- Brot gegn valdstjórninni
- Líkamsárás
D Ó M U R
Héraðsdóms
Reykjavíkur 11. desember 2018 í máli nr. S-522/2018:
Ákæruvaldið
(Fanney Björk Frostadóttir aðstoðarsaksóknari)
gegn
Birni Gísla Gíslasyni
Matthíasi Þór Þórusyni og
Ólöfu Gunnarsdóttur
(Jóhannes A. Kristbjörnsson lögmaður)
I
Mál
þetta, sem dómtekið var 26. nóvember síðastliðinn, var höfðað með ákæru
héraðssaksóknara, útgefinni 16. ágúst síðastliðinn, „á hendur Birni Gísla
Gíslasyni, kennitala 000000-0000, [...],[...], Matthíasi Þór Þórusyni, kennitala
000000-0000, [...],[...] og Ólöfu Gunnarsdóttur, kennitala 000000-0000, [...],[...],
fyrir neðangreind brot framin í Reykjavík aðfaranótt sunnudagsins 11. desember
2016:
1.
Gegn ákærða Matthíasi Þór fyrir líkamsárás, með því að
hafa utan við skemmtistaðinn Kíkí við Klapparstíg, þar sem A sinnti starfi sínu
sem dyravörður, slegið A með krepptum hnefa í andlitið og tekið hann hálstaki,
með þeim afleiðingum að A hlaut mar og yfirborðsáverka í andliti, opið sár á
eyra og tognun og ofreynslu á hálshrygg.
Telst
þetta varða við 1. mgr. 217. gr. almennra hegningarlaga nr. 19/1940.
2.
Gegn ákærða Birni Gísla fyrir líkamsárás, með því að hafa
utan við skemmtistaðinn Kíkí við Klapparstíg, slegið B með krepptum hnefa í
andlitið, með þeim afleiðingum að B hlaut tognun og ofreynslu á hálshrygg og
mar og yfirborðsáverka á höfði.
Telst
þetta varða við 1. mgr. 217. gr. almennra hegningarlaga nr. 19/1940.
3.
Gegn ákærða Matthíasi Þór fyrir brot gegn lögreglulögum
og brot gegn valdstjórninni, með því að hafa utandyra við skemmtistaðinn Kíki
við Klapparstíg, ekki hlýtt fyrirmælum lögreglu og leitast við að hindra
handtöku meðákærða Björns Gísla og er lögregla var að handtaka ákærða klipið
lögreglumanninn C í utanvert hægra lærið og bitið lögreglumanninn D í hægri
handlegg með þeim afleiðingum að D hlaut mar og ummerki eftir bit á hægri
framhandlegg. Einnig með því að hafa, í kjölfarið í fangaklefa á
lögreglustöðinni við Hverfisgötu, haft í hótunum um að fara heim til þeirra
lögreglumanna sem höfðu haft afskipti af honum og gera eitthvað miður
skemmtilegt við þá og aðstandendur þeirra.
Telst
þetta varða við 19. gr. lögreglulaga nr. 90/1996 og 1. mgr. 106. gr. almennra
hegningarlaga nr. 19/1940.
4.
Gegn ákærða Birni Gísla fyrir brot gegn valdstjórninni,
með því að hafa utan við skemmtistaðinn Kíkí við Klapparstíg, bitið lögreglumanninn
E í innanvert lærið hægra megin, er E var þar við skyldustörf, með þeim
afleiðingum að E hlaut mar og ummerki eftir bit á hægra læri.
Telst
þetta varða við 1. mgr. 106. gr. almennra hegningarlaga nr. 19/1940.
5.
Gegn ákærðu Ólöfu fyrir brot gegn lögreglulögum og brot
gegn valdstjórninni, með því að hafa utan við skemmtistaðinn Kíkí við
Klapparstíg, ekki hlýtt fyrirmælum lögreglu um að færa sig frá vettvangi er
lögreglan var að handtaka meðákærðu Björn Gísla og Matthías Þór, gert tilraun
til að sparka í höfuð lögreglumannanna C og D og með því að hafa togað í hár C.
