- Aðilaskýrsla
- Gögn
- Líkamstjón
- Matsmenn
- Matsgerð
- Málskostnaður
- Skaðabætur
- Skjöl
- Slysatrygging
- Sönnun
- Uppgjör
- Vátryggingarsamningur
- Vinnusamningur
- Vitni
- Örorka
- Örorkubætur
- Sýkna
D Ó M U R
Héraðsdóms Reykjavíkur mánudaginn 21.
janúar 2019 í máli nr. E-1413/2018:
[...]
(Guðbjörg Benjamínsdóttir lögmaður)
gegn
Vátryggingafélagi Íslands hf.
(Einar Baldvin Axelsson lögmaður)
I.
Mál þetta var höfðað 26. apríl 2018 og dómtekið 7. janúar 2019. Stefnandi er [...], [...],[...]. Stefndi er Vátryggingafélag Íslands hf., Ármúla 3, Reykjavík.
Stefnandi krefst þess aðallega að stefndi greiði honum 10.292.189 krónur, með 4,5% vöxtum frá 8. nóvember 2014 til 3. september 2016, en með dráttarvöxtum samkvæmt 1. mgr. 6. gr. laga nr. 38/2001 um vexti og verðtryggingu frá þeim degi til greiðsludags, allt að frádreginni innborgun stefnda þann 21. september 2016 að fjárhæð 5.297.756 krónur. Til vara krefst stefnandi þess að stefndi greiði honum 9.504.890 krónur, með 4,5% vöxtum frá 8. nóvember 2014 til 3. september 2016, en með dráttarvöxtum samkvæmt 1. mgr. 6. gr. laga nr. 38/2001 frá þeim degi til greiðsludags, allt að frádreginni innborgun stefnda 21. september 2016 að fjárhæð 5.297.756 krónur. Þá krefst stefnandi málskostnaðar að skaðlausu úr hendi stefnda samkvæmt framlögðum málskostnaðarreikningi eða að mati dómsins ásamt virðisaukaskatti.
Stefndi krefst sýknu af kröfum stefnanda, auk málskostnaðar úr hendi stefnanda að mati dómsins.
II.
Málsatvik:
Stefnandi slasaðist í umferðarslysi 8. ágúst 2014, þá tvítugur að aldri, þegar hann var ökumaður bifreiðar sem lenti í árekstri við ökumann annarrar bifreiðar. Stefnandi slasaðist af þessum ástæðum meðal annars á hálsi og baki. Stefndi, vátryggjandi tjónvalds, viðurkenndi bótaskyldu vegna slyssins og var fallist á að afla sameiginlegrar matsgerðar til að meta afleiðingar slyssins fyrir stefnanda.
Í matsgerð Ragnars Jónssonar læknis og Ingvars Sveinbjörnssonar lögmanns 21. júlí 2016 greinir meðal annars að stefnandi hafi lokið grunnskóla og verið í framhaldsskólum með hléum en átt eftir eina önn til að ljúka stúdentsprófi. Hann hafi einnig lokið námi frá Nýja tölvu- og viðskiptaskólanum og sótt fjölda námskeiða, meðal annars í skyndihjálp. Því til viðbótar hafi stefnandi lokið einkaflugmannsnámi og verið byrjaður á fyrstu önn í atvinnuflugmannsnámi og hann stefnt á að verða atvinnuflugmaður. Stefnandi hafi verið starfsmaður hjá lagnafóðringafyrirtæki, Oliner System Iceland ehf., á slysdegi. Hann hafi í beinu framhaldi af slysinu verið um tíu daga frá þeirri vinnu. Stefnandi hafi eftir það minnkað við sig vinnu. Eftir áramótin 2014/2015 hafi stefnandi ráðið sig til starfa sem afleysingaháseti hjá Landhelgisgæslu Íslands þar sem hann hafi ekki lengur ráðið við sitt fyrra starf. Þessu til viðbótar hafi stefnandi frá haustinu 2014 verið í námi við Fjölbrautaskólann í Ármúla og hafi hann hugsað sér að vinna meira með náminu en hann gerði. Námið hafi hins vegar gengið illa og stefnandi kennt slysinu um það. Þá hafi stefnandi unnið með náminu í námsleyfum.
Í niðurstöðum matsgerðarinnar kemur fram að stöðugleikapunkti hafi verið náð 8. nóvember 2014. Tímabundið atvinnutjón (óvinnufærni) samkvæmt 2. gr. skaðabótalaga nr. 50/1993 hafi verið 100% á tímabilinu frá 8. til 18. ágúst 2014. Stefnandi hafi verið veikur í skilningi 3. gr. sömu laga (þjáningabætur) vegna sama tímabils en ekki verið rúmfastur. Einnig greinir í niðurstöðunum að varanlegur miski stefnanda samkvæmt 4. gr. laganna hafi verið metinn 10 stig og varanleg örorka hans samkvæmt 5. gr. þeirra laga hafi verið metin 10%.
Með bréfi til stefnda 3. ágúst 2016 gerði stefnandi bótakröfur á grundvelli matsgerðarinnar vegna afleiðinga slyssins þar sem gerð var krafa um að tekið yrði mið af meðaltekjum verkafólks samkvæmt launatöflum Hagstofu Íslands vegna ársins 2014. Var krafan reist á því að aðstæður stefnanda væru óvenjulegar í skilningi 2. mgr. 7. gr. laga nr. 50/1993 og voru færð fyrir því frekari rök. Stefndi féllst ekki á kröfu og röksemdir stefnanda þess efnis og gaf út fullnaðaruppgjör sem tók mið af lágmarkslaunum samkvæmt 3. mgr. 7. gr. laga nr. 50/1993. Var afstaða stefnda reist á því að stefnandi væri námsmaður. Af hálfu stefnanda var tekið við bótum frá stefnda 21. september 2016 í samræmi við uppgjörið en með nokkrum fyrirvörum, þar á meðal með fyrirvara um árslaunaviðmið vegna bóta fyrir varanlega örorku. Með tölvuskeyti til stefnda 21. febrúar 2017 var óskað eftir endurskoðun á árslaunaviðmiði í bótauppgjöri vegna varanlegrar örorku. Þeirri beiðni var hafnað með tölvuskeyti stefnda 15. mars sama ár. Um ágreining aðila greinir nánar í málsástæðum og lagarökum.
