárhæð hæfilegra efndabóta til stefnanda þykir að nokkru mega hafa hliðsjón af þeim hlutlæga lögfesta fresti sem almennt gildir um uppsögn ótímabundins leigusamnings vegna atvinnuhúsnæðis til lengri tíma, sbr. 4. tölul. 1. mgr. 56. gr. laga nr. 36/1994. Þar er almennt gert ráð fyrir sex til tólf mánaða uppsagnarfresti miðað við lengd leigutíma fyrir uppsögn. Fyrir liggur að umrætt húsnæði var búið að vera í samfelldri leigu hjá stefnda í tæp sex ár uns hann rifti húsaleigusamningnum en samningnum var ætlað að vara í fimmtán ár eins og áður greinir. Þá liggur fyrir samkvæmt fyrrgreindri yfirlýsingu og framburði vitnisins Bergsveins að um ellefu mánuði tók að finna nýjan leigutaka að húsnæðinu miðað við markaðsaðstæður á árinu 2016 varðandi útleigu á atvinnuhúsnæði á höfuðborgarsvæðinu. Einnig verður ráðið af framburði Bergsveins að markaðsaðstæður fyrir slíkt húsnæði á árunum á undan hafi verið heldur lakari. Að framangreindu virtu og að teknu tilliti til eðlis og markmiðs efndabóta þá þykir rétt að líta til efri marka framangreinds uppsagnarfrests, sbr. 4. tölul. 1. mgr. 56. gr. laga nr. 36/1994, og jafnframt til þess tíma sem tók að finna nýjan leigutaka á árinu 2016 sem hæfilegs hlutlægs viðmiðs við ákvörðun bóta sem stefndi hefði að minnsta kosti með sanngirni mátt sjá fyrir sem sennilega afleiðingu riftunarinnar vegna tapaðrar húsaleigu hjá stefnanda. Að því virtu þykir hæfilegt að leggja til grundvallar að stefndi greiði stefnanda efndabætur sem nemi uppreiknaðri grunnleigu miðað við vísitölu neysluverðs vegna útleigu húsnæðisins samkvæmt húsaleigusamningi aðila í tólf mánuði, á tímabili frá og með 1. desember 2013 til og með 1. nóvember 2014, eða samtals 8.649.616 krónur.
Í málinu er ágreiningur um upphafstímamark dráttarvaxta. Við úrlausn þess ágreinings þykir rétt að líta til þess að með dómi Hæstaréttar í máli nr. 83/2016 lágu ekki fyrir upplýsingar um fjárhæð efndabóta og verður stefnandi sjálfur að bera hallann af málatilbúnaði sínum við meðferð þess máls. Þá var það í raun fyrst við úrlausn þess máls sem hér er til umfjöllunar að fjárhæð efndabóta skýrðist. Að þessu virtu og með vísan til 2. málsl. 9. gr. laga nr. 38/2001 verður lagt til grundvallar að upphafsdagur dráttarvaxta samkvæmt 1. mgr. 6. gr. sömu laga miðist við þann dag þegar mánuður er liðinn frá dómsuppsögu í máli þessu. Að öðru leyti verður fallist á vaxtakröfur stefnanda eins og þær eru settar fram í stefnu.
Að öllu framangreindu virtu verður stefnda gert að greiða stefnanda efndabætur að viðbættum vöxtum og dráttarvöxtum, allt eins og nánar greinir í dómsorði.
Með hliðsjón af niðurstöðum máls þessa og með vísan til 3. mgr. 130. gr. laga nr. 91/1991 þykir rétt að málskostnaður falli niður milli aðila.
Af hálfu stefnanda flutti málið Valgerður Björk Benediktsdóttir lögmaður fyrir hönd Sigurðar G. Guðjónssonar lögmanns. Af hálfu stefnda flutti málið Atli Björn Þorbjörnsson lögmaður.
Daði Kristjánsson héraðsdómari kveður upp dóm þennan.
D Ó M S O R Ð:
Stefndi, Sjóklæðagerðin hf., greiði stefnanda, Heimiliskaupum ehf., 8.649.616 krónur auk vaxta samkvæmt 1. mgr. 8. gr. laga nr. 38/2001 frá 1. desember 2013 til þess dags þegar mánuður er liðinn frá uppkvaðningu dóms þessa en með dráttarvöxtum samkvæmt 1. mgr. 6. gr. sömu laga frá þeim degi til greiðsludags.
Málskostnaður milli aðila fellur niður.
Daði Kristjánsson