- Prókúra
- Samningur
- Skuldamál
D Ó M U R
Héraðsdóms Reykjavíkur föstudaginn 12. október 2018 í máli nr.
E-2416/2017:
Virgo 2 ehf.
(Einar Hugi Bjarnason lögmaður)
gegn
Senu ehf.
(Sigurður Valgeir Guðjónsson lögmaður)
Mál þetta, sem dómtekið
var 19. september 2018, höfðaði Virgo 2 ehf., [...], hinn 9. ágúst 2017, á
hendur Senu ehf., [...].
Endanlegar dómkröfur stefnanda eru
þær að stefndi verði dæmdur til að greiða stefnanda aðallega 12.648.000 krónur,
en til vara 7.688.000 krónur og til þrautavara 3.658.000 krónur, í öllum
tilvikum með dráttarvöxtum samkvæmt 1. mgr. 6. gr. laga nr. 38/2001 um vexti og
verðtryggingu frá þingfestingardegi til greiðsludags. Þá krefst stefnandi
málskostnaðar.
Stefndi krefst sýknu af öllum
dómkröfum stefnanda, en til vara er þess krafist að kröfur stefnanda á hendur
stefnda verði lækkaðar verulega. Þá krefst stefndi málskostnaðar.
Með úrskurði, uppkveðnum 6. mars
2018, var frávísunarkröfu stefnda, sem höfð var uppi sem aðalkrafa í
greinargerð hans, hafnað.
I
Helstu
málsatvik og ágreiningsefni
Í máli þessu er deilt um það hvort
stefndi, sem er fyrirtæki í afþreyingariðnaði, hafi réttilega innt af hendi
greiðslur til stefnanda, sem er kvikmyndaframleiðandi, samkvæmt
dreifingarsamningi aðila um kvikmyndina Grimmd.
Aðilar gerðu með sér samning 1. mars
2016 þar sem stefnda var veittur einkaréttur á dreifingu kvikmyndarinnar til
kvikmyndahúsa á Íslandi, gegn því að fá í sinn hlut prósentuhlutfall af
nettóverði aðgöngumiða. Í samningnum er kveðið á um ýmsar skyldur
dreifingaraðila, m.a. til þess að greiða framleiðanda 4.000.000 króna, auk virðisaukaskatts,
sem „sölutryggingu“ þann 15. maí 2016. Skyldi sölutryggingin dragast frá hlut
framleiðanda. Samninginn undirrituðu Anton Ingi Sigurðsson af hálfu stefnanda
og Konstantín Mikhaelsson af hálfu stefnda.
Af hálfu stefnda var gefin út
skrifleg yfirlýsing vegna kvikmyndarinnar 14. mars 2016 sem ber yfirskriftina
„vilyrði“. Þar segir: „Það staðfestist hér með að Sena ehf., kt. [...], hefur
kynnt sér ofangreinda mynd sem er framleidd af Virgo 2 kt. [...], og hefur
áhuga á að taka hana til sýninga í kvikmyndahúsum sínum og jafnframt að gefa
hana út á DVD og VOD á Íslandi. Sena mun greiða sem nemur 13.000.000 IKR fyrir
ofangreinda rétti og greiðist eigi síðar en 16. desember 2016.“
Degi síðar, 15. mars 2016,
undirrituðu sömu menn af hálfu málsaðila yfirlýsingu, sem stefnandi kveður hafa
verið útbúna af Íslandsbanka hf. og hafa verið ætlað að tryggja að greiðslur
frá stefnda til stefnanda færu inn á tiltekinn tékkareikning þess síðarnefnda
hjá bankanum (nr. [...-]). Í yfirlýsingunni er vísað til þess að stefndi hafi
skriflega lýst yfir þeirri fyrirætlan sinni að kaupa dreifingarrétt að umræddri
kvikmynd og greiða fyrir hann 13 milljónir króna eigi síðar en 16. desember
2016. Af hálfu stefnanda er því lýst yfir að öllum greiðslum sem félaginu kunni
að berast frá stefnda, tilkomnum vegna dreifingarréttar að kvikmyndinni, verði
ráðstafað inn á viðkomandi tékkareikning félagsins hjá Íslandsbanka hf.
Innstæða reikningsins eins og hún væri á hverjum tíma, auk áfallinna vaxta,
væri jafnframt veðsett bankanum með sérstakri yfirlýsingu þess efnis. Af hálfu
stefnda er staðfest að allar greiðslur sem félagið muni greiða til stefnanda
vegna dreifingarréttarins verði greiddar inn á umræddan reikning stefnanda hjá
Íslandsbanka hf. Í niðurlagi yfirlýsingarinnar er feitletrað að undirritaðir
staðfesti „að framangreindu greiðslufyrirkomulagi verði ekki breytt nema að
áður fengnu samþykki Íslandsbanka hf. þar að lútandi“. Ástæðu þess að þessi
yfirlýsing var gerð kveður stefnandi vera þá að fyrirsvarsmaður hans, Ragnar
Þór Jónsson, hafi 11. janúar 2016 gengist í sjálfsábyrgð vegna yfirdráttar á
umræddum tékkareikningi stefnanda, allt að 7.500.000 krónur.
Í aðdraganda framangreindra gerninga
gerðu eigendur að öllu hlutafé í stefnanda, þeir Anton Ingi Sigurðsson og
Ragnar Þór Jónsson, með sér hluthafasamkomulag. Liggur það samkomulag fyrir,
undirritað og vottað, dagsett 20. janúar 2016. Í 1. gr. þess segir að félag þeirra, stefnandi, eigi
allan höfundarrétt að umræddri kvikmynd, „Grimmd“. Allar tekjur, styrkir og
kostnaður við gerð kvikmyndarinnar muni fara í gegnum þar tilgreindan
bankareikning félagsins í Íslandsbanka. Í 2. gr. kemur fram að þeir Ragnar Þór
og Anton Ingi séu eigendur að jöfnu (50/50) að öllu hlutafé í stefnanda. Þá
segir þar að Ragnar hafi einn lagt fram 7,5 milljóna króna ábyrgð fyrir
yfirdrætti á bankareikningi félagsins til að geta hafið vinnu við gerð
kvikmyndarinnar. Fyrstu greiðslur sem komi til félagsins fari í að greiða
þennan yfirdrátt niður og aflétta í leiðinni ábyrgð Ragnars Þórs. Í 3. gr.
segir síðan að á meðan yfirdrátturinn vari og ábyrgð Ragnars sé í gildi fallist
Anton á að „allt hlutafé félagsins sé í eigu Ragnars Þórs“.