Stefnandi gaf aðilaskýrslu við aðalmeðferð. Þá gaf skýrslu vitnið Arnar Hreinsson, framkvæmdastjóri Oliner System Iceland ehf.
III.
Helstu málsástæður og lagarök stefnanda:
Stefnandi byggir á því að í tilviki hans séu fyrir hendi óvenjulegar aðstæður í skilningi 2.
mgr. 7. gr. laga nr. 50/1993, sbr. 6. gr. laga nr. 37/1999. Stefnandi vísar
meðal annars til athugasemda með 6. gr. frumvarps sem varð að lögum nr.
37/1999. Þar komi meðal annars fram að viðmiðun við síðustu þrjú ár fyrir
slys sé almennt ekki góður mælikvarði þegar um sé að ræða ungt fólk sem sé að
hefja starfsferil sinn enda séu líkur fyrir hækkandi launum. Stefnandi vísar
til þess að við beitingu 3. mgr. 7. gr. laga nr. 50/1993 beri að leggja hið
sama til grundvallar, nánar tiltekið að ekki eigi að miða við lágmarkslaun
þegar annað viðmið sé raunhæft og nothæft. Einnig eigi að líta til þess hvort
tjónþoli hafi nýlega hafið störf á lágmarkslaunum sem síðar hefðu hækkað eða
myndu örugglega hækka. Þá eigi enn fremur að líta til þess að skilyrði ákvæðisins
hafi verið rýmkuð verulega með 6. gr. laga nr. 37/1999, sbr. athugasemdir í
fyrrgreindu lagafrumvarpi.
Stefnandi vísar til þess að
hafa verði í huga að meginmarkmið laga nr. 50/1993 sé að tryggja tjónþola
fullar bætur fyrir raunverulegt tjón sem hann verði fyrir. Slíku markmiði
verði ekki náð með því að styðjast við útreikning stefnda. Stefnandi byggir á
því að bersýnilega hafi verið rangt að leggja til grundvallar lágmarkslaun
samkvæmt 3. mgr. 7. gr. laga nr. 50/1993 en fyrir hendi séu óvenjulegar
aðstæður enda hafi stefnandi ekki verið námsmaður þegar hann slasaðist. Að
því virtu hafi borið að leggja annan mælikvarða til grundvallar við ákvörðun
bóta fyrir varanlega örorku.
Stefnandi vísar til
fyrirliggjandi matsgerðar en þar komi meðal annars fram að vegna ungs aldurs
verði tæplega byggt mikið á tekjusögu. Stefnandi hafi verið tvítugur þegar hann
slasaðist. Hann hafi lokið grunnskóla og verið í framhaldsskóla með hléum. Þá
hafi hann ekki lokið stúdentsprófi. Samkvæmt staðgreiðsluyfirlitum hafi tekjur
hans á árinu 2012 verið 1.784.303 krónur en þá hafi hann verið átján ára og
unnið með námi. Á árinu 2013 hafi stefnandi unnið með námi hjá Íslenska gámafélaginu
ehf., auk þess sem hann hafi starfað hjá Sótthreinsun og þrif ehf. Laun hans
fyrir það ár hafi numið 1.906.016 krónum. Á árinu 2014 hafi stefnandi verið í
námi í þrjá mánuði en á því ári ráðið sig í fullt starf hjá Oliner System
Iceland ehf. til eins árs frá 1. apríl 2014 að telja. Laun hans vegna þess árs
hafi numið 1.787.559 krónum. Stefnandi hafi hins vegar þurft að minnka við sig
vinnu í kjölfar slyssins og hann loks sagt upp um áramótin 2014/2015 þar sem
hann hafi ekki ráðið lengur við starfið. Stefnandi hafi um haustið 2014 byrjað
í námi að nýju í Fjölbrautaskólanum í Ármúla. Það hafi verið vegna þess að hann
hafi ekki getað stundað fyrri vinnu vegna afleiðinga slyssins en hann hafi
verið metinn til 10 stiga varanlegs miska og 10% varanlegrar örorku.
Stefnandi byggir á því að af ráðningarsamningi hans við Oliner System Iceland ehf. megi ráða að hann hafi ekki verið námsmaður þegar hann slasaðist eins og lagt hafi verið til grundvallar við uppgjör bóta af hálfu stefnda. Ráðningarsamningurinn hafi gilt til eins árs og hann miðast við fullt starf. Að því virtu hafi ekki verið um að ræða sumar- eða hlutastarf. Enn fremur sé ljóst að stefnandi hafi einungis byrjað nám um haustið 2014 vegna afleiðinga umferðarslyssins enda komi fram í málsgögnum að hann hafi verið tilneyddur að minnka við sig vinnu þar sem hann hafi ráðið illa við hana. Þá hafi hann að lokum hætt störfum hjá fyrirtækinu um áramótin 2014/2015 af fyrrgreindum ástæðum. Komi þetta fram í skriflegri staðfestingu Arnars Hreinssonar, framkvæmdastjóra Oliner System Iceland ehf. Þá verði auk þess ráðið af staðgreiðsluyfirliti vegna ársins 2014 að laun stefnanda hafi lækkað strax í kjölfar slyssins.