Telst
þetta varða við 19. gr. lögreglulaga nr. 90/1996 og 1. mgr. 106. gr. almennra
hegningarlaga nr. 19/1940.
Þess
er krafist að ákærðu verði dæmd til refsingar og greiðslu alls sakarkostnaðar.“
Ákærði
Björn Gísli játar sök í 2. ákærulið en neitar sök að öðru leyti. Hann krefst
vægustu refsingar vegna 2. ákæruliðar en sýknu að öðru leyti. Ákærðu Matthías
Þór og Ólöf neita sök og krefjast sýknu. Ákærðu öll krefjast þess að
sakarkostnaður, þar með talin málsvarnarlaun, verði greiddur úr ríkissjóði.
II
Málavextir
eru þeir að lögreglan var kvödd að skemmtistaðnum, er í ákæru greinir, á þeim
tíma sem þar segir. Á staðnum fengust þær upplýsingar að maður hefði slegið
dyravörð. Þegar lögreglumenn komu á vettvang sáu þeir ákærða Björn Gísla slá
brotaþola sem nefndur er í 2. ákærulið. Ákærði var handtekinn og lagður í
götuna. Í skýrslunni segir að þá hafi ákærða Ólöf komið að og reynt að ná í meðákærða.
Henni var skipað að hafa sig á brott en hlýddi ekki fyrr en henni var ýtt frá.
Á meðan handtóku lögreglumenn ákærða Matthías Þór sem hafði gert tilraun til að
frelsa meðákærða Björn Gísla úr höndum lögreglumanna. Í lögregluskýrslu er
ákærði Matthías Þór sagður hafa barist um eins og greinir í 3. ákærulið og að
hann hafi klipið og bitið lögreglumenn eins og þar greinir. Þá segir í
skýrslunni að ákærði Matthías Þór hafi viðhaft þau ummæli, er í 3. ákærulið
getur, í fangaklefa á lögreglustöð.
Í
skýrslum einstakra lögreglumanna um atvik málsins segir að ákærða Ólöf hafi
rifið í hár lögreglumanns og reynt að sparka í hana, eins og hún er ákærð fyrir
í 5. ákærulið. Einnig að ákærði Björn Gísli hefði bitið lögreglumann eins og
hann er ákærður fyrir í 4. ákærulið.
Brotaþolar,
sem nefndir eru í 1. og 2. ákærulið, og lögreglumenn, sem nefndir eru í 3. og
4. ákærulið, fóru á slysadeild í kjölfar átakanna. Í vottorðum þaðan segir að
þeir hafi allir borið þá áverka er í ákæru greinir.
III
Ákærði
Björn Gísli viðurkenndi að hafa slegið brotaþola sem greindur er í 2. ákærulið.
Hann kvaðst hafa farið mannavillt. Hann hefði ætlað að slá mann sem hefði
áreitt vinkonu hans á öðrum skemmtistað fyrr um kvöldið. Ákærði kvaðst hafa
slegið með krepptum fingrum. Eftir þetta kvaðst hann hafa lent í átökum og ekki
almennilega vitað hvað hefði gengið á þar til vinkona hans hefði kallað
„lögreglan“ en þá hefði hann hætt allri mótspyrnu. Meðan á þessu stóð kvaðst
hann ekki hafa fylgst með meðákærðu. Lögreglumenn hefðu reist hann upp og fært
inn í lögreglubíl. Hann hefði síðan verið fluttur á lögreglustöð og vistaður í
fangaklefa. Ákærði neitaði að hafa bitið lögreglumann, eins og hann er ákærður
fyrir í 4. ákærulið. Hann kvaðst ekki hafa verið í aðstöðu til að bíta enda
legið með höfuðið á grúfu.