Stefnandi gaf út tvo reikninga 3.
maí 2016 á hendur stefnda vegna dreifingarréttar að „Grimmd“, samtals að
fjárhæð 4.000.000 króna, auk virðisaukaskatts. Á reikningunum er greiðslustaður
tilgreindur annar bankareikningur á kennitölu stefnanda en téður reikningur
hans í Íslandsbanka hf.. Af stefnu verður ráðið að óumdeilt sé að umræddir
reikningar hafi verið greiddir í samræmi við greiðslufyrirmæli á þeim og var
það staðfest við aðalmeðferð málsins.
Þá liggur fyrir ódagsett yfirlýsing
Antons Inga Sigurðssonar fyrir hönd stefnanda, sem jafnframt er árituð af
Konstantín Mikaelssyni fyrir hönd stefnda, þar sem því er lýst yfir að greiðslufyrirkomulagið
og önnur ákvæði yfirlýsingar aðila frá 15. mars 2016 séu niður fallin og að
stefnandi hafi óskað eftir því á útgefnum reikningum að greitt verði inn á
annan bankareikning en fram komi í yfirlýsingunni.
Með bréfi til stefnda, dags. 17.
febrúar 2017, benti lögmaður Ragnars Þórs Jónssonar á að engar greiðslur hefðu
borist inn á umræddan bankareikning stefnanda í Íslandsbanka og vísaði til
yfirlýsingarinnar frá 15. mars 2016. Óskaði hann þess að upplýst yrði inn á
hvaða bankareikninga greiðslur hefðu verið inntar af hendi og um ástæður þess
að greiðslur hefðu ekki borist inn á reikning stefnanda í Íslandsbanka hf. Þá
var óskað upplýsinga um það hvort aflað hefði verið samþykkis Íslandsbanka hf.
fyrir breyttu greiðslufyrirkomulagi. Um leið var óskað eftir afstöðu stefnda
til bótaskyldu félagsins gagnvart Ragnari Þór ef í ljós kæmi að greiðslur hefðu
verið inntar af hendi inn á annan reikning en reikning stefnanda hjá
Íslandsbanka hf. og bent á að Ragnar Þór sætti nú harkalegum innheimtuaðgerðum
af hálfu bankans vegna sjálfskuldarábyrgðar á yfirdrætti á téðum bankareikningi
stefnanda. Erindið ítrekaði lögmaðurinn með tölvupósti 22. s.m.
Með tölvupósti 9. mars s.á. upplýsti
lögmaðurinn að greiðsla að fjárhæð 4.030.000 krónur hefði borist inn á téðan
bankareikning stefnanda í Íslandsbanka en þess var óskað að stefndi upplýsti án
tafar hvenær eftirstöðvarnar, 8.970.000 krónur, yrði inntar af hendi til
stefnanda. Þeim tölvupósti svaraði Konstantín Mikhaelsson af hálfu stefnda 14.
mars og áréttaði að stefndi hefði „staðið í einu og öllu við gerða samninga“
við stefnanda. Vísaði hann til þess að greiðslufyrirkomulagi hefði verið breytt
í samkomulagi við Anton Inga Sigurðsson, sem væri sá eini sem komið hefði fram
af hálfu stefnanda í viðskiptum við stefnda. Nokkur tölvupóstsamskipti urðu
milli aðila í framhaldinu sem ekki er þörf á að rekja.
Í greinargerð stefnda er rakið að
eftir sýningu kvikmyndarinnar hafi legið fyrir að einu tekjur af henni á
grundvelli dreifingarsamningsins væru fyrir söluandvirði sýningarmiða, sem ekki
hafi verið umfram fjögurra milljóna króna sölutrygginguna, auk
virðisaukaskatts. Því hafi ekki komið til frekari greiðslna frá stefnda til
stefnanda á grundvelli dreifingarsamningsins. Til að auka sölu á aðgöngumiðum á
kvikmyndina hafi Anton Ingi Sigurðsson fengið félag í eigu föður síns, Sólóraf
ehf., til að kaupa aðgöngumiða á kvikmyndina beint af stefnda fyrir 10.000.000
króna, auk virðisaukaskatts, eigi síðar en 16. desember 2016. Sólóraf ehf. hafi
samþykkt snemma árs 2016 að kaupa umrædda miða fyrir 16. desember 2016 beint af
stefnda gegn því að stefnandi og stefndi samþykktu að greiðslur sem inntar yrðu
af hendi, sambærilegar og hlutdeild sem stefnandi átti að fá samkvæmt
dreifingarsamningi, myndu renna beint til félags í eigu Antons Inga
Sigurðssonar, Virgo Films ehf., en ekki til stefnanda. Stefndi geri ráð fyrir
því að ástæðan hafi verið sú að Sólóraf ehf. vildi gera Antoni Inga greiða með
kaupum á miðum, en ekki láta stefnanda, sem Anton Ingi eigi einungis 50% hlut
í, fá hlutdeild í sölu aðgöngumiðanna. Samkomulag hafi tekist milli stefnda,
stefnanda og Sólórafs ehf. um það fyrirkomulag og því sé ekki um að ræða sölu á
aðgöngumiðum með hefðbundnum hætti.
Samkvæmt reikningi útgefnum af
stefnda 10. október 2016 keypti Sólóraf ehf. 20.000 aðgöngumiða á kvikmyndina
fyrir 10.000.000 króna, auk virðisaukaskatts. Sama dag gaf Virgo Films ehf. út
reikning á hendur Senu heildsölu ehf. að fjárhæð 8.500.000 krónur, auk
virðisaukaskatts, fyrir hlutdeild í miðasölu og var hann greiddur af stefnda.