Með hliðsjón af aldri og atvinnusögu stefnanda er af hans hálfu aðallega byggt á því að miða eigi uppgjör bóta vegna varanlegrar örorku við meðaltekjur verkafólks á árinu 2014 samkvæmt launatöflum Hagstofu Íslands enda sé það raunhæft og sanngjarnt viðmið með hliðsjón af aðstæðum stefnanda og starfsreynslu hans. Að því virtu sundurliðist dómkröfur stefnanda með eftirgreindum hætti:
1. Bætur samkvæmt 5.-7. gr. laga nr. 50/1993:
2014: (5.364.000 x 1,08) x
(494,7/483,5) = 5.927.314
5.927.314 x 17,364 x 10% 10.292.189 krónur
2.
Greiðsla stefnda 21.
september 2016: -5.297.756
krónur
Samtals: 4.994.433
krónur
Stefnandi vísar til þess að útreikningur bóta
fyrir varanlega örorku taki mið af fyrrgreindri matsgerð. Samkvæmt henni hafi
stöðugleikatímapunktur stefnanda verið 8. nóvember 2014. Varanleg örorka
stefnanda hafi verið metin 10% og aldursstuðull hans samkvæmt 6. gr. laga nr.
50/1993 sé 17,364. Þá sé við útreikning á árslaunaviðmiði tekið tillit til 8%
framlags vinnuveitanda í lífeyrissjóð og árslaunin svo uppreiknuð miðað við
launavísitölu fram til stöðugleikapunkts, sbr. 15. gr. laga nr. 50/1993. Þessu
til viðbótar sé krafist 4,5% vaxta samkvæmt 16. gr. laga nr. 50/1993 vegna varanlegrar
örorku frá 8. nóvember 2014 (stöðugleikatímapunkti) til 3. september 2016
(mánuði eftir dagsetningu kröfubréfs), en dráttarvaxta samkvæmt 1. mgr. 6. gr.
laga nr. 38/2001 frá þeim degi til greiðsludags. Þá komi til frádráttar bótakröfu stefnanda greiðsla
frá stefnda vegna varanlegrar örorku, sem innt var af hendi 21. september
2016, að fjárhæð 5.297.756 krónur.
Stefnandi tekur fram að
varakrafa hans taki til þess að miðað verði við þau laun sem voru umsamin
samkvæmt ráðningarsamningi hans við Oliner System Iceland ehf. Slík viðmið séu
bæði raunhæf og sanngjörn og miðist við aðstæður eins og þær horfðu við
stefnanda á slysdegi. Varakrafa hans sundurliðist því með eftirgreindum hætti:
1. Bætur samkvæmt 5.-7. gr. laga nr. 50/1993:
(4.800.000 x 1,08) x (494,7/468,5) = 5.473.906
5.473.906 x 17,364 x 10% 9.504.890 krónur
2. Greiðsla stefnda 21. september 2016: -5.297.756 krónur
Samtals: 4.207.134 krónur.
Stefnandi
tekur fram í þessu sambandi að hann miði við sömu forsendur við útreikninga og
áður greinir varðandi aðalkröfu að því undanskildu að árslaun varakröfu
(400.000 krónur x 12) séu uppreiknuð miðað við launavísitölu frá janúar 2014,
sem sé það tímamark þegar ritað var undir ráðningarsamning, og fram að
stöðugleikapunkti.
Um lagarök að öðru leyti vísar stefnandi til laga nr. 50/1993 með síðari
breytingum, einkum 2. mgr. 7. gr. þeirra laga. Varðandi kröfu um vexti vísar
stefnandi sérstaklega til 16. gr. laga nr. 50/1993 og um kröfu um dráttarvexti
vísar hann til 1. mgr. 6. gr. laga nr. 38/2001. Þá vísar stefnandi til XXI.
kafla laga nr. 91/1991 um meðferð einkamála varðandi kröfu um
málskostnað, einkum 1. mgr. 130. gr. þeirra laga. Í því sambandi tekur stefnandi
fram að við ákvörðun málskostnaðar verði að taka tillit til þess að hann sé
ekki virðisaukaskattsskyldur aðili samkvæmt lögum nr. 50/1988 um virðisaukaskatt.
Helstu málsástæður og lagarök stefnda:
Stefndi byggir kröfu um sýknu á því að með þegar greiddum bótum hafi stefnandi fengið tjón sitt bætt að fullu. Hann eigi því ekki lögvarinn rétt á frekari greiðslum frá stefnda. Stefndi vísar til meginreglu í skaðabótarétti um útreikning á bótum fyrir varanlega örorku. Þá reglu sé að finna í 1. mgr. 7. gr. laga nr. 50/1993. Samkvæmt reglunni eigi að miða við meðalatvinnutekjur tjónþola síðustu þrjú almanaksár fyrir tjónsdag. Undantekningu frá þeirri reglu sé hins vegar að finna í 2. mgr. 7. gr. laganna en þar sé kveðið á um að árslaun megi meta sérstaklega þegar óvenjulegar aðstæður séu fyrir hendi og ætla megi að annar mælikvarði sé réttari á líklegar framtíðartekjur tjónþola. Undantekningarregluna eigi hins vegar að skýra þröngt. Stefndi vísar til þess að bæði skilyrðin þurfi að vera uppfyllt svo heimilt sé að beita undantekningarreglunni og stefnandi beri sönnunarbyrðina varðandi þau skilyrði. Hann verði þannig að sanna að óvenjulegar aðstæður hafi verið fyrir hendi og að annar mælikvarði en sá sem kveðið sé á um í 1. mgr. 7. gr. laganna sé réttari fyrir líklegar framtíðartekjur. Þá verði stefnandi jafnframt að sýna fram á hvaða annan mælikvarða eigi að leggja til grundvallar. Ágreiningslaust sé hins vegar að aðstæður stefnanda hafi verið óvenjulegar. Ágreiningurinn snúist um það hvort stefnanda hafi tekist að sýna nægilega fram á rétta tekjuviðmiðun fyrir kröfum sínum. Stefndi byggir á því að ekki fái staðist, eins og stefnandi byggir aðallega á, að leggja eigi meðallaun verkamanna á árinu 2014 til grundvallar sem árslaunaviðmið, í stað þess að miða við lágmarkslaun samkvæmt 3. mgr. 7. gr. laga nr. 50/1993, sbr. bótauppgjör aðila.