Við
aðalmeðferð bar ákærði Matthías Þór að hann og meðákærðu hefðu farið í bæinn að
skemmta sér. Hann kvaðst hafa verið mjög ölvaður. Ákærði kvaðst hafa gengið út
af skemmtistaðnum og gengið á keðju, en það hefði stafað af ölvun hans. Hann
kvað sig minna að dyravörður, líklegast brotaþoli í 1. ákærulið, hefði rifið í
sig og þá hefði eitthvað komið upp á, eins og hann orðaði það, sem hann myndi
ekki nógu vel. Þá kvaðst ákærði hafa séð meðákærða Björn Gísla slá létt til
manns og hefði höggið komið á kinnina. Ákærði kvaðst ekki muna til þess að hafa
slegið brotaþola og tekið hann hálstaki, eins og hann er ákærður fyrir í 1.
ákærulið. Ákærði kvaðst hafa séð lögreglumann ýta harkalega í meðákærða Björn
Gísla og síðan hefði meðákærði verið barinn til óbóta að mati ákærða. Ákærði
kvað það hafa verið sér erfitt að horfa upp á meðferðina á meðákærða og þess
vegna farið til lögreglumannanna og sagt ýmislegt við þá í hita leiksins. Hann
kvaðst ekki hafa ætlað að frelsa meðákærða heldur ræða við lögreglumennina og
þá tekið í öxl eins þeirra og sagt „þið eruð að drepa manninn“ og þá átt við
meðákærða. Ákærði kvað lögreglumenn hafa sagt eitthvað við sig en hann kvaðst
ekki muna hvað það var. Hann neitaði að hafa reynt að hindra handtöku
meðákærða. Ákærði neitaði að hafa klipið og bitið lögreglumenn. Þá neitaði hann
að hafa hótað að fara heim til lögreglumanna og gera eitthvað miður skemmtilegt
við þá og aðstandendur þeirra eins og hann er ákærður fyrir í 3. ákærulið. Þá
lýsti ákærði átökum á vettvangi og sérstaklega handtöku konu sinnar, meðákærðu
Ólafar. Hann kvaðst ekki hafa séð hana veitast að lögreglumönnum og gat ekki
borið um hvað gerðist milli meðákærða Björns Gísla og lögreglumanna umfram það
sem að framan getur. Þá tók ákærði fram að áverkar á lögreglumönnum væru ekki
af hans völdum.
Ákærða
Ólöf kvað sig og meðákærðu hafa verið í röð að skemmtistaðnum. Meðákærði Björn
Gísli hefði opnað lás á keðju og hefði dyravörður brugðist illa við því og
meinað honum um aðgang að skemmtistaðnum. Meðákærði Matthías Þór hefði hins
vegar verið kominn og kvaðst ákærða hafa farið inn og sagt honum að meðákærði
Björn Gísli kæmist ekki inn. Meðákærði Matthías Þór, sem var mjög ölvaður,
hefði flækt sig í keðjur og þá hefði sami dyravörður komið og sagt meðákærða að
hann ætti að fara annars staðar út. Við þetta hefði allt „espast upp“, eins og
ákærða orðaði það. Þarna voru komnir tveir dyraverðir „sem ætluðu að hjóla í
strákana og þeir ætluðu að hjóla í dyraverðina“ eins og hún orðaði það. Með
strákunum kvaðst hún eiga við meðákærðu. Hún kvaðst hafa gengið á milli og sagt
þeim öllum að hætta og í framhaldinu hefðu dyraverðirnir horfið til starfa
sinna. Skömmu síðar hefðu meðákærðu farið aftur að barnum. Hún kvaðst nú hafa
verið að ræða við fólk á vettvangi en þegar hún hefði snúið sér við hefðu
lögreglumenn verið með meðákærðu í götunni. Ákærða kvaðst hafa gengið að og
staðið með fæturna milli höfða meðákærðu. Jafnframt hefði hún haldið í trékarm
og beðið lögreglumenn um að hætta. Henni hefði verið sagt að fara í burtu en
hún hefði haldið um karminn þar til hann datt. Í framhaldinu hefði hún verið
handjárnuð og handtekin. Hún hefði verið lögð á magann. Ákærða kvaðst að vissu
leyti ekki hafa hlýtt fyrirmælum lögreglu en hún neitaði að hafa reynt að
sparka í lögreglumenn og að hafa rifið í hár lögreglumanns.