Heldur stefndi því fram að með þessu fyrirkomulagi hafi réttindi stefnanda
samkvæmt dreifingarsamningi með engum hætti verið skert þar sem ekki hefði
komið til aukinna greiðslna til stefnanda ef Sólóraf ehf. hefði ekki keypt miða
með áðurgreindum hætti. Þá er staðhæft í greinargerð að Anton Ingi Sigurðsson,
eigandi Virgo Films ehf., hafi látið andvirði umræddrar greiðslu til Virgo
Films ehf. renna til stefnanda með þeim hætti að ógreidd laun starfsmanna
stefnanda hafi verið greidd.
Samkvæmt reikningsyfirliti var það
Sena heildsala ehf., en ekki stefndi, sem greiddi 4.030.000 krónur inn á
reikning stefnanda í Íslandsbanka hf. 24. febrúar 2017. Í greinargerð stefnda
er þó ekki á því byggt að greiðslan sé stefnda óviðkomandi, en aftur á móti er
þar staðhæft að greiðslan sé ótengd kvikmyndinni Grimmd og dreifingarsamningi
um hana. Greiðslan sé vegna annarrar kvikmyndar og hefði með réttu átt að renna
til Virgo Films ehf., en að ósk Antons Inga hafi greiðslunni verið beint til
stefnanda.
Samkvæmt vottorði um skráningu í
hlutafélagaskrá, sóttu 24. mars 2017, er stjórn stefnanda skipuð tveimur
mönnum, þeim Ragnari Þór Jónssyni sem stjórnarformanni og Antoni Inga
Sigurðssyni sem meðstjórnanda, báðum með prókúruumboð. Samkvæmt vottorðinu er
enginn framkvæmdastjóri skráður í félaginu. Þótt þess sé ekki getið í stefnu er
upplýst að Ragnar Þór er í fyrirsvari fyrir stefnanda í máli þessu og gaf hann
aðilaskýrslu við aðalmeðferð málsins. Þá gáfu skýrslu sem vitni nefndur Anton
Ingi og Konstantín Mikael Mikaelsson, framkvæmdastjóri kvikmyndasviðs stefnda.
II
Málsástæður
stefnanda
Stefnandi kveðst byggja á því í
þessu máli að stefndi hafi ekki efnt aðalskyldu sína samkvæmt samningi aðila
réttilega. Greiðslur stefnda fyrir dreifingarrétt kvikmyndarinnar Grimmd hafi
numið 12.500.000 krónum, að viðbættum virðisaukaskatti. Krafan hafi ekki verið
réttilega efnd þar sem greiðslur stefnda hafi ekki verið í samræmi við
fyrirmæli yfirlýsingarinnar, dags. 15. mars 2016, og hafi að stærstum hluta
verið inntar af hendi til annars aðila en stefnanda. Tilvist kröfunnar sé því
ekki lokið, enda augljóst að stefndi hafi ekki efnt greiðsluskyldu sína
samkvæmt samningnum með greiðslum í ósamræmi við yfirlýsinguna og að stærstum
hluta til þriðja manns sem ekki átti aðild að samningnum.
Stefndi hafi ekki verið í góðri trú
þegar hann innti greiðslur sínar af hendi, það sýni gögn málsins. Vísar
stefnandi í því efni í fyrsta lagi til vilyrðis stefnda, dags. 14. mars 2016,
þar sem segi að stefndi muni greiða stefnanda, ekki öðrum, 13 milljónir króna
fyrir dreifingarrétt að kvikmyndinni. Í öðru lagi vísist til samnings
málsaðila, dags. 1. mars 2016, þar sem fram komi í aðfaraorðum samningsins að
viðsemjandi stefnda sé stefnandi, auk þess sem fyrirsvarsmenn málsaðila riti
undir samninginn. Í grein 1.5 í samningnum komi skýrt fram að stefndi greiði
stefnanda tiltekna fjárhæð sem sölutryggingu vegna samningsins og sé
greiðslutilhögun tryggingarinnar sundurliðuð í samningsákvæðinu. Í þriðja lagi
vísist til yfirlýsingarinnar, dags. 15. mars 2016. Í yfirlýsingunni staðfesti
Konstantín Mikhaelsson fyrir hönd stefnda að allar greiðslur sem stefndi muni
greiða til stefnanda vegna dreifingarréttarins verði greiddar inn á
tékkareikning stefnanda hjá Íslandsbanka hf. Þá komi fram feitletrað í lokamálsgrein
yfirlýsingarinnar að báðir aðilar staðfesti að framangreindu
greiðslufyrirkomulagi verði ekki breytt nema að áður fengnu samþykki
Íslandsbanka hf. þar að lútandi.
Stefnandi byggi á því að ódagsett
yfirlýsing Antons Inga Sigurðssonar sé að engu hafandi í málinu og
óskuldbindandi fyrir stefnanda. Í fyrsta lagi liggi fyrir að ekki hafi verið
aflað samþykkis Íslandsbanka hf. fyrir breyttu greiðslufyrirkomulagi, eins og
fyrri yfirlýsingin hafi kveðið skýrlega á um. Í öðru lagi þurfi samþykki beggja
stjórnarmanna til að skuldbinda félagið, samkvæmt grein 4.1 í samþykktum
stefnanda. Þar sem meðstjórnandinn Anton Ingi riti einn undir yfirlýsinguna sé
hún ekki skuldbindandi fyrir stefnanda. Í þriðja lagi vísist til tölvuskeytis
Konstantíns frá 16. mars sl. þar sem hann staðfesti að hafa neitað að skrifa
undir ódagsettu yfirlýsinguna frá Antoni.