Stefndi vísar til aldurs stefnanda á slysdegi og að hann hafi lokið grunnskóla en námi í framhaldsskóla hafi hins vegar ekki verið lokið. Þá hafi stefnandi upplýst að til hafi staðið af hans hálfu að ljúka því námi og að hann hafi verið búinn að skrá sig í dagskóla haustið 2014 við Fjölbrautaskólann í Ármúla. Jafnframt liggi fyrir að stefnandi hafi stefnt á frekara nám, nánar tiltekið atvinnuflugnám. Ekkert liggi hins vegar fyrir um að stefnandi hafi starfað sem flugmaður enda hafi hann byrjað í atvinnuflugmannsnámi eftir slysið. Að mati stefnda virðist þannig ekkert benda til þess að stefnandi hafi ætlað sér að starfa við verkamannastörf til frambúðar. Slík störf hafi aðeins verið tilfallandi með námi. Stefnandi hafi ætlað sér að vera í flugnámi og virðist nú leggja stund á það. Þegar af þessum ástæðum geti árslaun á grundvelli meðaltekna verkafólks hér á landi á árinu 2014 ekki endurspeglað líklegar framtíðartekjur stefnanda á starfsævinni hefði slysið ekki átt sér stað. Að mati stefnda bendi því ekkert til þess að stefnandi hafi ætlað sér að starfa á þeim vettvangi. Árslaun á grundvelli meðaltekna verkafólks séu því að mati stefnda óhæf til viðmiðunar við útreikning bóta fyrir varanlega örorku stefnanda.
Stefndi byggir jafnframt á því að fullyrðingar stefnanda um að hann hafi verið í fullu starfi hjá Oliner System Iceland ehf., sbr. ráðningarsamning hans við það fyrirtæki, og þar með ekki verið námsmaður á slysdegi, standist ekki skoðun.
Í tengslum við varakröfu stefnanda þá hafnar stefndi því að unnt sé að miða við störf stefnanda hjá Oliner System Iceland ehf. Í því sambandi telur stefndi að stefnandi hafi ranglega miðað útreikninga við það sem kveðið sé á um í samningi aðila varðandi mánaðarlaun en hann hafi virt að vettugi hvernig tekjur hans hjá umræddu fyrirtæki hafi í raun verið. Ráðningarsamningurinn kveði á um mánaðarlaun á bilinu 350.000 krónur til 400.000 krónur. Aðrar launatölur komi hins vegar í ljós þegar litið sé til yfirlits úr staðgreiðsluskrá:
Maí 297.371 króna
Júní 289.637 krónur
Júlí 318.138 krónur
Ágúst 213.873 krónur
September 143.265 krónur
Október 121.925 krónur
Nóvember 163.829 krónur
Stefndi byggir á því að framangreind samantekt beri glögglega með sér að stefnandi hafi ekki verið í fullu starfi í þeim skilningi að hann hafi verið í 100% vinnu. Ef svo hefði verið þá hefðu laun hans verið hærri. Að mati stefnda virðist starf stefnanda hins vegar hafa verið með þeim hætti að hann hafi fengið greitt tímagjald eða hann hafi á annan hátt getað unnið hlutfall af fullri vinnu og fengið greitt í samræmi við það. Samningurinn hafi þannig aðeins rammað inn viðmið fyrir fulla vinnu og svo hafi verið gert upp í samræmi við það. Telur stefndi þetta renna enn frekari stoðum undir stöðu stefnanda sem námsmanns, auk þess sem ráðningarsamningurinn hafi verið til skamms tíma. Að mati stefnda verði enda ekki annað séð en að um samkomulag hafi verið að ræða sem hafi hentað nokkuð vel samhliða námi.
Stefndi byggir einnig á því að ekki verði litið fram hjá því að um sé að ræða afar stutta tekjusögu hjá stefnanda og að hún sé ekki til þess fallin að gefa góða vísbendingu um framtíðartekjur hans né heldur að vera á einhvern hátt réttari mælikvarði en lágmarkslaun samkvæmt 3. mgr. 7. gr. laga nr. 50/1993. Vinnutekjur í svo skamman tíma í tímabundnu starfi, sem ekki sé hugsað sem framtíðarstarf heldur sem bráðabirgðastarf til öflunar fjár til frekara náms, geti ekki talist vera marktækur mælikvarði á framtíðar vinnutekjur tjónþola. Þá byggir stefndi einnig á því að almennt séð sé svo stuttur tími í hvaða starfi sem er líka allt of skammur tími til að byggja á sem viðmiðun um framtíðartekjur, í öllu falli þegar ekki liggi sannanlega fyrir að um framtíðarstarf sé að ræða. Stefndi telur að svo standi ekki á í tilviki stefnanda. Þvert á móti bendi ekkert til þess að hann hafi ætlað sér að starfa hjá Oliner System Iceland ehf. til frambúðar. Aðeins liggi fyrir að hann hafi ætlað sér að starfa tímabundið hjá fyrirtækinu áður en hann héldi í frekara nám.