Brotaþoli,
sem nefndur er í 1. ákærulið, bar að hann hefði verið dyravörður á
skemmtistaðnum. Hann kvaðst hafa staðið við útidyrnar en þar hafi verið keðja
sem skildi milli þeirra sem fóru inn og út af staðnum. Maður hafi komið út og
gengið á keðjuna þar sem gengið er inn á staðinn. Brotaþoli kvaðst hafa beðið
hann að ganga út þar sem eigi að ganga út. Hann neitaði því og reiddist mikið.
Síðan kvaðst brotaþoli hafa fengið eitt högg í höfuðið og því næst muni hann
eftir því að vera kominn í hálstak. Brotaþoli benti á ákærða Matthías Þór og
kvað hann hafa slegið sig og tekið sig hálstaki. Brotaþoli kvaðst hafa rankað
við sér í hálstakinu og þá hefðu fleiri dyraverðir verið komnir. Sjálfur kvaðst
hann hafa átt erfitt með andardrátt og farið upp og skolað framan úr sér. Þegar
hann kom niður aftur hefðu verið mikil læti en hann kvaðst ekki hafa heyrt
orðaskil. Nú kom lögreglan á vettvang og kvað hann einn lögreglumann hafa verið
bitinn en ekki kvaðst hann hafa séð hver það var sem beit. Þá hefði stúlka á
vettvangi rifið niður dyrakarm. Hann kvað lögreglumenn hafa átt í mestu
vandræðum með ákærða Matthías Þór, enda hefði hann verið snaróður, eins og hann
orðaði það. Þá hefði vinur ákærða verið þarna og kona og hefðu þau einnig verið
mjög æst.
Annar
dyravörður bar að piltur hefði verið að ganga út af skemmtistaðnum og gengið á
keðjur sem afmarka svæði þeirra sem ganga inn og út af staðnum. Framangreindur
brotaþoli hefði beðið piltinn um að ganga þar sem honum var ætlað að ganga. Það
hafi komið til orðaskipta milli piltsins og brotaþola. Í framhaldinu hefði
pilturinn kýlt brotaþola og tekið hann hálstaki. Lögreglan hefði handtekið
piltinn síðar og hefði það verið ákærði Matthías Þór. Í framhaldinu hefðu
hafist átök. Þá kvað dyravörðurinn brotaþola þann, sem nefndur er í 2.
ákærulið, hafa verið sleginn. Hann var ekki viss um hver gerði það. Einnig
nefndi hann stúlku á vettvangi sem var mjög óróleg og hefði hún verið
handtekin, enda hefði hún ekki hlýtt fyrirmælum þegar hún reyndi að trufla
störf lögreglu við handtökurnar.
Þriðji
dyravörður kvaðst hafa komið að eftir að brotaþoli í 1. ákærulið hafði fengið
áverka. Hún hefði séð hann alblóðugan og sagt honum að fara inn. Hún kvaðst
hafa hringt á lögreglu. Hún kvað tvo menn hafa verið fyrir utan að tala við
dyravörð þegar lögreglan kom og í því hefði annar þeirra slegið brotaþola, sem
nefndur er í 2. ákærulið. Í framhaldinu hefði allt farið í bál og brand og
hefðu þessir menn verið handteknir. Einnig hefði verið þarna stúlka sem var með
mönnunum og hefði hún reynt að hindra handtöku þeirra. Þá hefði hún rifið niður
dyrakarm og hefði hún verið handtekin í framhaldinu. Loks kvað hún lögreglumann
hafa kallað að verið væri að bíta hann en ekki kvaðst hún hafa séð það. Þá
kvaðst hún hafa séð nefnda konu reyna að rífa í hár lögreglumanns.