Einnig byggi stefnandi á því að
stefndi hafi viðurkennt tilvist kröfunnar á hendur sér með fyrirvaralausri
innborgun á skuldina inn á tékkareikning stefnanda hjá Íslandsbanka að fjárhæð
4.030.000 krónur þann 24. febrúar 2017. Augljóst sé að greiðslan hafi ekki
verið innt af hendi af öðru tilefni en sem innborgun á skuldina enda ekki öðrum
viðskiptum til að dreifa milli stefnanda og stefnda en um kaup þess síðarnefnda
á dreifingarrétti að umræddri kvikmynd. Hefði tilefni þessarar greiðslu verið
annað en innborgun inn á skuld stefnda við stefnanda vegna kaupa stefnda á
dreifingarréttinum sé ljóst að gera verði þá lágmarkskröfu að stefndi léti þess
getið með skýrum hætti þegar greiðslan var innt af hendi. Þetta hafi stefndi
ekki gert heldur hafi greiðslan þvert á móti verið innt af hendi án nokkurra
fyrirvara. Af þeim sökum hafi stefndi án nokkurs vafa viðurkennt tilvist kröfu
stefnanda.
Aðalkrafa stefnanda sé reist á því
að efndir stefnda á grundvelli samkomulagsins hafi verið ófullnægjandi með öllu
og í andstöðu við yfirlýsinguna, enda hafi engir fjármunir verið greiddir inn á
tékkareikninginn í Íslandsbanka. Greiðsla skuldara til kröfuhafa leiði því
aðeins til brottfalls skyldu skuldara, og þar með til loka kröfuréttinda, að
greitt sé í samræmi við ákvæði samnings. Til réttra efnda af hálfu skuldara
heyri m.a. að hann inni greiðslu sína af hendi á réttum stað og á réttum tíma.
Í þessu máli hátti þannig til að
Anton Ingi og Konstantín hafi ritað undir samning aðila um kaup stefnda á
dreifingarrétti að kvikmyndinni. Tveimur vikum síðar hafi þessir sömu menn
ritað undir yfirlýsingu þess efnis að greiðslur fyrir dreifingarréttinn færu
inn á tékkareikning stefnanda hjá Íslandsbanka og að því greiðslufyrirkomulagi
yrði ekki breytt nema að fengnu samþykki bankans. Augljóst sé því að greiðslur
stefnda hafi ekki verið í samræmi við það sem um var samið í
kröfuréttarsambandi málsaðila. Af þeim sökum sé um vanefnd af hálfu stefnda að ræða
sem réttlæti það að stefnandi geti krafist efnda in natura líkt og hann geri
með kröfugerð sinni í þessu máli. Af þessum sökum líti stefnandi svo á að
umsamið kaupverð fyrir dreifingarrétt að kvikmyndinni Grimmd, 15.500.000 krónur
[12.500.000 krónur, auk virðisaukaskatts; innsk. dómara], sé ógreitt að öllu
leyti og krefjist greiðslu þess.
Varakrafa um greiðslu á 10.540.000
krónum byggi á sömu röksemdum og málsástæðum og aðalkrafan, að breyttu
breytanda, en munur á aðal- og varakröfu skýrist af því að í varakröfu hafi
verið dregnar frá greiðslur að fjárhæð 4.960.000 krónur sem greiddar hafi verið
inn á reikning stefnanda í Arion banka hf. á grundvelli tveggja reikninga frá
stefnanda, dags. 3. maí 2016.
Fyrir liggi að stefndi hafi greitt
10.540.000 krónur til Virgo Films ehf. á grundvelli reiknings frá þeim
síðarnefnda útgefnum 10. október 2016. Það sé viðurkennd meginregla í
kröfurétti að efndastaður peningakröfu sé hjá kröfuhafa. Krafa teljist því ekki
greidd fyrr en greiðslan sé komin til kröfuhafa en í því felist að hann hafi
aðgang að henni og geti ráðstafað henni. Stefnda hafi vitaskuld verið
fullkomlega ljóst að félagið Virgo Films ehf. væri ekki aðili að
kröfuréttarsambandi aðila og hafi því ekki með nokkru móti getað gengið út frá
því að hann væri laus undan greiðsluskyldu sinni með greiðslu til þess félags,
sér í lagi í ljósi yfirlýsingarinnar.
Í þessu sambandi vísi stefnandi
einnig til þeirrar meginreglu kröfuréttar að kröfuhafi eigi rétt til þess að fá
efndir kröfu sinnar í samræmi við aðalefni samnings. Í samningi málsaðila um
kaup á dreifingarréttinum hafi verið gert ráð fyrir því að greiðslur yrði
inntar af hendi til stefnanda, sem sé eðlilegt í ljósi þess að ekki hafi verið
öðrum samningsaðila til að dreifa. Þar sem stefndi hafi ekki greitt í samræmi
við efni samningsins sé um vanefnd af hálfu stefnda að ræða og af þeim sökum
krefji stefnandi hann um greiðslu þess sem eftir standi af kaupverðinu, þ.e.
þess hluta sem stefndi hafi innt af hendi til Virgo films ehf.
Verði ekki á það fallist að um
vanefnd sé að ræða byggi stefnandi á því að hann eigi rétt á skaðabótum úr
hendi stefnda sem nemi sömu fjárhæð og varakrafan. Stefndi hafi augljóslega
sýnt af sér saknæma háttsemi er hann greiddi hluta kaupverðsins til þriðja
manns, Virgo Films ehf., í trássi við ákvæði samningsins og yfirlýsingarinnar.
Tjónið nemi þeim hluta kaupverðs dreifingarréttarins sem inntur hafi verið af
hendi til Virgo Films ehf. en skilaði sér ekki til stefnanda.
Þrautavarakrafan um greiðslu
6.510.000 króna byggi á sömu málsástæðum og röksemdum og aðal- og varakrafan,
að breyttu breytanda, en sá munur sé á vara- og þrautavarakröfu að í þeirri
síðarnefndu sé dregin frá innborgun stefnda til stefnanda þann 24. febrúar 2017
að fjárhæð 4.030.000 krónur inn á tékkareikning stefnanda hjá Íslandsbanka.
Verði ekki fallist á að vanefnd sé
fyrir hendi sé með sama hætti og varðandi varakröfuna byggt á því að stefnandi
eigi rétt á skaðabótum úr hendi stefnda sem nemi þeirri greiðslu sem innt hafi
verið af hendi til Virgo Films ehf. að frádreginni innborguninni frá stefnda
þann 24. febrúar 2017.