Stefndi byggir enn fremur á því, til viðbótar við allt framangreint, að ósannað sé og það standist ekki skoðun, að unnt sé að miða við tekjuviðmið stefnanda. Þá mótmælir stefndi sérstaklega tekjuviðmiði stefnanda varðandi varakröfu, 400.000 krónur á mánuði, enda sé þar miðað við hæstu launatölu úr gögnum án frekari rökstuðnings. Líkt og að framan greinir þá telur stefndi að það liggi fyrir að stefnandi hafi aldrei aflað sér slíkra mánaðarlauna þrátt fyrir að ráðningarsamningur hans og Oliner System Iceland ehf. hafi kveðið á um það og þrátt fyrir að hann hafi haft líkamlega burði til þeirra starfa. Að mati stefnda verði því í raun ekki séð að annar mælikvarði en mælikvarði lágmarkslauna gefi rétta mynd af líklegum framtíðartekjum stefnanda. Að framangreindu virtu eigi þannig að vera ljóst að við útreikning á bótum til stefnanda fyrir varanlega örorku eigi að miða við lágmarksárslaun í skilningi 3. mgr. 7. gr. laga nr. 50/1993. Sá mælikvarði hafi verið lagður til grundvallar í bótauppgjöri aðila og ekki séu efni til annarrar viðmiðunar.
Stefndi hafnar því að fallist verði á dráttarvaxtakröfu stefnanda vegna tímabils fyrir dómsuppsögu enda liggi ekki fyrir fyrr en við það tímamark hvort stefnandi eigi kröfu á hendur stefnda og hvort vanefndir verði á greiðslu af hans hálfu sem heimili stefnanda að leggja á dráttarvexti.
Um lagarök að öðru leyti vísar stefndi einkum til almennra reglna vátrygginga- og skaðabótaréttar, einkum meginreglna um sönnun og sönnunarbyrði. Einnig vísar stefndi til laga nr. 50/1993 með síðari breytingum, auk laga nr. 91/1991 eftir því sem við á. Þá byggir stefndi kröfu um málskostnað á 129. og 130. gr. laga nr. 91/1991.
IV.
Niðurstöður:
Ágreiningur í máli þessu tekur
til þess hvaða launaviðmiðun skuli beita við útreikning bóta vegna
varanlegrar örorku stefnanda. Markmið laga nr. 50/1993 er meðal annars að
tryggja tjónþola fullar bætur vegna varanlegrar örorku eftir því sem unnt er. Í
1. mgr. 7. gr. laganna er kveðið á um að árslaun til ákvörðunar bóta skuli
teljast vera meðalatvinnutekjur tjónþola þrjú síðustu almanaksárin fyrir þann
dag er tjón varð. Í 2. mgr. 7. gr. laganna er kveðið á um að árslaun skuli þó
metin sérstaklega þegar óvenjulegar aðstæður séu fyrir hendi og ætla megi að
annar mælikvarði sé réttari á líklegar framtíðartekjur tjónþola. Þá
greinir í 3. mgr. sömu lagagreinar að þrátt fyrir ákvæði 1. og 2. mgr. skuli
ekki miða við lægri árslaun en tilgreind eru í töflu sem þar er birt. Til þess
að vikið verði frá meginreglu 1. mgr. 7. gr. laganna með heimild samkvæmt 2.
mgr. sömu greinar verður tjónþoli að sýna fram á að fyrir hendi séu óvenjulegar
aðstæður og að annar mælikvarði sé réttari til að meta hverjar framtíðartekjur
hans hefðu orðið. Óvenjulegar aðstæður í skilningi laganna taka nánar mið af
einstaklingsbundnu mati á aðstæðum tjónþola hverju sinni. Fyrir liggur að
bótauppgjör aðila 8. september 2016, sem var með fyrirvara af hálfu stefnanda,
tók mið af lágmarkslaunum samkvæmt 3. mgr. 7. gr. fyrrgreindra laga með vísan
til þess að stefnandi væri námsmaður.
Upplýsingar í matsgerð um
atvinnu- og námssögu stefnanda o.fl., fyrir og eftir umrætt slys, sem virðast
fyrst og fremst reistar á viðtali við stefnanda á matsfundi 24. febrúar 2016,
eru ekki nægjanlega nákvæmar að mati dómsins. Af þeim ástæðum er nauðsynlegt
að gera nánar grein fyrir öðrum málsgögnum og því sem fram kom við skýrslutökur
fyrir dómi. Samkvæmt staðgreiðsluyfirliti frá ríkisskattstjóra starfaði
stefnandi frá september 2013 til desember sama ár hjá Íslenska Gámafélaginu
ehf. Í yfirliti frá Fjölbrautaskólanum í Ármúla greinir að stefnandi hafi
á sama tíma verið skráður í tvo áfanga í fjarnámi á haustönn 2013 við skólann
en þeim lauk með falli. Stefnandi bar um það fyrir dómi að hann hafi á þessum
tíma verið búsettur á Austurlandi og starfað við sorphirðu frá starfstöðvum
fyrirtækisins á Egilsstöðum og Reyðarfirði. Af staðgreiðsluyfirliti ríkisskattstjóra
verður ráðið að starfið hafi verið fullt starf. Af sama yfirliti verður ráðið
að önnur störf stefnanda hjá öðrum vinnuveitendum á árinu 2012 og fram undir
mitt ár 2013 hafi verið hlutastörf. Samrýmist það því sem fram kom við
skýrslugjöf stefnanda fyrir dómi um að hann hafi áður verið í hlutastörfum
samhliða námi við Menntaskólann í Kópavogi.
Stefnandi bar um það fyrir
dómi að hann hafi hætt í starfi hjá Íslenska Gámafélaginu ehf. um áramótin
2013/2014. Hann hafi á þeim tíma verið búinn að fá boð frá Arnari Hreinssyni,
framkvæmdastjóra Oliner System Iceland ehf., um að koma til starfa hjá
fyrirtækinu. Á sama tíma hafi slitnað upp úr sambandi stefnanda og þáverandi
unnustu og hann flutt frá Austurlandi til höfuðborgarsvæðisins.
