- Líkamsárás
- Skaðabætur
D Ó M U R
Héraðsdóms Vesturlands 26. október 2018 í máli nr. S-67/2018:
Ákæruvaldið
(Emil Sigurðsson saksóknarfulltrúi)
gegn
Össuri M. Örlygssyni
(Ingi Freyr Ágústsson hdl.)
Mál þetta höfðaði lögreglustjórinn á Vesturlandi með ákæru, dags. 16. október 2018, á hendur ákærða, Össuri M. Örlygssyni, kt. …, Akurgerði 19, Akranesi. Málið var dómtekið 18. október 2018.
Í ákæruskjali
segir að málið sé höfðað gegn ákærða fyrir „líkamsárás aðfaranótt
laugardagsins 28. júlí 2018, á bifreiðastæði við Stillholt 16-18 á Akranesi,
með því að hafa veist að X…, kt. …, og slegið hann í andlitið með þeim
afleiðingum að hann hlaut djúpan 4 cm langan skurð á enni.
Telst þetta varða við 1. mgr.
217. gr. almennra hegningarlaga nr. 19/1940 með síðari breytingum.
Þess er krafist að ákærði verði dæmdur til refsingar
og greiðslu alls sakarkostnaðar.
Einkaréttarkrafa:
Í málinu hefur Unnsteinn Örn
Elvarsson, hdl. lagt fram bótakröfu f.h. X…, kt. …, og krafist að ákærði verði
dæmdur til þess að greiða honum 1.000.000 kr. í miskabætur skv. 1. mgr. 26. gr.
skaðabótalaga nr. 50/1993, auk vaxta skv. 8. gr. laga um vexti og verðtryggingu
nr. 38/2001, sbr. 16. gr. skaðabótalaga nr. 50/1993, frá 28. júlí 2018 til þess
dags er mánuður er liðinn frá birtingu kröfunnar, en með dráttarvöxtum samkvæmt
1. mgr. 6. gr., sbr. 9. gr. vaxtalaga nr. 38/2001 frá þeim degi til
greiðsludags. Auk þess er gerð krafa um lögmannskostnað með virðisaukaskatti.“
Ákærði hefur fyrir dómi skýlaust játað að hafa framið
það brot sem honum er gefið að sök í ákæru og er játning hans studd
sakargögnum. Eru því efni til að leggja dóm á málið samkvæmt 1. mgr. 164. gr.
laga um meðferð sakamála nr. 88/2008. Samkvæmt þessu verður ákærði sakfelldur
fyrir brotið, sem er réttilega fært til refsilaga í ákæru.
Samkvæmt sakavottorði hefur ákærði
ekki mál á sakaskrá sem hefur áhrif á ákvörðun viðurlaga. Við ákvörðun
refsingar ákærða er þess að gæta að það horfir honum til málsbóta að hann hefur
greiðlega gengist við brotinu. Að öllu því virtu sem hér hefur verið rakið þykir refsing ákærða hæfilega ákveðin 30 daga fangelsi, en fresta
skal fullnustu refsingarinnar og falli hún niður að liðnum tveimur árum frá
uppkvaðningu dómsins haldi ákærði almennt skilorð 57. gr. almennra
hegningarlaga, nr. 19/1940.
Í málinu krefst brotaþoli, X…, þess
að ákærði greiði honum samtals 1.000.000
krónur í miskabætur, auk tilgreindra vaxta. Um lagarök er vísað til 26. gr.
skaðabótalaga nr. 50/1993. Ákærði hefur viðurkennt bótaskyldu en lagt fjárhæð
kröfunnar í mat dómsins. Í samræmi við þetta verður krafan tekin til greina með
þeirri breytingu að miskabætur verða ákveðnar hæfilegar 200.000 krónur. Einnig
verður fallist á vaxtakröfu brotaþola þannig að vextir reiknist frá 28. júlí 2018
og dráttarvextir frá 8. nóvember 2018, en þá var mánuður liðinn frá því krafan
var kynnt ákærða, sbr. 9. gr. laga um vexti og verðtryggingu, nr. 38/2001. Þá verður ákærða gert að greiða
brotaþola málskostnað sem þykir hæfilega ákveðinn svo sem greinir í dómsorði.
Loks verður ákærða með vísan til 235. gr. laga um meðferð sakamála, nr. 88/2008, gert að greiða þóknun verjanda síns sem þykir hæfilega ákveðin að meðtöldum virðisaukaskatti svo sem greinir í dómsorði. Jafnframt verður ákærðu gert að greiða ferðakostnað verjandans. Annan sakarkostnað leiddi ekki af rannsókn og meðferð málsins.
Guðfinnur
Stefánsson, aðstoðarmaður dómara, kveður upp dóm þennan.
D Ó M S O R Ð:
Ákærði, Össur M. Örlygsson, sæti 30 daga
fangelsi, en fresta skal fullnustu refsingarinnar og falli hún niður að liðnum
tveimur árum frá uppkvaðningu dómsins haldi ákærði almennt skilorð 57. gr.
almennra hegningarlaga.
Ákærði greiði X… 200.000 krónur,
ásamt vöxtum samkvæmt 8. gr. laga nr. 38/2001, frá 28. júlí 2018 til 8. nóvember
2018, en með dráttarvöxtum samkvæmt 9. gr., sbr. 6. gr. sömu laga frá þeim degi
til greiðsludags. Jafnframt greiði ákærði
brotaþola 220.000 krónur í málskostnað.
Ákærða greiði þóknun verjanda síns, Inga Freys Ágústssonar lögmanns, 235.600 krónur, og ferðakostnað verjandans 45.704 krónur.
Guðfinnur Stefánsson