Dyravörðurinn kvað stúlkuna ekki hafa hlýtt fyrirmælum lögreglumanna. Hún
kvaðst hafa heyrt lögreglumenn tilkynna mönnunum, sem voru handteknir, að þeir
væru handteknir.
Brotaþoli,
sem nefndur er í 2. ákærulið, bar að hann hefði verið fyrir utan skemmtistaðinn
umrædda nótt og þar hefðu verið mikil læti. Lögreglan hefði komið og verið að
handtaka mann. Brotaþoli kvaðst hafa spurt mann hvað væri að gerast og þá hefði
maðurinn slegið sig. Hann kvað manninn hafa verið félaga þess sem var
handtekinn. Önnur samskipti hefðu þeir ekki átt sín á milli. Þetta hefði verið
fyrirvaralaust sem hann var sleginn með krepptum hnefa. Lögreglan hefði
umsvifalaust handtekið manninn. Brotaþoli kvaðst hafa vankast og ekki fylgst mikið
með vettvangi eftir þetta. Hann hefði þó tekið eftir því þegar stúlkan var
handtekin að hún reif með sér hurðarkarm. Þá kvaðst hann hafa heyrt
lögreglumann kalla að verið væri að bíta hann og taldi hann það hafa verið
ákærði Björn Gísli sem hefði verið að bíta.
Lögreglumaður,
sem kom á vettvang og ritar frumskýrslu málsins, staðfesti hana. Þegar hún kom
á vettvang var allt rólegt en dyraverðir hefðu bent á tvo menn er hefðu verið
til vandræða. Áður en lögreglumenn komust að þeim kvaðst hún hafa séð mann slá
annan mann er hefði verið í röðinni. Hún kvað lögreglumenn hafa handtekið
árásarmanninn sem væri ákærði Björn Gísli. Hann hefði verið rólegur en þegar
lögreglumenn voru með hann hefði kona komið og verið að skipta sér af málunum.
Lögreglumaður hefði ýtt henni í burtu og síðan sagt sér að fara til að aðstoða
aðra lögreglumenn sem voru að handtaka annan mann. Hún kvaðst hafa gripið í
vinstri handlegg mannsins en hann hefði streist mikið á móti. Þegar búið var að
koma manninum í götuna hefði kona komið og farið að skipta sér af. Hún kvað
hafa verið rifið í hárið á sér, en ekki sá hún hver gerði það. Hún kvaðst hins
vegar hafa gert ráð fyrir að ákærða Ólöf hefði verið að verki, enda hefði hún
verið sú eina er gat komið til greina. Í þessum átökum kvað hún ákærða Matthías
Þór hafa klipið sig og þá kvaðst hún hafa heyrt lögreglumann, sem nefndur er í
3. ákærulið, segja að ákærði hefði bitið hann. Þá kvað hún ákærðu hafa verið
skipað að hlýða lögreglumönnum en án árangurs. Einnig hefði ákærða Ólöf reynt
að sparka í sig.
Lögreglumaður,
sem kom á vettvang ásamt öðrum, kvað fyrst hafa verið tilkynnt um að dyravörður
hefði orðið fyrir árás. Á vettvangi var bent á mann er hefði ráðist á
dyravörðinn. Þá kvaðst hann hafa séð ákærða Björn Gísla slá mann. Annar lögreglumaður
hefði tekið ákærða en sjálfur kvaðst hann hafa séð ákærða Matthías Þór sem
hefði verið mjög æstur. Lögreglumaðurinn kvaðst hafa farið til hans og beðið
hann að róa sig og halda sig fjarri. Ákærði hlýddi ekki. Hann hefði svo verið
tekinn í tök og handjárnaður sem hefði gengið illa en tókst að lokum.
Lögreglumaðurinn kvað ákærða hafa bitið sig í hægri framhandlegg og hefði hann
borið hringlaga mar eftir það. Hann kvaðst ekki muna hvort hann hefði fylgt
ákærða í fangaklefa en hann hefði verið í bílnum sem flutti ákærða á
lögreglustöð. Í bílnum hefði ákærði verið með hótanir í garð lögreglumanna.