Stefnandi bar um það að hann hafi ekki verið í launaðri vinnu fyrstu mánuði
ársins 2014 vegna búferlaflutninga o.fl. Samrýmist það
staðgreiðsluyfirliti ríkisskattstjóra. Þá bar stefnandi um það að hann
hafi byrjað hjá Oliner System Iceland ehf. í apríl það ár. Hann hafi talið hið
nýja starf áhugaverðara en starfið sem hann gegndi hjá fyrri vinnuveitanda.
Það hafi verið ástæða þess að hann ákvað að ráða sig til fyrirtækisins. Í því
starfi hafi reynt á notkun tækja og búnaðar og það meðal annars vakið áhuga
hans á starfinu. Einnig hafi verið gert ráð fyrir því að hann myndi að loknu
þjálfunartímabili gegna starfi verkstjóra. Því til viðbótar hafi
honum verið gefin von um að hann gæti síðar átt möguleika á því að verða
hluthafi í fyrirtækinu. Að því virtu hafi stefnandi á þeim tíma litið á
starfið sem framtíðarstarf og hann verið hættur í námi á þeim tíma.
Í máli þessu liggur fyrir
skriflegur ráðningarsamningur stefnanda við Oliner System Iceland ehf.,
dagsettur 1. apríl 2014, um fullt starf hjá fyrirtækinu sem tæknimaður. Samkvæmt
efni samningsins fólst starfið í heilfóðrun og myndun lagna á dagvinnutíma
frá kl. 08:30 til 18:00. Miðað var við að laun væru samkvæmt samkomulagi en
tímagjald í dagvinnu væri 1.300 krónur og vegna yfirvinnu 2.340 krónur. Þá var
tekið fram í samningnum að mánaðarlaun myndu vera á bilinu frá 350.000 krónur
til 400.000 krónur. Þar var einnig kveðið á um að ráðningin væri til eins árs,
nánar tilekið frá 1. apríl 2014 til 31. mars 2015, og samkvæmt efni samningsins
átti ráðningunni að ljúka án uppsagnar. Í skýrslu af stefnanda og
vitninu Arnari Hreinssyni fyrir dómi kom fram að stefnandi hafi hins vegar í
raun ekki hafið störf hjá fyrirtækinu fyrr en síðar í aprílmánuði það ár. Þá
bar Arnar um það að þrátt fyrir að ráðningarsamningurinn hafi samkvæmt efni
sínu verið tímabundinn þá hafi í raun verið gert ráð fyrir
því af hálfu fyrirtækisins að um væri að ræða ráðningu til lengri tíma. Af framburði
vitnisins Arnars verður ráðið að gert hafi verið ráð fyrir áframhaldandi
ráðningarsambandi við stefnanda ef vel myndi takast til við ráðninguna
fyrsta árið. Að því er varðar laun stefnanda samkvæmt
ráðningarsamningnum þá bar Arnar um það að mánaðarlaun, sem þar væri kveðið á
um, væru viðmiðunarlaun. Tímavinna væri greidd þegar lítið væri að gera hjá
fyrirtækinu en fast kaup og föst yfirvinna væri greidd þegar starfsemin væri
meiri. Einnig bar Arnar um það að sumarmánuðir hjá fyrirtækinu væru
almennt rólegur tími í starfseminni en meira væri hins vegar að gera á öðrum
tímum ársins. Lág laun stefnanda í aprílmánuði 2014 skýrðust af því að hann
hafi aðeins unnið nokkra daga í þeim mánuði og verður ráðið af framburði Arnars
að það hafi verið undir lok mánaðarins. Arnar gerði nánar grein fyrir launum
stefnanda hjá fyrirtækinu á árinu 2014, sem samkvæmt staðgreiðsluyfirliti
Ríkisskattstjóra voru undir fyrrgreindum viðmiðunarlaunum. Kom fram að verkefnastaðan
um sumarið hafi á þeim tíma verið róleg og stefnandi verið starfsmaður í
þjálfun. Þá hafi laun stefnanda, að því er varðar tímabilið frá ágúst til nóvember,
skýrst af því að stefnandi hafi verið með skerta starfsgetu eftir að hann
slasaðist og fengið greiddan veikindarétt samkvæmt kjarasamningi. Þessu
til viðbótar liggur fyrir að stefnandi var launalaus í desember 2014 samkvæmt
staðgreiðsluyfirliti Ríkisskattstjóra.
Stefnandi bar um það fyrir
dómi að áform hans um starfið hjá Oliner System Iceland ehf. hafi ekki gengið
eftir vegna fyrrgreinds umferðarslyss. Slysið hafi gert það að verkum að
hann gat ekki gegnt því áfram sem skyldi. Stefnandi hafi af þeirri ástæðu og
vegna óvissu um áframhaldandi starfsgetu hjá Oliner System Iceland ehf.
skráð sig í dagskóla á haustönn 2014 við Fjölbrautaskólann í
Ármúla. Nánar tiltekið hafi hann skráð sig til námsins einhverjum dögum
eftir slysið en áður en önnin byrjaði í skólanum. Samkvæmt staðfestingu frá
fyrrgreindum skóla stóð önnin yfir á tímabili frá 20. ágúst 2014 til 22.
desember sama ár og var stefnandi skráður í fimm áfanga. Stefnandi bar um að
hann hafi reynt að sinna starfinu áfram hjá Oliner System Iceland ehf.
samhliða því að vera skráður í fyrrgreint dagskólanám. Hvorugt hafi
hins vegar gengið upp. Hann hafi fallið í öllum áföngum námsins vegna ófullnægjandi
mætingar. Hugur hans hafi í raun ekki staðið til náms á þessum tíma og
afleiðingar slyssins hafi gert honum erfitt fyrir. Hann hafi meira verið með
hugann við starfið hjá Oliner System Iceland ehf. Starfið hafi hins vegar,
eins og áður greinir, reynst vera líkamlega of erfitt fyrir hann til að hann
gæti gegnt því eftir slysið og það gert að verkum að hann gat ekki sinnt því
sem skyldi. Það hafi því orðið að samkomulagi milli hans og Arnars að hann
léti af störfum hjá fyrirtækinu undir árslok 2014.
