- Brot gegn valdstjórninni
- Skilorðsbundnir dómar
- Svipting ökuréttar
- Umferðarlagabrot
D Ó M U R
Héraðsdóms Reykjavíkur 17. október 2018 í máli nr. S-523/2018:
Ákæruvaldið
(Pétur Hrafn Hafstein saksóknarfulltrúi)
gegn
Hrafnkeli Dwight Batson
(Ólafur Karl Eyjólfsson lögmaður)
Mál þetta, sem
dómtekið var 11. október 2018, var höfðað með ákæru héraðssaksóknara, dags. 16.
ágúst 2018 á hendur:
„Hrafnkeli Dwight Batson, kennitala 000000-0000,
[...], Reykjavík,
fyrir brot gegn valdstjórninni framið í Reykjavík [...] árið 2017:
1.
Með
því að hafa, er ákærði var handtekinn að [...],
hótað lögreglumönnunum A og B og fjölskyldum þeirra lífláti, er þeir gegndu
skyldustarfi sínu.
Brot ákærða samkvæmt 1. tl. ákæru telst varða við 1. mgr. 106. gr.
almennra hegningarlaga nr. 19/1940.
(007-2017-037316)
Fyrir eftirfarandi hegningar- og umferðalagabrot framin í Reykjavík að
morgni [...] árið 2018:
2.
Fyrir
umferðalagabrot, með því að hafa ekið bifreiðinni [...] án ökuréttinda og óhæfur til að stjórna
henni örugglega vegna áhrifa ávana- og fíkniefna (í blóði mældist amfetamín 100
ng/ml og MDMA 1200 ng/ml) og neyslu slævandi lyfja (í blóði mældist díazepam
510 ng/ml, klónazepam 19 ng/ml, nordíazepam 970 ng/ml og temazepam 33 ng/ml)
vestur [...] og inn [...] til norðurs, þar sem bifreiðin hafnaði
uppi á umferðareyju milli akreina og festist í snjó.
Brot ákærða samkvæmt 2. tl. ákæru telst varða við 2. mgr. 44. gr., 1.
mgr., sbr. 2. mgr., 45. gr. a. og 1. mgr. 48. gr., allt sbr. 100. gr.,
umferðarlaga nr. 50/1987 með síðari breytingum.
3.
Fyrir
brot gegn valdstjórninni, með því að hafa, er ákærði var handtekinn og fluttur
með lögreglubifreið á lögreglustöðina við Hverfisgötu í kjölfar þeirra atvika
sem lýst er í öðrum ákærulið, hótað lögreglumanninum C líkamsmeiðingum og
lífláti.
4.
Fyrir
brot gegn valdstjórninni, með því að hafa, á lögreglustöðinni við Hverfisgötu
hótað lögreglumönnunum C, D og E líkamsmeiðingum og lífláti er þeir gegndu
skyldustarfi sínu.
Brot ákærða samkvæmt 3. og 4. tl. ákæru teljast varða við 1. mgr. 106.
gr. almennra hegningarlaga nr. 19/1940.
(007-2018-010132)
Þess er krafist að ákærði verði dæmdur til refsingar, greiðslu alls
sakarkostnaðar og til að sæta sviptingu ökuréttar samkvæmt 101. gr. og 102. gr.
umferðarlaga.“
Verjandi ákærða krefst
vægustu refsingar er lög leyfa og hæfilegrar þóknunar sér til handa.
Farið var með mál
þetta samkvæmt 164. gr. laga um meðferð sakamála og var það tekið til dóms án
frekari sönnunarfærslu er sækjanda og verjanda ákærða hafði verið gefinn kostur
á að tjá sig um lagaatriði og ákvörðun viðurlaga.
Ákærði hefur skýlaust
játað brot sín. Sannað er með játningu ákærða og öðrum gögnum málsins að ákærði
er sekur um þá háttsemi sem honum er gefin að sök og eru brot hans rétt
heimfærð til refsiákvæða í ákæru.
Ákærði er fæddur árið [...].