Lögreglumaður,
sem kom á vettvang með framangreindum lögreglumönnum, kvað ekkert hafa verið að
gerast er þau komu. Þeim hefði verið bent á tvo menn í röðinni sem hefðu verið
til vandræða. Þegar lögreglumenn nálguðust þá hefði annar mannanna slegið mann
í röðinni. Hann kvað árásarmanninn hafa verið handtekinn og hefði þá félagi
hans farið að skipta sér af þessu og verið handtekinn líka. Lögreglumaðurinn
kvað ákærða Björn Gísla hafa náð að bíta sig en ákærði Matthías Þór hefði bitið
lögreglumanninn sem nefndur er í 3. ákærulið. Hann kvaðst ekki hafa séð það en
lögreglumaðurinn hefði sagt sér það og hann hefði séð áverkann. Þá kvaðst hann
ekki hafa séð er ákærði Björn Gísli beit en hann hefði fundið það. Þá kvað hann
konu hafa verið á vettvangi sem síðar var handtekin. Hún hefði margoft verið
beðin um að fara frá og vera ekki að skipta sér af. Hún hefði ekki hlýtt því og
kvaðst hann hafa endað á því að ýta henni frá. Lögreglumaðurinn kvaðst hvorki
hafa séð konuna rífa í hár lögreglumanns né reyna að sparka til hennar.
Lögreglumaður
sem kom á vettvang bar að hafa ekið lögreglubíl á vettvang. Á vettvangi hafi
allt verið rólegt en tilkynnt hafði verið að ráðist hefði verið á dyravörð.
Hann kvaðst hafa verið að leggja bílnum þegar slagsmál hafi hafist. Hann kvaðst
hafa handtekið mann ásamt tveimur öðrum lögreglumönnum. Annar lögreglumannanna
hefði kallað að hinn handtekni hefði bitið sig. Lögreglumaðurinn bar að kona hafi
komið aðvífandi og reynt að sparka í lögreglumann og rifið tvisvar í hárið á
henni. Hann kvaðst hafa náð að taka konuna lögreglutökum og var hún handtekin í
framhaldinu. Hann tók fram að allt þetta fólk hefði verið mjög æst og ekki
hlýtt fyrirmælum.
Vinkona
ákærðu, sem var með þeim umrædda nótt, kvaðst hafa séð ákærða Björn Gísla slá
annan mann og hefði hann verið handtekinn í framhaldinu. Hún kvað ákærða hafa
villst á þessum manni og öðrum. Hún kvað ákærða hafa látið ófriðlega allt þar
til hún hefði sagt honum að þetta væri lögreglan. Eftir það hefði hann verið
til friðs. Upphafið að átökunum kvað hún hafa verið ágreining um hvar og
hvernig ætti að ganga inn og út af skemmtistaðnum. Þá kvað hún ákærðu Ólöfu
hafa ætlað að spyrja lögreglumenn af hverju verið væri að handtaka ákærða
Matthías Þór. Loks kvaðst vinkonan hafa beðið um að farið yrði varlega með
ákærðu þar eð hún væri nýkomin úr aðgerð.
Læknir
á slysadeild, sem ritar framangreind vottorð, staðfesti þau. Hann kvað áverkana
geta samrýmst þeim lýsingum sem hinir slösuðu gáfu á slysadeild. Hann staðfesti
að þeir sem sögðust hafa verið bitnir hefðu verið með bitfar eins og lýst er.