Um lagarök kveðst stefnandi vísa til
meginreglna kröfu- og samningaréttar, m.a. um skuldbindingargildi samninga og
efndir kröfu, og til almennra reglna skaðabótaréttar, þ.m.t. sakarreglunnar. Þá
sé vísað til laga nr. 50/2000 um lausafjárkaup og laga nr. 38/2001 um vexti og
verðtryggingu. Málskostnaðarkrafa stefnanda sé reist á 130. gr. laga nr.
91/1991 um meðferð einkamála.
Við munnlegan málflutning lækkaði
stefnandi fjárkröfur sínar, stefnda til hagsbóta, og er endanleg kröfugerð hans
eins og greinir í upphafi dóms þessa. Um þessar breytingar á kröfugerð verður
nánar fjallað í niðurstöðukafla.
III
Málsástæður
stefnda
Stefndi kveðst byggja kröfu sína um
sýknu á því að krafa stefnanda vegna dreifingarsamnings við stefnda sé að fullu
greidd. Reikningar sem stefnandi byggi á að séu ógreiddir hafi allir verið
greiddir í samræmi við fyrirmæli stefnanda. Þar sem reikningar hafi verið með
annað reikningsnúmer en fram komi í yfirlýsingu aðila, dags. 15. mars 2016,
hafi stefnandi ákveðið að undirrituð yrði ný yfirlýsing þar sem stefnandi og
stefndi samþykktu að fella fyrrnefndu yfirlýsinguna úr gildi. Í síðarnefndu
yfirlýsingunni komi jafnframt fram að greiðslur fyrir dreifingarrétt hafi verið
inntar af hendi með fullnægjandi hætti. Fyrri yfirlýsingin hafi verið
undirrituð af Antoni Inga Sigurðssyni, prókúruhafa stefnanda, og því hafi
stefndi getað treyst því að Anton Ingi, sem prókúruhafi félagsins, hefði
heimild til að undirrita yfirlýsingu um að skuldbinding frá 15. mars 2016 væri
fallin niður. Þar sem Íslandsbanki hafi aldrei verið aðili að umræddri
yfirlýsingu hafi bankinn ekkert haft um það að segja hvort aðilar sem stóðu að
henni breyttu samningsskuldbindingu sinni. Því til viðbótar hafi Ragnari Þór,
stjórnarformanni stefnanda, verið fullkunnugt um umrætt greiðslufyrirkomulag
enda hafi Ragnar Þór verið sá eini á vegum stefnanda sem hafði aðgang að
heimabanka stefnanda.
Stefndi byggi á því að Anton Ingi
Sigurðsson hafi haft fullnægjandi umboð til að breyta umræddu
greiðslufyrirkomulagi, eins og hann hafi haft prókúruumboð til að undirrita
fyrri yfirlýsinguna um að greiðslur ætti að inna af hendi inn á reikning í
Íslandsbanka. Einkennilegt sé að stefnandi haldi því fram að yfirlýsingin frá
15. mars 2016 sé gild með undirritun Antons Inga en haldi því fram að síðari
yfirlýsing hans, ódagsett, sé ekki gild þar sem Anton Inga hafi skort umboð.
Með þessu haldi stefnandi því fram að prókúruumboð gildi þegar það henti
stefnanda en annars ekki.
Stefndi bendir á að í 25. til 32.
gr. laga nr. 42/1903 um verslanaskrár, firmu og prókúruumboð sé fjallað um það
hvað felist í prókúruumboði. Í 25. gr. komi fram að í prókúru felist umboð til
prókúruhafa til að undirrita allt sem snerti rekstur þess félags sem prókúran
sé veitt fyrir, að undanskildum ráðstöfunum sem varði sölu eða veðsetningu á
fasteignum. Prókúra feli í sér umboð til að annast allt það sem snerti rekstur
og atvinnu prókúruhafa. Umboðið sé vítt og í því felist heimild til að
undirrita fyrir hönd félagsins allt sem snerti rekstur þess. Þess beri einnig
að geta að Anton Ingi sé framkvæmdastjóri félagsins [sic] og allar ráðstafanir
eins og þær að senda reikninga, taka við greiðslum, undirrita samninga og annað
þess háttar feli í sér fullnægjandi skuldbindingu ef prókúruhafi undirritar
fyrir hönd félagsins. Stefndi hafi aldrei átt samskipti við neinn annan en
Anton Inga í viðskiptum sínum við stefnanda og hafi ekki verið kunnugt um það
þegar reikningar voru gefnir út eða samningar gerðir að Ragnar Þór væri í
stjórn stefnanda og ætti hlut í stefnanda, hvað þá að hann hefði undirgengist
sjálfsskuldarábyrgð fyrir hönd stefnanda.
Ragnar Þór hafi verið annar
prókúruhafi stefnanda. Hann hafi einn haft aðgang að heimabanka stefnanda og
því getað séð hvaða greiðslur bárust til stefnanda og hvaðan. Anton Ingi hafi
ekki haft aðgang að heimabanka stefnanda. Ragnar Þór hafi því haft meiri
yfirsýn yfir fjármál stefnanda en Anton Ingi. Ragnar Þór hafi engar athugsemdir
gert þegar greiðslur bárust inn á annan reikning stefnanda en þann tiltekna
reikning sem vísað hafi verið til í yfirlýsingu frá 15. mars 2016. Engar
athugsemdir hafi verið gerðar við fyrirkomulag greiðslna fyrr en faðir Ragnars
Þórs hafi farið að skipta sér af málefnum félagsins.
Í ljósi þess sem hér hafi verið
rakið telji stefndi að sýkna eigi stefnda af kröfum stefnanda.