Samkvæmt framlögðu sakavottorði ákærða hefur hann ekki hlotið refsingu fyrir
hótanir eða ofbeldistengd brot. Hann gekkst undir sátt [...] 2015 fyrir akstur
undir áhrifum fíkniefna. Hann var ekki orðinn
fullra 18 ára þegar hann framdi það brot og hefur það því ekki
ítrekunaráhrif, sbr. 71. gr. almennra hegningarlaga. Þá var hann dæmdur til greiðslu
sektar með dómi Héraðsdóms Suðurlands frá [...] 2015 en um var að ræða
hegningarauka við sáttina.
Við ákvörðun refsingar ákærða nú er litið til
greiðrar játningar hans fyrir dómi. Hvað umferðarlagabrot hans varðar er um
fyrsta brot hans að ræða eftir að hann náði 18 ára aldri og varðar sektum.
Ákærði var undir miklum áhrifum fíkniefna þegar hann framdi valdstjórnarbrotin.
Var ástand hans slíkt að vista þurfti hann í fangageymslu þar til hann var
viðræðuhæfur. Ástand hans leysir hann ekki undan sök þó ætla megi að ásetningur
hans hafi verið þokukenndur. Til þyngingar horfir að um alvarlega háttsemi var
að ræða en brot hans beindust gegn nokkrum lögreglumönnum sem voru við
skyldustörf.
Ákærði hefur að eigin sögn nýverið lokið
meðferð. Hann hefur vísan samastað hjá nánum fjölskyldumeðlimum og hefur í
hyggju að halda meðferð áfram þegar losnar pláss. Hann hefur hug á að komast í
vinnu sem fyrst.
Með vísan til framangreinds og með hliðsjón
af 77. gr. almennra hegningarlaga nr. 19/1940 þykir hæfileg refsing ákærða vera
4 mánaða fangelsi en fresta skal
fullnustu refsingarinnar og falli hún niður að liðnum tveimur árum frá birtingu
dóms þessa haldi ákærði almennt skilorð 57. gr. almennra hegningarlaga nr.
19/1940 sbr. 4. gr. laga nr. 22/1955.
Þegar litið er til ungs aldurs ákærða og aðstæðna hans er ákveðið að
binda refsingu ákærða jafnframt skilyrði samkvæmt 1. og 3. tl. 3. mgr. 57. gr.
almennra hegningarlaga. Skal hann því ekki neyta áfengis né deyfilyfja á
skilorðstímanum og sæta umsjón Fangelsismálastofnunar sem annast eftirlit
samkvæmt 1. mgr. 83. gr. laga nr. 15/2016 um fullnustu refsinga.
Ákærði er sviptur ökurétti í eitt ár frá birtingu dómsins að telja.
Ákærði greiði málsvarnarþóknun skipaðs verjanda síns
Ólafs Karls Eyjólfssonar lögmanns og annan sakarkostnað samkvæmt framlögðu
sakarkostnaðaryfirliti, allt eins og nánar greinir í dómsorði.
Sigríður Hjaltested héraðsdómari
kveður upp dóm þennan.
D ó m s o r ð :
Ákærði, Hrafnkell
Dwight Batson, sæti fangelsi í fjóra mánuði en fresta skal fullnustu
refsingarinnar og falli hún niður að liðnum tveimur árum frá birtingu dóms
þessa haldi ákærði almennt skilorð 57. gr. almennra hegningarlaga nr. 19/1940.
Framangreind frestun skal einnig bundin skilyrði 1. og 3. tl. 3. mgr. 57. gr.
almennra hegningarlaga og skal ákærði ekki neyta áfengis né deyfilyfja á
skilorðstímanum og sæta umsjón Fangelsismálastofnunar.
Ákærði er sviptur ökurétti í eitt ár
frá birtingu dómsins að telja.
Ákærði greiði málsvarnarþóknun skipaðs verjanda síns,
Ólafs Karls Eyjólfssonar lögmanns, 126.480 krónur og 296.072 krónur í annan
sakarkostnað.
Sigríður
Hjaltested (sign.)