Framburður stefnanda um störf
hans hjá Oliner System Iceland ehf. er að mestu leyti í samræmi við framburð
vitnisins Arnars, þar með talið um ráðningu til fyrirtækisins,
þjálfunartíma til að byrja með og að gert hafi verið ráð fyrir því að hann
myndi gegna stöðu verkstjóra um haustið en af því hafi hins vegar ekki orðið
vegna hinna breyttu forsendna í kjölfar slyssins. Auk þess var samræmi í
framburði hans og framburði stefnanda um aðdraganda og ástæður fyrrgreindra
starfsloka. Af framburði Arnars fyrir dómi verður hins vegar ráðið að stefnandi
hafi takmarkað verið við eiginleg störf hjá fyrirtækinu eftir
umferðarslysið en hann notið veikindaréttar. Hið sama verður ráðið af
ódagsettri skriflegri staðfestingu Arnars sem er meðal málsgagna. Einnig liggur
fyrir að Arnar kannaðist við það fyrir dómi að til greina hafi komið að taka
stefnanda inn í eigendahóp fyrirtækisins og verður ráðið af framburði hans
að það hafi haldist í hendur við að vel tækist til með ráðninguna og að
stefnandi myndi starfa áfram hjá fyrirtækinu. Af því hafi hins vegar ekki
orðið af fyrrgreindum ástæðum. Arnar kannaðist hins vegar ekki við það fyrir
dómi hvort stefnandi hefði skráð sig í nám í dagskóla haustið 2014 en tók fram
að almennt stæði hann ekki í vegi fyrir því að starfsmenn hans færu í nám kysu
þeir að afla sér menntunar í stað þess að vera áfram við störf hjá fyrirtækinu.
Það gengi hins vegar ekki upp að vera í hlutastarfi hjá fyrirtækinu samhliða
námi.
Stefnandi bar um það fyrir
dómi að hann hafi í byrjun janúar 2015 ráðið sig til starfa hjá Landhelgisgæslu
Íslands sem háseti í afleysingum á varðskipum. Það starf hafi hentað
honum betur vegna skertrar starfsgetu. Samkvæmt staðgreiðsluyfirliti frá
Ríkisskattstjóra verður ráðið að stefnandi hafi þegið laun vegna fyrrgreinds
afleysingastarfs á tímabilinu frá janúar til júlí 2015 og vegna nóvember
sama ár. Samkvæmt yfirlitinu var stefnandi ekki í annarri launaðri vinnu á því
ári. Þá verður ráðið af yfirlitinu að um hafi verið að ræða afleysingu af sama
toga vegna febrúar 2016. Þessu til viðbótar verður ráðið af framburði stefnanda
fyrir dómi að hann hafi samhliða fyrrgreindum afleysingum á árinu 2015
tekið aftur upp þráðinn, þar sem frá var horfið, við að leggja stund á einkaflugmannsnám
sem hann hafi áður verið byrjaður í með hléum. Flug hafi verið áhugamál hans.
Þá hafi hann í janúar 2016 byrjað í atvinnuflugmannsnámi og um
svipað leyti lokið því sem eftir var af einkaflugmannsnáminu. Í staðgreiðsluyfirliti
Ríkisskattstjóra kemur fram að stefnandi hafi tímabilið frá júní til ágúst
2016 fengið greidd laun að nýju frá Oliner System Iceland ehf. en stefnandi
bar um fyrir dómi að þau laun hefðu verið vegna sumarstarfs hjá fyrirtækinu á
milli anna í námi. Hið sama kom fram í framburði vitnisins Arnars fyrir dómi.
Þá eru engin laun skráð á stefnanda samkvæmt staðgreiðsluyfirliti Ríkisskattstjóra,
dagsettu 29. mars 2017, vegna ársins 2017 fram að fyrrgreindri dagsetningu.
Af framburði stefnanda fyrir dómi verður ráðið að hann hafi að einhverju
leyti lokið fyrrgreindu atvinnuflugmannsnámi og þá kom fram hjá honum
að hann hafi frá 13. mars 2017 verið fastráðinn í starf aðstoðarmanns flugvirkja
hjá flugdeild Landhelgisgæslu Íslands og það væri vinnan hans í dag.