Varakrafa um lækkun
Verði ekki fallist á kröfu stefnda
um frávísun eða sýknu sé krafist verulegrar lækkunar á dómkröfum stefnanda. Þar
sem stefndi hafi greitt til stefnanda 4.030.000 krónur vegna kvikmyndarinnar
Meyjan, sem ekki sé í eigu stefnanda, sé augljóst að Anton Ingi hafi ekki getað
krafist þess að sú greiðsla yrði innt af hendi til stefnanda. Þrautavarakrafa
stefnda sé því um að greiðslan komi til frádráttar dómkröfum stefnanda.
Stefndi kveðst byggja kröfur sínar á
lögum um verslanaskrár, firmu og prókúruumboð nr. 42/1903, lögum um
einkahlutafélög nr. 138/1994 og meginreglum samninga- og kröfuréttar. Krafa
stefnda um málskostnað byggist á 129. og 130. gr. laga nr. 91/1991 um meðferð
einkamála.
IV
Niðurstaða
Við munnlegan málflutning gerði
stefnandi breytingu á dómkröfum sínum, stefnda til hagsbóta, í tilefni af
ábendingu dómara um að vanreifað væri á hvaða grundvelli stefnandi ætti rétt á
85% hlutfalli af sölu bíómiða til Sólórafs ehf., í andstöðu við ákvæði
dreifingarsamnings þar sem gert er ráð fyrir lægra hlutfalli. Var þeirri
breytingu ekki sérstaklega mótmælt af hálfu stefnda og verður að telja hana
rúmast innan kröfugerðar stefnanda. Hafa ekki orðið slíkar breytingar á
málsgrundvelli af þessum sökum að frávísun varði án kröfu.
Við munnlegan málflutning benti
dómari enn fremur á að kröfugerð stefnanda miðaðist við það að hann ætti rétt á
fullri sölutryggingu, auk hlutdeildar í miðasölu til Sólórafs ehf., en samkvæmt
dreifingarsamningi aðila ætti sölutryggingin að dragast frá hlut framleiðanda í
tekjum af miðasölu. Benti dómari á að ekki væri upplýst í stefnu, né lögð fram
nein gögn, um heildartekjur af sölu aðgöngumiða á kvikmyndina. Bauð dómari
málsaðilum að fjalla um það hvort dómkröfur stefnanda væru vanreifaðar í ljósi
þessa. Hafnaði lögmaður stefnanda því að málið væri vanreifað af þessum sökum
og kvaðst telja óumdeilt að stefnandi ætti rétt á fullri greiðslu
sölutryggingar, enda hefði stefndi engum athugasemdum hreyft við framsetningu
kröfugerðar hans að þessu leyti. Lögmaður stefnda tjáði sig ekki um þetta
atriði í málflutningi og í greinargerð stefnda eru ekki höfð uppi nein mótmæli
eða varnir í tilefni af þessari framsetningu kröfugerðar stefnanda. Verður því lagt
til grundvallar að ágreiningslaust sé að tekjur af sölu aðgöngumiða hafi staðið
undir sölutryggingunni. Eru þá ekki efni til að vísa málinu frá dómi, án kröfu,
af framangreindum sökum.
Í fyrsta lagi er deilt um það í
málinu hvort greiðsla á svokallaðri sölutryggingu samkvæmt grein 1.5 í
dreifingarsamningi aðila frá 1. mars 2016, samtals að fjárhæð 4.000.000 króna,
auk virðisaukaskatts, hafi verið greidd réttilega til stefnanda. Óumdeilt er að
tveir reikningar sem gefnir vour út í nafni stefnanda 3. maí 2016, samtals að
framangreindri fjárhæð, voru báðir greiddir í samræmi við greiðslufyrirmæli á
þeim, en þar var mælt fyrir um að greiðslu skyldi leggja inn á tilgreindan
reikning stefnanda í Arion banka. Voru þau greiðslufyrirmæli í andstöðu við
yfirlýsingu sem aðilar höfðu undirritað 15. mars 2016, þar sem kveðið var á um
að allar greiðslur frá stefnda vegna kvikmyndarinnar skyldu lagðar inn á
tilgreindan reikning stefnanda í Íslandsbanka. Fyrir liggur ódagsett
yfirlýsing, sem Anton Ingi og Konstantín staðfestu fyrir dómi undirritanir
sínar á, þar sem því er lýst yfir að greiðslufyrirkomulagið og önnur ákvæði
yfirlýsingar aðila frá 15. mars 2016 séu niður fallin og vísað til þess að
stefnandi hafi óskað eftir því á útgefnum reikningum að greitt yrði inn á annan
bankareikning en tilgreindur sé í yfirlýsingunni. Er deilt um það hvort Anton
Ingi hafi verið til þess bær af hálfu stefnanda að breyta áður gerðri
yfirlýsingu, og það án aðkomu Íslandsbanka.
Þótt aðilar hafi skuldbundið sig til
þess í yfirlýsingunni 15. mars 2016 að breyta ekki greiðslufyrirkomulagi
samkvæmt henni „nema að áður fengnu samþykki Íslandsbanka“, þá var Íslandsbanki
ekki aðili að því samkomulagi sem fólst í yfirlýsingunni. Var bankinn því ekki
þess umkominn að koma í veg fyrir breytingar á því, ef um annað
greiðslufyrirkomulag semdist síðar milli aðila. Veltur svarið við því hvort
Anton Ingi hafi verið þess umkominn að breyta greiðslufyrirkomulaginu gagnvart
stefnda því ekki á samþykki Íslandsbanka heldur því hvort hann hafði umboð af hálfu
stefnanda til þess að breyta greiðslufyrirkomulaginu. Byggir stefndi á því að
vald til þess hafi falist í prókúruumboði Antons Inga fyrir stefnanda, en að
því verður vikið hér rétt á eftir.