IV
Í 1. ákærulið er ákærða Matthíasi Þór gefin að sök líkamsárás á dyravörð á nefndum skemmtistað. Ákærði neitar sök. Brotaþoli, sem er dyravörður á skemmtistaðnum, bar fyrir dómi að ákærði hefði slegið sig, eins og rakið var. Annað vitni, sem einnig er dyravörður á skemmtistaðnum, bar að ákærði hafi slegið brotaþola. Með framburði þessara tveggja vitna er sannað, gegn neitun ákærða, að hann hafi gerst sekur um líkamsárás, eins og honum er gefið að sök í þessum ákærulið. Verður ákærði því sakfelldur og er brot hans rétt fært til refsiákvæðis í ákærunni.
Í 2. ákærulið er ákærða Birni Gísla gefin að sök líkamsárás. Ákærði hefur játað sök og styðst játning hans við framburð vitna sem rakinn hefur verið. Ákærði verður því sakfelldur fyrir það sem hann er ákærður fyrir og er brot hans rétt fært til refsiákvæðis á ákærunni.
Í 3. ákærulið er ákærða Matthíasi Þór í fyrsta lagi gefið að sök að hafa ekki hlýtt fyrirmælum og leitast við að hindra handtöku meðákærða Björns Gísla. Ákærði neitar sök. Hér að framan var gerð grein fyrir því að meðákærði Björn Gísli sló mann, eins og hann hefur verið sakfelldur fyrir, og handtóku lögreglumenn hann í framhaldinu. Ákærði bar fyrir dómi að hafa rætt við lögreglumenn er voru að handtaka meðákærða og tekið í öxl eins þeirra. Lögreglumenn hafa borið að ákærði hafi ekki hlýtt fyrirmælum þeirra og þá kemur fram í framburði þeirra og dyravarða að ákærði hafi verið mjög æstur og erfiður, eins og rakið var. Er ekki óvarlegt að telja sannað að hann hafi ekki hlýtt fyrirmælum lögreglu, eins og hann er ákærður fyrir. Ekkert vitni ber um að ákærði hafi leitast við að hindra handtöku meðákærða Björns Gísla og verður hann sýknaður af því. Þá er ákærða gefið að sök að hafa klipið lögreglumann í lærið. Ekki bera önnur vitni um þetta en viðkomandi lögreglumaður. Gegn neitun ákærða er því ósannað að hann hafi klipið lögreglumann í lærið og verður hann sýknaður af því. Þá er ákærða gefið að sök að hafa bitið lögreglumann. Um þetta bera viðkomandi lögreglumaður og þrír aðrir lögreglumenn. Gegn neitun ákærða er því sannað að hann hafi bitið lögreglumann og verður hann sakfelldur fyrir það. Ekkert vitni gat borið um ummæli ákærða í fangaklefa sem honum er gefið að sök að hafa viðhaft og í ákæru greinir. Hann verður því sýknaður af því ákæruatriði. Brot þau, sem ákærði hefur verið sakfelldur fyrir, eru rétt færð til refsiákvæða í ákærunni.
Í 4. ákærulið er ákærða Birni Gísla gefið að sök að hafa bitið lögreglumann. Ákærði neitar sök. Lögreglumaður, sem nefndur er í ákæruliðnum, bar að ákærði hefði bitið sig. Brotaþoli í 2. ákærulið kvaðst hafa heyrt lögreglumann kalla að hann hefði verið bitinn og taldi að það hefði verið ákærði sem hefði bitið. Þá bar lögreglumaðurinn merki þess samkvæmt áverkavottorði að hafa verið bitinn. Í skýrslu sem hann ritar eftir átökin kemur fram lýsing á því hvernig ákærði beit hann. Þegar allt framangreint er virt er það niðurstaða dómsins að komin sé fram lögfull sönnun þess að ákærði hafi bitið lögreglumann eins og honum er gefið að sök í þessum ákærulið. Ákærði verður því sakfelldur, gegn neitun sinni, og er brot hans rétt fært til refsiákvæðis í ákærunni.