Að öllu framangreindu virtu þá
liggur fyrir að stefnandi var í hlutastörfum samhliða námi að minnsta kosti
fram undir mitt ár 2013 og allt fram til áramóta 2013/2014 ef tekið er tillit
til þess að hann var skráður í fjarnám í tveimur áföngum í framhaldsskóla á
haustönn 2013 á meðan hann bjó og starfaði á Austurlandi. Á tímabili frá
janúar 2014 til og með mars sama ár var stefnandi hvorki í námi í
framhaldsskóla né heldur á vinnumarkaði. Undir lok aprílmánaðar 2014 og fram
til þess tíma sem hann slasaðist, 8. ágúst sama ár, var stefnandi á vinnumarkaði
á grundvelli tímabundins ráðningarsamnings við Oliner System Iceland ehf. en
laun hans voru undir viðmiðunarlaunum samkvæmt fyrrgreindum samningi. Þá
verður jafnframt ráðið af framburði Arnars að stefnandi hafi enn verið í
starfsþjálfun þegar hann slasaðist og það hefði fyrst um haustið komið til
greina að hann fengi stöðu verkstjóra hjá fyrirtækinu hefði hann ekki slasast
og forsendur ekki breyst eins og áður greinir. Hið sama á við um hugsanlega
aðkomu stefnanda síðar sem hluthafi í fyrirtækinu. Mjög stuttu eftir slysið var
stefnandi hins vegar skráður í talsvert mikið framhaldsskólanám í dagskóla á
haustönn 2014 við Fjölbrautaskólanum í Ármúla, nánar tiltekið í sama skóla og
hann hafði áður verið skráður í fjarnám árið á undan, samhliða því að hann
var með stöðu starfsmanns hjá Oliner System Iceland ehf., að því er virðist með
skertu starfshlutfalli og/eða með því að njóta veikindaréttar samkvæmt kjarasamningi
með takmörkuðum launagreiðslum til og með nóvember 2014. Að mati dómsins var
starf stefnanda hjá fyrrgreindu fyrirtæki í raun ekki komið í þá mynd sem að
var stefnt þegar hann slasaðist og hann skráði sig í framhaldsskólanám. Þá var
ekki fullt samræmi í framburði stefnanda og vitnisins Arnars um hvort stefnandi
hefði í raun verið við störf hjá fyrirtækinu eftir að hann slasaðist eða
hvort hann hefði notið greiðslna á grundvelli veikindaréttar og á meðan hann
var skráður í fyrrgreint nám. Framburður þeirra beggja um þetta var óskýr. Í
matsgerð er vikið að þessu tímabili og tekið fram að ekki liggi fyrir nákvæmar
upplýsingar um óvinnufærni eftir slysið og tímabundið atvinnutjón hafi því
verið metið að álitum. Að mati dómsins er allt mjög óljóst um þetta tímabil og
ber stefnandi hallann af því. Hið sama á við um árið 2015 en þá var stefnandi
ekki með fulla aðkomu að vinnumarkaði en gegndi hins vegar tímabundnu starfi
hluta ársins við afleysingar á varðskipum Landhelgisgæslu Íslands samhliða
því að hann lagði stund á einkaflugmannsnám. Alkunna er að slíkt nám helst
í hendur við atvinnuflugmannsnám en stefnandi hóf hið síðarnefnda nám
í janúar 2016 og lýkur því almennt með starfsréttindum af ýmsum toga, sbr.
meðal annars I. og II. kafla reglugerðar nr. 400/2008 um skírteini útgefin af
Flugmálastjórn Íslands með áorðnum breytingum. Þá verður ráðið að flugnámið
hafi þýðingu fyrir núverandi fast starf stefnanda hjá flugdeild Landhelgisgæslu
Íslands.
Með vísan til þess sem áður er
rakið var stefnandi því í raun aðeins búinn að vera stuttan tíma í starfi hjá
Oliner System Iceland ehf., sem ekki var að fullu komið í þá mynd sem að var
stefnt. Þá virðist hann á árinu 2014, strax eftir slysið, hafa horfið frá
áformum sínum um að starfa áfram hjá fyrirtækinu og tekið upp fyrra nám, og
síðan í framhaldinu haldið áfram í flugnámi sem hann var byrjaður í áður og
farið lengra með það nám á hærra stig og með því að einhverju leyti lagt grunn
að núverandi starfsvettvangi. Heildstætt litið er það því mat dómsins að
stefnandi hafi fyrst og fremst haft stöðu námsmanns á því tímabili sem hér um
ræðir en samhliða námi hafi hann sinnt vinnu að hluta. Að því virtu er ósannað
að stefnandi hafi á árinu 2014 ætlað sér að starfa við verkamannastörf
til frambúðar. Verður því ekki fallist á með stefnanda að við útreikning
bóta fyrir varanlega örorku hans sé unnt að leggja til grundvallar meðaltekjur
verkafólks hér á landi á árinu 2014 samkvæmt launatöflum Hagstofu
Íslands, sbr. aðalkröfu hans.
Að því er varðar varakröfu
stefnanda þá er það mat dómsins, eins og lagt hefur verið til grundvallar
varðandi aðalkröfu, að ósannað sé að stefnandi hafi ætlað sér að starfa hjá
Oliner System Iceland ehf. til frambúðar en hann hafi fyrst og fremst haft
stöðu námsmanns á því tímabili sem um ræðir. Þá er um að ræða vinnutekjur í
afar skamman tíma í tímabundnu starfi hjá fyrrgreindu fyrirtæki, auk þess sem
þær viðmiðunartekjur sem stefnandi leggur til grundvallar eru mun hærri en þær
tekjur sem hann í raun aflaði sér í starfi hjá fyrirtækinu, þar með talið fyrir
slysið. Að því virtu verður ekki fallist á með stefnanda að þau viðmið séu
raunhæf og sanngjörn til að gefa nægjanlega góða vísbendingu um
framtíðartekjur stefnanda.
Að öllu framangreindu virtu
verður fallist á með stefnda að rétt hafi verið við útreikning á bótum til
stefnanda fyrir varanlega örorku að miða við lágmarkslaun samkvæmt 3. mgr. 7.
gr. laga nr. 50/1993. Stefnandi á því ekki lögvarinn rétt á frekari greiðslum
úr hendi stefnda og verður hann sýknaður af aðal- og varakröfu stefnanda.
Að teknu tilliti til atvika máls og aðstæðna aðila, og með vísan til 3. mgr. 130. gr. laga nr. 91/1991, þykir rétt að hvor aðili beri sinn kostnað af rekstri málsins.
Af hálfu stefnanda flutti mál
þetta Guðbjörg Benjamínsdóttir lögmaður. Af hálfu stefnda flutti málið Ágúst
Bragi Björnsson lögmaður í umboði Einars Baldvins Axelssonar lögmanns.
Daði Kristjánsson héraðsdómari
kveður upp dóm þennan.
D Ó M S O R Ð:
Stefndi, Vátryggingafélag Íslands hf., er
sýkn af öllum kröfum stefnanda, [...].
Málskostnaður fellur niður.
Daði
Kristjánsson