Í öðru lagi er deilt um það hvort
stefndi hafi verið skuldbundinn til að láta greiðslu vegna hlutar framleiðanda
í sölu aðgöngumiða til Sólórafs ehf., fyrirtækis föður Antons Inga, renna til
stefnanda í samræmi við ákvæði dreifingarsamnings aðila frá 1. mars 2016, þar
sem gert er ráð fyrir að nettótekjur af sölu bíómiða skiptist í ákveðnu
hlutfalli milli aðila. Við munnlegan málflutning mótmælti stefnandi því sem of
seint fram kominni málsástæðu að munnlegt samkomulag hefði tekist með aðilum um
að hlutdeild framleiðanda í miðasölu til Sólórafs ehf. skyldi renna til einkahlutafélags
Antons Inga, Virgo Films ehf., í stað þess að renna til stefnanda. Málsástæðu
þessarar, sem byggt var á við munnlegan málflutning af hálfu stefnda, sér
greinilega stað í málsatvikalýsingu í greinargerð stefnda þótt hún komi ekki
jafn skýrt fram í kafla um málsástæður og lagarök. Telst hún því ekki of seint
fram komin. Fyrir dómi staðfestu Anton Ingi og Konstantín að munnlegt
samkomulag hefði tekist með aðilum framangreinds efnis. Að meginstefnu til eru
munnlegir samningar jafngildir skriflegum samningum í íslenskum rétti og hefur
framburði framangreindra vitna ekki verið hnekkt. Verður því lagt til
grundvallar að til munnlegs samkomulags hafi stofnast þess efnis sem vitnin
báru. Álitaefnið er því sem fyrr hvort Anton Ingi hafi, sem prókúruhafi
stefnanda, verið bær til að standa að því samkomulagi með gildum hætti fyrir
hönd stefnanda en um það stendur ágreiningur aðila.
Í prókúruumboði felst, skv. 25. gr.
laga nr. 42/1903 um verslanaskrá, firmu og prókúruumboð, „vald til fyrir
umbjóðanda að annast allt það, er snertir rekstur atvinnu hans, og rita
firmað“. Í prókúruumboði felst þannig víðtækt umboð til að standa að
löggerningum í nafni umbjóðanda, en það takmarkast þó við löggerninga sem
snerta rekstur atvinnu umbjóðandans, eins og að framan greinir, auk þess sem í
lokamálslið greinarinnar er tekið fram að prókúruhafi megi ekki selja né
veðsetja fasteignir umbjóðanda síns, nema hann hafi til þess beint umboð.
Samkvæmt 26. gr. sömu laga má veita prókúru fleiri mönnum en einum, þannig að
þeir geti aðeins notað hana í sameiningu (sameiginleg prókúra).
Ekki er að sjá af gögnum málsins að
ritunarréttur prókúruhafa stefnanda hafi verið takmarkaður við það að fleiri en
einn færu með hann í sameiningu, svo sem heimilt hefði verið að ákveða, sbr.
49. gr. laga nr. 138/1994 og 26. gr. laga nr. 42/1903. Í því sambandi verður
hafnað þeirri málsástæðu stefnanda að það leiði af grein 4.1 í samþykktum
félagsins að Anton Ingi hafi ekki einn getað skuldbundið félagið á grundvelli
prókúru. Samkvæmt nefndri grein samþykktanna þarf samþykki beggja stjórnarmanna
til að skuldbinda félagið þegar tveir sitja í stjórn þess, en sú grein verður
ekki skilin svo að hún fjalli um prókúruumboð eða takmörkun á því.
Samkvæmt samþykktum stefnanda er
tilgangur félagsins kvikmyndagerð og skyldur rekstur. Á fyrirliggjandi vottorði
úr hlutafélagaskrá er starfsemi stefnanda sögð á sviði framleiðslu á
kvikmyndum, myndböndum og sjónvarpsefni. Verður ekki annað séð en að gerð
dreifingarsamninga um kvikmyndir geti almennt rúmast innan valds prókúruhafa
félagsins. Ritaði Anton Ingi einn undir dreifingarsamninginn 1. mars 2016 og er
ekki um það deilt að til þess hafi hann haft heimild. Sama á við um yfirlýsingu
þá sem Anton Ingi ritaði einn undir fyrir hönd stefnanda, dags. 15. mars 2016, þar
sem vísað var til vilyrðis stefnda og kveðið á um að greiðslum sem félaginu
kynnu að berast frá stefnda vegna dreifingarréttar að umræddri kvikmynd yrði
ráðstafað inn á tiltekinn tékkareikning félagsins í Íslandsbanka.
Telja verður að það hafi ótvírætt
snert nægilega atvinnurekstur stefnanda og rúmast innan prókúruumboðs Antons
Inga að breyta tilgreindum greiðslustað og gefa stefnda fyrirmæli, við útgáfu
reikninga 3. maí 2016, um að leggja greiðslur vegna sölutryggingar inn á annan
bankareikning í eigu stefnanda en tilgreindur var í nefndri yfirlýsingu, dags.
15. mars 2016. Samkvæmt framanrituðu verður að fallast á það með stefnda að
hann hafi réttilega innt af hendi greiðslu til stefnanda á 4.000.000 króna, auk
virðisaukaskatts, samkvæmt grein 1.5 í dreifingarsamningnum. Af framangreindu
leiðir einnig að hafna verður fjárkröfu stefnanda að því leyti sem hún er byggð
á réttarreglum skaðabótaréttar og varðar sömu fjárhæð, enda er ósannað að
stefndi hafi sýnt af sér saknæma háttsemi í tengslum við greiðslu þessara
reikninga. Í því sambandi skal tekið fram að ekkert kemur fram í
yfirlýsingunni, dags. 15. mars 2016, um ástæðu þess greiðslufyrirkomulags sem
þar var kveðið á um. Er ósannað að stefndi hafi vitað eða mátt vita að ástæða
þess væri sú að stjórnarformaður stefnda hefði gengist í sjálfskuldarábyrgð
vegna yfirdráttarskuldar á þar tilgreindum bankareikningi stefnanda.
Af framangreindu leiðir að ekki
verður fallist á aðalkröfu stefnanda.