Í 5. ákærulið er ákærðu Ólöfu gefið að sök að hafa ekki hlýtt fyrirmælum lögreglu, gert tilraun til að sparka í höfuð lögreglumanna og að hafa togað í hár lögreglumanns. Ákærða neitar sök en viðurkenndi þó að hafa, að vissu leyti, ekki hlýtt fyrirmælum lögreglumanna. Hér að framan var rakinn framburður vitna sem bera að ákærða hafi ekki hlýtt fyrirmælum lögreglumanna á vettvangi. Samkvæmt þessu er sannað að hún hlýddi ekki fyrirmælum eins og hún er ákærð fyrir. Einn lögreglumaður ber að hafa séð ákærðu reyna að sparka í lögreglumann en aðrir sem voru á vettvangi bera ekki um það. Gegn neitun ákærðu er því ósannað að hún hafi gert tilraun til að sparka í höfuð lögreglumanna og verður hún sýknuð af þeim þætti ákærunnar. Dyravörður kvaðst hafa séð ákærðu reyna að rífa í hár lögreglumanns. Lögreglumaður bar að rifið hefði verið í hárið á sér og væri ákærða sú eina sem kæmi til greina að hafa gert það. Annar lögreglumaður bar að hafa séð ákærðu rífa í hár lögreglumannsins. Samkvæmt þessu er sannað, gegn neitun ákærðu, að hún hafi togað í hár lögreglumanns eins og hún er ákærð fyrir. Brot ákærðu varða við þau lagaákvæði sem í ákæru getur.
Ákærðu, Birni Gísla og Matthíasi Þór, hefur ekki áður verið refsað og sakavottorð ákærðu Ólafar hefur ekki þýðingu við úrlausn málsins. Refsing ákærðu, Björns Gísla og Matthíasar Þórs, verður ákveðin samkvæmt 77. gr. almennra hegningarlaga. Refsing ákærða Björns Gísla er hæfilega ákveðin fangelsi í 3 mánuði, refsing ákærða Matthíasar Þórs er hæfilega ákveðin fangelsi í 3 mánuði og refsing ákærðu Ólafar er hæfilega ákveðin fangelsi í 30 daga. Allar skulu refsingarnar bundnar skilorði eins og í dómsorði greinir.
Krafa ákæruvaldsins um greiðslu sakarkostnaðar er annars vegar fyrir læknisvottorð vegna brotaþola í 1.-4. ákærulið. Hins vegar er krafist greiðslu á reikningi fyrir tæknivinnu og akstur sem er, að því er virðist, fyrir upptökur úr myndavél sem dottnar eru út, eins og segir í reikningnum. Á upptökum þessum hefur ekkert verið byggt í málinu og verður ákærðu ekki gert að greiða þann kostnað. Ákærðu, Björn Gísli og Matthías Þór, verða dæmdir til að greiða kostnað vegna áverkavottorða eins og í dómsorði greiðir en annan sakarkostnað skal greiða úr ríkissjóði. Loks verða ákærðu dæmd til að greiða óskipt málsvarnarlaun verjanda síns sem ákvörðuð eru með virðisaukaskatti í dómsorði. Einnig aksturskostnað eins og þar greinir.
Arngrímur Ísberg héraðsdómari kveður upp dóminn.
D ó m s o r ð:
Ákærði,
Björn Gísli Gíslason, sæti fangelsi í 3 mánuði.
Ákærði,
Matthías Þór Þóruson, sæti fangelsi í 3 mánuði.
Ákærða,
Ólöf Gunnarsdóttir, sæti fangelsi í 30 daga.
Fresta skal fullnustu refsinga allra ákærðu og falli þær niður að liðnum tveim árum frá deginum í dag að telja, haldi ákærðu almennt skilorð 57. gr. almennra hegningarlaga nr. 19/1940.
Ákærði, Björn Gísli, greiði 59.940 krónur í sakarkostnað.
Ákærði,
Matthías Þór, greiði 50.970 krónur í sakarkostnað.
Ákærðu
öll greiði óskipt málsvarnarlaun skipaðs verjanda síns, Jóhannesar
Kristbjörnssonar lögmanns, 400.520 krónur og 33.315 krónur í aksturskostnað.
Arngrímur Ísberg