Víkur þá að þeim þætti fjárkröfu
stefnanda sem byggður er á miðasölu til Sólórafs ehf. Fyrir dómi greindu vitnin
Anton Ingi og Konstantín frá því að faðir Antons Inga hefði viljað styrkja
kvikmyndina þar sem styrkur fékkst ekki frá Kvikmyndasjóði Íslands til
eftirvinnslu hennar. Ástæða þess að styrkveitingin fór fram í formi miðakaupa
félags föðurins, Sólóraf ehf., hafi öðrum þræði verið sú að láta líta út fyrir
að meiri aðsókn hefði verið á kvikmyndina til að auðveldara yrði að koma henni
á markað erlendis. Báru vitnin um að munnlegt samkomulag hefði tekist milli þeirra
af hálfu aðila um að vikið yrði frá gildandi dreifingarsamningi vegna þessarar
miðasölu, þannig að hlutur framleiðanda af miðasölunni greiddist til Virgo
Films ehf., félags Antons Inga, í stað stefnanda og yrði 85% í stað lægra
hlutfalls samkvæmt gildandi dreifingarsamningi. Kvaðst Konstantín hafa talið
Anton Inga hafa fulla heimild fyrir hönd stefnanda til að víkja frá
dreifingarsamningnum með þessum hætti.
Ekki er byggt á öðru af hálfu
stefnda en að sala 20.000.000 aðgöngumiða til Sólórafs ehf. fyrir 10.000.000
króna, auk virðisaukaskatts, hafi raunverulega farið fram og verðmæti þannig
skipt um hendur. Um var að ræða sölu á aðgangi að höfundaréttarvörðu efni.
Samkvæmt gögnum málsins og því sem fram kom við skýrslutökur fyrir dómi var 85%
hlutur framleiðanda látinn renna til félags Antons Inga, Virgo Film ehf., en
15% til stefnda. Stefnandi fékk aftur á móti enga greiðslu í sinn hlut vegna
viðskiptanna. Því hefur þó ekki verið mótmælt sem fram kemur í stefnu og í
samkomulagi milli Antons Inga Sigurðssonar og Ragnars Þórs Jónssonar, dags. 20.
janúar 2016, sem þeir staðfestu báðir fyrir dómi, að allur höfundaréttur að
kvikmyndinni tilheyrði stefnanda. Í dreifingarsamningi aðila frá 1. mars 2016
kemur jafnframt fram að stefnandi sé framleiðandi kvikmyndarinnar. Hlutlægt séð
féll sala aðgöngumiðanna til Sólórafs ehf. undir dreifingarsamninginn og átti
stefnandi þar með rétt til hlutdeildar í nettó tekjum af sölunni, í samræmi við
ákvæði samningsins, nema honum væri breytt með gildum hætti.
Í umboði prókúruhafa felst, eins og
fyrr sagði, víðtæk heimild til að standa að löggerningum í nafni umbjóðanda, þó
þannig að ráðstafanir þurfa að snerta rekstur atvinnu umbjóðandans. Málsvörn
stefnda er á því byggð að réttindi stefnanda hafi ekki verið skert þar sem kaup
Sólórafs ehf. hefðu ekki átt sér stað nema á þeirri forsendu að hlutur
framleiðanda yrði látinn renna til félags Antons Inga í stað stefnanda.
Forsvarsmaður Sólórafs ehf., faðir Antons Inga, var að vísu ekki leiddur fyrir
dóminn sem vitni, en jafnvel þótt framangreind staðhæfing stefnda yrði lögð til
grundvallar haggar það ekki því að hlutlægt séð fólust viðskiptin við Sólóraf
ehf. í sölu aðgöngumiða að kvikmynd sem stefnandi var framleiðandi að og átti
allan höfundarétt að. Verður ekki séð að það geti með réttu talist hafa rúmast
innan prókúruumboðs Antons Inga að ráðstafa fjárhagslegum hagsmunum stefnanda
af sölu höfundaréttarvarins efnis til félags í sinni eigu, jafnvel þótt
tilgangurinn hafi öðrum þræði verið sá að auka möguleika á markaðssetningu kvikmyndarinnar
á erlendum markaði.
Stefnda var fullkunnugt um að
stefnandi var framleiðandi kvikmyndarinnar, enda samdi stefndi við stefnanda um
dreifingarrétt að henni fyrr sama ár. Að framanrituðu virtu þykir stefndi verða
að bera hallann af því að ósannað er að framangreind ráðstöfun hafi rúmast
innan prókúruumboðs Antons Inga. Verður því að hafna sýknukröfu stefnda.
Varakrafa stefnda um lækkun á kröfu
stefnanda er byggð á því að virða beri sem innborgun greiðslu hans á 4.030.000
krónum inn á bankareikning stefnanda 24. febrúar 2017. Stefnandi hefur ekki
mótmælt því, heldur þvert á móti byggt á því að sú greiðsla hafi falið í sér
innborgun stefnda inn á skuld vegna dreifingarsamnings aðila og tekur
þrautavarakrafa stefnanda mið af þessari innborgun. Virðist þannig
ágreiningslaust að virða megi téða millifærslu sem greiðslu stefnda, enda þótt
hún hafi að vísu borist stefnanda frá öðru félagi, Senu heildverslun ehf., eins
og fram kemur á reikningsyfirliti. Af öllu framanrituðu leiðir að
þrautavarakrafa stefnanda verður tekin til greina og verður stefndi því dæmdur
til að greiða stefnanda 3.658.000 krónur, með dráttarvöxtum frá
þingfestingardegi eins og krafist er, en dráttarvaxtakröfu hefur ekki verið
sérstaklega mótmælt.
Eftir úrslitum málsins, sbr. 3. mgr. 130. gr. laga nr. 91/1991, þykir rétt að gera stefnda að greiða hluta málskostnaðar stefnanda með fjárhæð sem þykir hæfilega ákveðin eins og í dómsorði greinir.
Hildur Briem héraðsdómari kveður upp
dóm þennan.
Dómsorð:
Stefndi, Sena ehf., greiði stefnanda,
Virgo 2 ehf., 3.658.000 krónur, með dráttarvöxtum samkvæmt 1. mgr. 6. gr. laga
nr. 38/2001 um vexti og verðtryggingu frá 5. september 2017 til greiðsludags.
Stefndi greiði stefnanda 350.000
krónur í málskostnað.
Hildur Briem